Yes. Gaad kay bowt ih servant dehn weh sik. Noatis weh di Baibl seh bowt wan a Gaad servant weh mi sik: “Wen ih sik eena bed, Jehoava noh wahn lef ahn. Yu wahn tek kayr a ahn joorin ih siknis.” (Psalm 41:3) If yoo di liv wid wahn bad siknis, dehnya da chree tingz weh ku help yu fi deel wid it:

1.   Pray fi di schrent fi bayr op. “Gaad wahn giv yu wahn kaina pees weh peepl kyaahn andastan,” ahn dat wahn help yu fi deel wid wateva yu di goh chroo.​—Filipiyanz 4:6, 7.

2.   Stay pazitiv. Di Baibl seh: “Wahn haat weh ful a jai ku mek yu feel helti. Bot wen yu aalwayz feel dong ih jrai owt yu boanz.” (Proverbs 17:22) Noh tek evriting soh seeryos, laan fi laaf eevn wen tingz di goh bad; dis wahn braitn op yu day ahn ku eevn mek yu feel beta.

3.   Schrentn yu hoap eena Gaad pramis dehn. Schrang hoap ku help yu fi ga jai eevn if yu di deel wid wahn bad siknis. (Roamanz 12:12) Di Baibl prafesai bowt wahn taim wen “nobadi wahn seh: ‘Ah feel sik.’” (Isaiah 33:24) Gaad wahn kyoar aala di dizeez ahn siknis weh saiyentis nowadayz kyaahn kyoar. Fi egzampl, aala wi geh oal, ahn no hyooman noh fain di kyoar fi dat yet, ahn dehn neva wahn fain it. Bot di Baibl seh: “Ih badi wahn luk beta dan wen ih mi yong; ih gwehn bak tu how gud ih mi feel wen ih mi yong ahn helti.”​—Job 33:25.

 Noat: Eevn doa Jehoava Witnisiz bileev eena di help weh kohn fahn Gaad, wi aalso goh da dakta fi geh help wen wi sik. (Maak 2:17) Bot wi noh promoat eni spesifik chreetment; wi bileev dat eech persn haftu mek dehn oan disizhan wen ih kohn tu helt.