KWESCHANZ WEH YONG PEEPL AKS
Ai Redi fi Moov Owt?
Di aidyaa a moov owt ahn goh pahn yu oan ku bee eksaitin ahn skayri at di saym taim. How yu ku noa if yu redi fi liv pahn yu oan?
Tink bowt yu reezn fi moov
Dehn ga plenti a reezn wai yu mait disaid fi lef hoam—som a dehn da noh reeli waiz reezn. Fi egzampl, wahn yong man weh naym Mario admit, “Ai mi waahn moov owt soh dat Ah kuda mi eskayp di rispansabiliti dehn weh Ah mi gat hoam.”
Akchwali, yu wahn praabli ga les freedom if yu moov owt. Ayteen-yaa-oal Onya seh: “If yu goh liv pahn yu oan, yu wahn haftu tek kayr a yu oan plays, kuk yu oan food, pay yu oan bilz—ahn yu noh wahn ga mami ahn dadi deh fi help yu owt!”
Ih bail dong tu dis: Yu need fi andastan wai yu waahn moov owt soh dat yu ku noa if yu reeli redi er nat.
Figa owt humoch ih wahn kaas
Jeezas mi seh: “Sopoaz eni wan a unu waahn put op wahn bildin. Yu noh wahn sidong fos ahn figa owt humoch ih wahn kaas, fi si if yu ga nof moni fi finish it?” (Look 14:28) How yu ku “figa owt humoch ih wahn kaas” fi lef hoam? Tink bowt how yu di du wen ih kohn tu dehnya tingz:
HOW YU HANDL MONI?
Di Baibl seh: “Moni da wahn protekshan.”—Ecclesiastes 7:12.
Yoo fain it haad fi sayv moni?
Yoo aalwayz di spen wahn lata moni?
Yu fain yuself di baro moni fahn ada peepl?
If yu ansa da yes tu eni wan a dehndeh kweschan, den yu big jreem fi liv pahn yu oan ku en op di bee wahn big bad jreem!
“Mai breda mi moov owt wen hihn mi 19. Eena les dahn wahn yaa, ih mi spen owt aala ih moni, dehn tek weh ih kaar kaaz ih kudn pay far it, di bank neva eevn waahn len ahn moni, an ih mi-di bayg fi kohn bak hoam.”—Danielle.
Weh yu ku du fahn now: Aks yu payrents weh dehn naamali spen eena wahn mont. Weh kaina bil dehn haftu pay, ahn how dehn bojet dehn moni fi pay dehndeh bil? How dehn sayv moni?
Ih bail dong tu dis: If yu laan how fi handl moni fahn now, wail yu di liv wid yu payrents, yu wahn di pripyaa yuself fi deel wid di kaas a livin wen yu moov owt fi liv pahn yu oan.
YOO GA SELF KANCHROAL?
Di Baibl seh: “Eech wan a wi rispansabl fi how wi liv.”—Galayshanz 6:5.
Yoo da sombadi weh laik ways taim?
Yu payrents yoozhwali haftu rimain yu fi du weh dehn aks yu fi du rong di hows?
Yoo yoozhwali stay owt layta dan weh yu payrents alow yu fi stay owt?
If yu ansa da yes tu eni wan a dehndeh kweschan, yu wahn praabli fain it eevn haada fi bee rispansabl wen yu di liv pahn yu oan.
“Wen yu deh pahn yu oan, dehn ga tingz weh yu haftu du weh yu mait noh reeli laik du. Nobadi wahn dehdeh fi tel yu fi du dehndeh ting, soh yu need fi mek wahn skejul pahn yu oan fi get tingz don.”—Jessica.
Weh yu ku du fahn now: Fi wahn hoal mont, chrai fi tek aan az moch rispansabiliti az yu kud rong di hows. Fi egzampl, kleen di hows bai yuself, wash yu oan kloaz, goh shapin fi tingz fi di hows, kuk wahn meel evri nait, ahn wash op di doti tingz aftawodz. Dis wahn giv yu wahn aidyaa a weh yu haftu du wans yu di liv pahn yu oan.
Ih bail dong tu dis: Fi liv pahn yu oan, yu haftu wilin fi tek aan rispansabiliti.
Wen sombadi moov owt bifoa dehn redi, da laik dehn di jomp owta wahn playn widowt noa how fi yooz wahn parashoot fos
YOO KU KANCHROAL YU FEELINZ?
Di Baibl seh: “Bot now unu mos stap du dehn tingz deh. Unu mos stap geh beks eezi. Unu mos stap hayt peepl an stap du eevl. Unu mos stap insolt ahn slanda peepl ahn stap kos bad wod.”—Koloashanz 3:8.
Yoo fain it haad fi get lang wid adaz?
Yoo fain it haad fi kanchroal yu tempa?
Yoo aalwayz waahn tingz hapm fi yoo way?
If yu ansa da yes tu eni wan a dehndeh kweschan, yu wahn praabli fain it haad fi liv wid wahn room mayt—er, laytaraan, wahn marij mayt.
“Wen Ai mi staat tu liv wid sohn room mayt, mi weeknis dehn mi staat tu shoa. Ah mi laan dat Ah kudn ekspek adaz fi talarayt mi wen Ah deh eena wahn bad mood jos bikaaz Ah schres owt. Ah mi haftu fain wahn neks way fi deel wid schres.”—Helena.
Weh yu ku du fahn now: Laan fi get lang wid yu payrents ahn yu breda ahn sista dehn. Aftaraal, how yu handl prablemz wid yu famili now da wahn sain a how yu wahn handl prablemz wid enibadi weh yu mait en op di liv wid layta.
Ih bail dong tu dis: Yu noh di eskayp wen yu goh liv pahn yu oan—da wahn step weh yu haftu bee redi fi tek. Wai yu noh taak tu peepl weh don di liv pan dehn oan? Aks dehn weh dehn wuda mi du difrent, er weh dehn wish dehn mi noa bak den weh dehn noa now. Dat da wahn gud ting fi du wen yu di mek eni big disizhan!
