Peepl weh mek roabots di dizain difrent ikwipment fi help daktaz du serjri chroo sohn smaal kot eena sohn smaal spays eena di badi insteda haftu mek wan big kot. Dehn mi stodi di fleksibl han, er tentakl, a di aktapus wen dehn mi-di dizain wahn masheen weh dehn yooz fi serjri.

 Tink bowt dis: Di aktapus ku grab, hoal, ahn skweez tingz wid ih ayt fleksibl tentakl, eevn wen ih deh eena wahn smaal spays. Ih ku aalso schrech owt ih tentakl fi mek it langa. Ih ku ben ih tentakl dehn eena eni dairekshan an ih ku mek difrent sekshan a it geh stif tu.

 Peepl weh du risaach pan dis bileev dat wahn masheen weh saaf ahn fleksibl laik di aktapus tentakl wuda reeli bee yoosful joorin sertn serjri. Dis kaina ikwipment wuda mek it pasabl fi du serjri pahn sertn payshents weh wuda haftu tek wahn veri komplikaytid serjri if dehn noh ga wahn neks opshan.

 Si how di aktapus fleksibl tentakl werk

 Dehn don kom op wid wahn masheen laik dat ahn dehn yooz it eena sohn praktis seshan. Wan paat a di 5 inch roabot tentakl ku lif op ahn hoal saaf ahn delikid badi paats widowt damij dehn, wail wahn neks paat a di masheen akchwali du di serjri. Akaadn tu Dr. Tommaso Ranzani, wahn memba a di teem weh mi divelop da ikwipment, “wee bileev dat sins wi mek dis ikwipment, an ih werk, wi wahn ku mek nyoo ahn eevn beta ikwipment weh ku du eevn moa tingz.”

 Weh yoo tink? Di aktapus tentakl divelop bai evolooshan? Er sohnbadi dizain it?