If yu di fayl mats da skool, yu mait tink yu jos need fi stodi haada. If yu noh di du yu bes eena spoats, yu mait tink yu jos need fi praktis moa. Bot eena di too sichuwayshan, weh yu mait reeli need da moa sleep. Kansida wai.

•  Wai yu need sleep?

•  Weh mait di kip yu fahn sleep gud?

•  How yu ku geh moa sleep?

•  Weh ada yong peepl di seh

 Saiyentis seh dat moas yoots need bitween ayt ahn ten owaz a sleep eech nait. Wai ih impoatant dat yu geh inof sleep?

•   Sleep help yu fi tink moa klyaa. Peepl kaal sleep “food fi di brayn.” Ih ku help yu fi du beta eena skool, eena spoats, an eena yu abiliti fi solv prablemz.

•   Sleep mek yu atichood ahn mood beta. Peepl weh noh get inof sleep moa laikli fi ga mood swing, fi feel sad er dipres, ahn fi ga prablem fi get lang wid adaz.

•   Sleep mek yu jraiv moa sayf. Wahn stodi eena di Stayts shoa dat jraivaz fahn di ayj a 16 tu 24 mi “too taimz moa laikli fi feel sleepi ahn krash” wen yu kompyaa dehn tu peepl fahn ayj 40 tu 59.

•   Sleep mek yu moa helti. Sleep help yu badi fi mantayn ihself ahn fiks eni damij. Gud sleep ku help yu fi noh ga shuga (diabetes), kech schroak, er bee oavawayt.

 Eevn doa gud sleep bring benifits, wahn lata yoots noh di geh di rait amonk a sleep weh dehn need. Fi egzampl, wahn 16-yaa-oal gyal weh naym Elaine seh:

 “Mi teecha mi aks di klaas weh taim evribadi yoozhwali goh da bed. Moas a wi seh bowt 2 aklak da maanin. Adaz seh bowt 5 aklak da maanin. Onli wan styoodent mi seh 9:30 da nait.”

 Weh da sohn tingz weh ku kaaz wi fi noh geh inof sleep?

 Wi laik heng owt. “Ih tu eezi fi stay op layt ahn ways taim, espeshali pahn naits wen Ah goh owt wid frenz.”—Pamela.

 Wi rispansabiliti dehn. “Ai lov sleep, bot ih haad fi get inof wid wahn bizi skejul.”—Ana.

 Teknalaji. “Mai foan da wahn big reezn wai Ai noh geh inof sleep. Ih haad fi noh luk pan it wen Ah deh eena bed.”—Anisa.

•   Aks yuself how impoatant sleep tu yoo. Di Baibl seh: “Ih beta fi get inof res dan fi werk ekschra haad ahn di chays afta loan breez.” (Ecclesiastes 4:6) Sleep da sohnting weh wi need. Widowt sleep, yu noh wahn du yu werk az gud, ahn yu noh eevn wahn injai fon taim az moch!

•   Fain owt wat da di mayn reezn wai yu noh sleep. Fi egzampl, yoo laik heng owt layt wid frenz? Yoo feel laik yu ga tu moch hoamwerk ahn tu moch tingz fi du rong di hows? Yu foan kip yu op paas yu taim weh yu shuda goh da bed, ahn wayk yu op afta yu don di sleep?

 Tink bowt dis: Fi get oava di mayn ting weh di kaaz yu fi noh sleep mait tek sohn haad werk, bot di rizolts wahn bee wert it. Proverbs 21:5 seh: “Wahn persn weh werk haad mek planz, an ih wahn ga sokses.”

 Af koars, weh werk fi wan persn noh aalwayz werk fi adaz. Fi egzampl, som mait seh dat wahn shaat lee nap joorin di day help dehn fi sleep beta da nait. Bot adaz seh dat if dehn sleep joorin di day, ih du jos di opozit fi dehn. Fain owt weh werk beta fi yoo. Dehnya neks sojeshan ku help:

•   Gi yuself taim fi rilaks. If yu staat tu rilaks bifoa da taim fi goh da bed, yu wahn jrap asleep kwika.

   “Ih gud fi finish yu werk rong di hows an tek kayr a yu ada rispansabiliti dehn fahn erli, soh dat yu noh haftu di wori bowt dehn wen da taim fi goh da bed.”—Maria.

•   Tek chaaj. Raada dan mek yu serkomstans kanchroal yoo, fiks yu skejul soh dat yu ku geh di sleep weh yu need.

   “Ai need fi geh notn les dan ayt owaz a sleep evri nait. Soh if Ai haftu get op erliya dan Ai naamali get op, Ai chek di klak fi si weh taim Ai need fi goh da bed soh dat Ah ku stil get di saym amonk a sleep.”—Vincent.

•   Chrai fi bee regyula. Da laik yu ga wahn nachral klak eensaida yu badi, bot ih onli werk gud if yu chrayn it. Som Saiyentis seh dat wi shuda goh da wi bed ahn wayk op di saym taim evri day. Chrai it fi wahn mont, ahn si humoch beta yu feel.

   “If yu goh sleep di saym taim evri nait, yu main wahn feel moa alert di neks day. Dis wahn help yu fi ga beta rizolts eena di werk weh yu du.”—Jared.

•   Noh heng owt wid frenz tu layt. Di Baibl seh wi fi “kanchroal” wiself, ahn dat inklood weh wi du joorin wi spyaa taim.—1 Timoti 3:2, 11.

   “Ai mi haftu laan fi limit di amonk a taim Ai spen di heng owt joorin di eevnin. If Ah noh set wahn taim limit, sohnting wahn sofa, ahn yoozhwali da mi sleep!”—Rebecca.

•   Mek yu foan “sleep” tu! Fahn bowt wahn owa bifoa yu naamali goh da bed, staat tu fait di temtayshan fi deh pahn di Intanet er fi sen teks tu yu frenz. Az a mata a fak, som saiyentis eevn waan wi bowt di taip a lait weh di foan, wi TV, er wi tablet giv aaf, kaaz ih kud mek it haada fi mek wi goh sleep.

   “Peepl ekspek yu fi aalwayz deh onlain. Bot fi mek yu kud geh inof res, yu need fi stap yooz yu foan.”—Julissa.