Yes, in fak di Baibl gi wi proof dat hihn egzis. Hihn noh ekspek wi fi jos bileev rait soh er fi ga fayt jos bikaaz a wi rilijan. Insteda dat, hihn tel wi fi yooz “wi hoal main” ahn ga “andastandin soh dat wi ku noa di chroo Gaad.” (Roamanz 12:1; 1 Jan 5:​20) Mek wi si how di Baibl help wi fi du dis:

•   Di fak dat wahn aadali yoonivers ahn laif egzis shoa wi dat wahn Gaad egzis. Di Baibl seh: “Af koars, evri hows ga sombadi weh bil it, bot Gaad da di wan weh mek evriting.” (Heebrooz 3:4) Dis eezi fi andastan, an eevn peepl wid lata ejukayshan tink dat ih mek sens. a

•   Az hyoomanz, wi baan wid wahn dizaiya fi andastan di meenin a laif ahn wai wi deh ya. Dis da laik wahn kaina honga weh food kyaahn satisfai. Di Baibl seh dat wi hapi if wi “feed” dis honga; ih seh dat wi wahn hapi if wi noa seh wi need Gaad. (Machyu 5:3; Revilayshan 4:​11) Di fak dat wi feel da way meenz dat Gaad egzis ahn dat hihn waahn wi satisfai wi spirichwal need.​—Machyu 4:4.

•   Di Baibl gat een lata difrent prafesi, an aala dehn kohn chroo rait dong tu di leelis a deetayl. Di fak dat di prafesi dehn gat een soh moch deetaylz, ahn dehn aal kohn chroo, shoa wi dat di infamayshan kohn fahn sombadi weh faar haiya dan hyoomanz.​—2 Peeta 1:​21.

•   Di man dehn weh rait di Baibl mi ga sertn saiyentifik nalij weh hyoomanz bak den neva noa. Fi egzampl, peepl bak den mi bileev dat da wahn big animal, laik wahn elifant er wail hag er bul, di hoal op di ert. Bot fahn way bak den, di Baibl seh dat Gaad “heng di ert pahn notn.” (Job 26:7) Di Baibl aalso seh dat di shayp a di ert da laik wahn serkl er baal, ahn dat karek tu. (Isaiah 40:22) Wahn lata peepl agree dat di man dehn weh rait dehndeh tingz onli kuda mi geh di infamayshan fahn Gaad ahn no way els.

•   Di Baibl ga ansaz tu som a di haadis kweschan eena laif. Som a dehn kweschan soh impoatant dat if wahn persn noh geh wahn ansa weh satisfai dehn, dehn stap bileev eena Gaad. Fi egzampl: If Gaad lov wi an ih moa powaful dan enibadi els, wai soh moch sofarin ahn wikidnis deh rong? Wai rilijan du soh moch bad tingz insteda mek peepl du gud?​—Taitos 1:​16.