No. Di Baibl tel wi dat wi shuda onli pray tu Gaad, ahn dat wi shuda pray chroo Jeezas naym. Jeezas tel ih disaipl dehn: “Soh den, dis da how unu fi pray tu ahn: ‘Fi wee Faada weh deh da hevn, mek wi kip yu naym hoali.’” (Machyu 6:9, Di Nyoo Testiment eena Bileez Kriol) Hihn neva teech ih disaipl dehn fi pray tu eni saynt, ner aynjel, ner enibadi els ada dan Gaad.

 Jeezas aalso tel ih falowa dehn: “Ai da di way ahn di chroot ahn di laif. Nobadi ku kohn tu di Faada eksep chroo mee.” (Jan 14:6, NTBK) Onli Jeezas ku pleed wid Gaad fi wi.—Heebrooz 7:25.

How Gaad feel if Ai pray tu hihn ahn stil pray tu di saynt dehn tu?

 Eena di Ten Komanment Dehn, Gaad seh: “Ai, Jehoava yu Gaad, da wahn Gaad weh ekspek yu fi wership mi wid aala yu haat.” (Exodus 20:5) Soh wen Gaad seh ih ekspek wi fi wership ahn wid aala wi haat, dat meenz dat evri paat a wi wership—inkloodin wi pryaaz—bilangz tu hihn. Wi noh fi shayr it wid nobadi els.—Isaiah 48:11.

 Wee wuda di ofen Gaad if wi pray tu enibadi els, eevn if da tu wahn saynt er wahn aynjel. Wen di apasl Jan mi chrai wership wahn aynjel, di aynjel stap ahn an tel ahn: “Yu mosn du dat! Ai da Gaad servant jos laik yoo ahn yu bradaz ahn sistaz dehn, ahn aala dehn wan weh bileev di chroo werd weh Jeezas tel wi! Yu fi wership Gaad!”—Revilayshan 19:10, NTBK.