Wahn dolfin ku sen owt difrent song, laik klik ahn wisl, ahn den wen di song eko bak tu ahn, ih lisn fi noa weh dairekshan fi goh ahn fi noa weh deh rong ahn. Saiyentis chrai kapi weh di batlnoaz dolfin (Tursiops truncatus) ku du fi chrai improov soanar ahn ada teknalaji weh werk anda waata.

 Tink bowt dis: Wen wahn dolfin sen owt difrent song, ih lisn fi di eko weh kohn bak tu ahn fi help ahn fain fish weh di haid da di batam a di see er fi tel di difrens bitween fish ahn rak eena di waata. Akaadn tu Keith Brown, hoo da wahn teecha da Heriot-Watt University, Edinburgh, Scotland, wahn dolfin ku deh op tu 10 metaz [32.8 ft] fahn wahn kantayna ahn stil tel di difrens bitween weda ih gat een rayn waata, see waata, sorop, er ail. Saiyentis waahn mek sohn divais weh ku du di saym ting.

 Sohn saiyentis mi stodi how di dolfin sen owt song ahn how di dolfin lisn tu di eko. Den dehn chrai kapi weh di dolfin dehn du. Dehn mek wahn komplikaytid divais weh ga lata lee ilekchranik paats ahn dehn fit it eensaida wahn paip weh lee shaata dan wan meeta (3.3 ft). Di saiyentis atach di divais pahn wahn smaal lee sobmareen ahn den dehn yooz it fi chek di batam a di see fi fain tingz weh beri, laik kaybl ahn paiplain, widowt eevn toch dehn. Saiyentis tink dat di divais kuda help peepl weh deh eena di bizniz fi fain ail ahn gyas. Di soanar pahn dis divais way beta dan aal di ada soanar divais weh deh. Ih ku help saiyentis fi put dehn ikwipment da di bes spat da di batam a di see, er fi chek if sohnting geh damij, laik wahn lee krak pahn di ail rig, er fi chek if di paiplain need fi klyaa owt.

 Weh yoo tink? Di batlnoaz dolfin divelop dis soanar bai evolooshan? Er sohnbadi dizain it?