•  Tes yuself

•  Wai ih impoatant fi mek adaz tel mi weh Ah di du rang?

•  Weh ku help mi fi tek di advais weh adaz gi mi?

•  Weh ada yong peepl di seh

 Sohntaim, aala wi need fi mek sohnbadi tel wi weh wi di du rang. Wi need advais soh wi ku du tingz beta ahn soh wi ku fiks wi atichood. Dehnya kaina advais da fi wi oan gud. Now, weh yoo wuda du eena dehnya sichuwayshan:

1.  ● Yu teecha tel yu dat ih luk laik yu mi-di rosh ahn yu neva du yu bes pahn yu laas skool proajek. Ih eevn tel yu fi du moa risaach ahn noh rosh neks taim.

    Weh yu wuda du?

   1.   Rijek di advais ahn seh tu yuself, ‘Dis teecha jos noh laik mee.’

   2.   Aksep di advais ahn seh tu yuself, ‘Neks taim, Ah wahn du beta pahn mi proajek.’

2.  ● Yu ma tel yu dat yu room da wahn mes eevn doa yu mi jos don kleen it.

    Weh yu wuda du?

   1.   Rijek di advais, geh beks, ahn tink tu yuself, ‘Mai ma shee neva hapi wid weh Ah du.’

   2.   Aksep di advais ahn tink tu yuself, ‘Da chroo, Ai kuda mi du wahn beta jab di kleen mi room.’

3.  ● Yu yonga sista tel yu dat ih kyaahn stan how yu aalwayz di baas ahn op ahn tel ahn weh fi du.

    Weh yu wuda du?

   1.   Rijek di advais, geh beks, ahn tink tu yuself, ‘Da hoo shee fi tel mee dat?’

   2.   Aksep di advais, lisn tu ahn, an tink tu yuself, ‘Ah shuda chreet shee beta fi chroo.’

 Som yong peepl da laik glaas. Enitaim yu giv dehn advais fi chrai help dehn, da laik dehn jos brok intu peesiz—dehn jos kyaahn handl it. Yoo da laik dat? Wel, if yoo da laik dat, den yu di mis owt! Wai? Bikaaz ih reeli impoatant fi tek advais. Ih ku help yu now an ih ku help yu eena di fyoocha.

•   Bikaaz yu noh perfek. Di Baibl seh: “Aala wi slip dong eena difrent kaina way evri now ahn agen.” (Jaymz 3:2) Fi da reezn, evribadi need sombadi fi tel dehn wen dehn di du rang.

   “Ah chrai memba dat non a wi noh perfek ahn dat da paat a laif fi mek mistayk. Soh, Ah chrai fi laan fahn mi mistayk dehn ahn tek di advais weh adaz gi mi soh dat Ah noh mek da saym mistayk oava an oava agen.”—Dayvid.

•   Bikaaz yu ku aalwayz du beta. Di Baibl seh: “Teech wahn waiz persn, ahn hihn wahn geh moa waiz.” (Proverbs 9:9) Wen yu aksep advais fahn adaz, ih ku benifit yu.

   “Ah kudn stan fi mek peepl gi mi advais, kaaz Ah yoostu tink dat ih wuda mek Ah luk bad fronta adaz. Bot now, wen adaz gi mi advais fi sohnting weh Ah di du rang, Ah aksep it. Sohntaim, Ah eevn aks fi advais. Ai waahn laan fi du beta.”—Selena.

 Af koars, da wan ting fi aks fi advais. Bot da wahn hoal nada stoari fi mek sombadi gi yu advais wen yu neva di ekspek it er aks far it. Natalie seh dat wahn taim dehn mi gi ahn wahn lee kyaad wid kongsl weh shee neva eevn aks fa. Shee seh: “Ai mi feel terabl; Ah mi feel soh diskorij. Ah mi-di chrai soh haad fi du tingz di rait way, ahn stilyet dehn kritisaiz mi!”

 Sohnting laik dis eva hapm tu yoo? If yu ansa da yes, how yu ku deel wid it?

•   Lisn.

   Di Baibl seh: “Wahn man weh ga nalij tink bifoa ih taak, ahn wahn man weh ga andastandin wahn stay kaam.” (Proverbs 17:27) Noh intarop hooeva di taak tu yu. Ahn tink bifoa yu taak er els yu mait sari layta!

   “Wen peepl kongsl mi, Ah yoozhwali waahn chrai difen miself. Bot insted, Ah tink Ah shuda laan fi tek dehn advais ahn du tingz beta neks taim.”—Sara.

•   Foakos pahn weh di persn di tel yu, ahn noh pahn di persn ihself.

   Ih ku bee dat yu temtid fi kritisaiz di persn weh di gi yu advais. Bot ih faar beta fi “hori fi lisn. Tek yu taim bifoa yu taak, ahn noh hori fi geh beks.” (Jaymz 1:19) Weneva sombadi kongsl wi, da fi wahn reezn. Soh, noh mis owt pahn weh yu need fi hyaa jos bikaaz yu noh waahn hyaa it.

   “Wen mi ma ahn mi pa yoostu tel mi sohnting, Ah wuda geh beks wid dehn an Ah wuda tel dehn, ‘Ai noa, Ai noa!’ Bot now, Ah lisn tu dehn an Ah put intu praktis di advais weh dehn gi mi, ahn tingz goh moch beta.”—Edward.

•   Noh tink tu moch a yuself.

   Noh bikaaz yu geh kongsl meenz dat yu noh gud er dat yu noh wert notn. Ih jos meen dat, jos laik evribadi els, yu mek mistayk tu. Ahn ges wat, eevn di persn weh di gi yu kongsl er advais need kongsl er advais now an agen. In fak, di Baibl seh: “No raichos man deh pahn ert weh aalwayz du weh gud.”—Ecclesiastes 7:20.

   “Wan taim, wahn fren mi tel mi sohnting Ah mi need fi du beta pan. Ah mi tel ahn tanks fi bee aanis wid mi, bot akchwali, Ah mi geh beks. Afta wahn wail, Ah mi riyalaiz dat weh shee mi-di tel mi da-mi di chroot. Tanks tu fi shee advais, Ah kuda mi si weh Ah mi need fi werk pan. Bikaaz if shee neva tel mi notn, Ah neva mi wahn noatis weh Ah mi-di du rang.”—Sophia.

•   Mek it yu goal fi du beta.

   Di Baibl seh dat “wahn persn weh aksep karekshan smaat.” (Proverbs 15:5) Wans yu tek advais fi du beta, yu wahn put yu hert feelinz wan said, ahn yu wahn ku foakos pahn yu goal fi du beta. Rait dong wahn plan ahn si how yu di du.

   “Fi tek advais, yu need fi bee aanis wid yuself. Yu need fi aksep dat yu mek wahn mistayk, aks fi fergivnis, ahn laan fi du beta.”—Emma.

 Ih bail dong tu dis: Di Baibl seh: “Peepl laan fahn wan anada, jos laik how aiyan shaapm aiyan.” (Proverbs 27:17, Good News Translation) Gud advais ahn kongsl weh adaz mait gi yu ku akchwali mek yu laan fi du beta. Ih ku help yu now ahn wen yu groa oalda.