Di hoali spirit da Gaad enerji, di powa weh hihn yooz fi du tingz. (Micah 3:8; Look 1:​35) Di Baibl seh dat Gaad ku sen owt ih hoali spirit bikaaz hihn ku mek fi hihn enerji, er powa, du eniting, eniway wehpaat hihn waahn.​—Psalm 104:30; 139:7.

 Eena di Baibl, di werd “spirit” chranslayt fahn di werd ruʹach eena Heebroo ahn pneuʹma eena Greek. Yoozhwali, dehndeh werd di rifaa di Gaad hoali spirit, er enerji. (Genesis 1:2) Bot sohntaim di werd ku meen sohnting els tu:

•   Bret.​—Habakkuk 2:​19; Revilayshan 13:15.

•   Win er breez.​—Genesis 8:1; Jan 3:8.

•   Di enerji weh kip tingz alaiv.​—Job 34:14, 15.

•   Wahn persn wayz er atichood.​—Numbers 14:24.

•   Wahn spirit persn, weda da Gaad er di aynjel dehn.​—1 Kings 22:21; Jan 4:​24.

 Aala dehnya meenin ga too tingz in kaman: wi kyaahn si dehn, bot wi ku si weh dehn du. Soh jos laik dat, Gaad spirit da “laik di win, wi kyaahn see’t, wi kyaahn toch it, bot ih powaful.”​—An Expository Dictionary of New Testament Words, bai W. E. Vine.

 Di Baibl aalso kaal Gaad spirit ih “han” er ih “finga dehn.” (Psalm 8:3; 19:1; Look 11:20; kompyaa Machyu 12:28.) Jos laik how wahn werkman yooz ih han er ih finga dehn fi du ih werk, Gaad yooz ih spirit fi:

•   Mek di yoonivers.​—Psalm 33:6; Isaiah 66:​1, 2.

•   Gi wi di Baibl.​—2 Peeta 1:​20, 21.

•   Mek ih servant dehn du mirakl.​—Look 4:​18; Aks 1:8; 1 Korintyanz 12:​4-​11.

•   Help ih servant dehn shoa gaadli kwalitiz.​—Galayshanz 5:​22, 23.

Di hoali spirit da noh wahn persn

 Wen di Baibl kaal Gaad spirit ih “han,” “finga,” er “bret,” ih di shoa wi dat da noh wahn persn. (Exodus 15:​8, 10) Wahn werkman han ahn finga jain aan pan ih badi, dehn noh werk bai dehnself. Saym way, Gaad spirit onli ku du weh Gaad mek ih du. (Look 11:13) Di Baibl aalso kompyaa Gaad spirit tu waata ahn shoa wi dat ih ga fi du wid tingz laik fayt ahn nalij, er andastandin. Non a dehndeh tingz da wahn persn, soh di hoali spirit kyaahn bee wahn persn needa.​—Isaiah 44:3; Aks 6:5; 2 Korintyanz 6:6.

 Di Baibl seh dat Gaad naym Jehoava, an ih Son naym Jeezas Krais; bot no way eena di Baibl tel wi dat di hoali spirit ga wahn naym. (Isaiah 42:8; Look 1:​31) Wen di Kristyan disaipl Steeven geh wahn vizhan a hevn, ih si too persn, noh chree. Di Baibl seh: “Steeven mi ful op a hoali spirit an ih luk op da hevn an ih si di gloari a Gaad, an ih si Jeezas di stan op da di rait han said a Gaad.” (Aks 7:​55) Di hoali spirit neva dehdeh, in fak da di powa a di hoali spirit mi-di mek Steeven si di vizhan.

 Rang bileef: Di “Hoali Goas,” er hoali spirit, da wahn persn ahn da paat a di Chriniti, akaadn tu 1 Jan 5:​7, 8 eena di King James verzhan a di Baibl.

 Chek di faks: Di King James verzhan a 1 Jan 5:​7, 8 gat een di werdz “eena hevn, di Faada, di Werd, ahn di Hoali Spirit, ahn dehnya chree da wan. Ahn dehn ga chree witnis pahn ert tu.” (Di Nyoo Testiment eena Bileez Kriol menshan it eena wahn futnoat.) Bot peepl weh stodi oal Baibl manyuskrip ahn skroal seh dat da neva Jan rait dehndeh werdz soh dehn noh bilangz eena di Baibl. Bruce M. Metzger, wahn teecha, seh: “Wi noh ga no dowt dat dehndeh werdz ad een layta ahn dehn noh bizniz eena di Nyoo Testiment.”​—A Textual Commentary on the Greek New Testament.

 Rang bileef: Di Baibl seh tingz weh mek ih song laik di hoali spirit da wahn persn.

 Chek di faks: Wel, sohntaim di Baibl seh tingz weh mek ih song laik di hoali spirit wahn persn fi chroo, bot dis noh reeli proov notn. Di Baibl du di saym ting wid wizdom, det, ahn sin. (Proverbs 1:​20; Roamanz 5:​17, 21) Fi egzampl, ih seh wizdom du “werk” ahn ga “chiljren,” an ih seh dat sin ku temp peepl, kil peepl, an ak greedi.​—Machyu 11:19; Look 7:​35; Roamanz 7:​8, 11.

 Eena di saym way, wen Jan mi rait dong weh Jeezas seh, hihn mi kaal di hoali spirit wahn “helpa” weh wuda du tingz laik gaid peepl, proov tingz, taak, lisn, anonks tingz, gi gloari, an aksep tingz. Ih yooz di werd “hihn” wen ih mi-di rifaa tu da “helpa.” (Jan 16:​7-​15) Bot hihn mi du dis bikaaz eena di Greek langwij dat da wan a di roolz yu haftu fala fi werdz laik “helpa” (pa·raʹkle·tos). Bot wen Jan mi yooz di werd pneuʹma, hihn neva haftu yooz di werd “hihn” lang wid it.​—Jan 14:16, 17.

 Rang bileef: Baptizm eena di naym a di hoali spirit proov dat da wahn persn.

 Chek di faks: Sohntaim, di Baibl yooz di werd “naym” fi meen powa er atariti. (Deuteronomy 18:​5, 19-​22; Esther 8:​10) Dis mek sens tu wi kaaz wee fameelya wid weh di polees dehn seh tu wahn kriminal weh dehn kech: “Stap in di naym a di laa!” Wi noa dat dehn noh meen di laa da wahn persn, noh chroo? Soh wahn persn weh baptaiz “eena di naym a” di hoali spirit da sombadi weh rekonaiz di powa a Gaad spirit an aal weh hihn du wid ih spirit.​—Machyu 28:19.

 Rang bileef: Jeezas apasl dehn an ada disaipl bak den mi bileev di hoali spirit da wahn persn.

 Chek di faks: Di Baibl noh seh dat, ahn hischri noh teech wi dat needa. Di Encyclopædia Britannica seh dat da neva til di Kongsl a Constantinople eena di yaa 381 da dehn mi staat bileev dis az cherch teechin. Dis da-mi moa dan 250 yaaz afta di laas a di apasl dehn mi ded.