Wen yu oapm di Baibl, yu wahn noatis dat ih ga lata werdz. Noh mek dat diskorij yu! Insteda a dat, si di Baibl laik wahn taybl weh ful op a aal kaina food. Yu kyaahn eet evriting weh yu si pahn di taybl, bot yu kud eet inof fi feel satisfai.

 If yu waahn benifit az moch az pasabl fahn yu Baibl reedin, weh da di spirichwal “food,” yu need fi foakos pahn weh yu reed. Dis aatikl wahn help yu du dat.

Dis aatikl wahn taak bowt:

•  Wai yu need fi foakos wen yu reed di Baibl?

•  Weh yu ku du fi benifit az moch az pasabl fahn yu Baibl reedin?

•  Weh ada yong peepl di seh?

 Di moa efoat yoo put eena yu Baibl reedin, di moa yu wahn benifit fan it. Tink bowt dis egzampl: If yu dip wahn tee bag eena hat waata fi jos wahn fyoo sekants, ih mait geh wahn lee bit a flayva. Bot if yu mek di tee bag stay eena di hat waata fi wahn langa taim, ih wahn geh lat moa flayva.

 Da di saym wid Baibl reedin. Insteda jos rosh chroo yu Baibl reedin, tek taim fi tink bowt weh yu di reed. Dat da egzakli weh di Saamis mi du. Dis da weh ih seh bowt Gaad laa: “Ah stodi it aal day lang.”—Psalm 119:97.

 Af koars, dat noh meen dat yu haftu spen wahn hoal day di reed di Baibl ahn di tink bowt weh yu reed. Dis da di point: Di Saamis mi mek taim fi tink bowt weh ih reed fahn Gaad Werd. Dat mi help ahn fi mek gud disizhanz.—Psalm 119:98-100.

 “Wahn taim mi ma tel mi: ‘Wahn week ga sevn dayz, ahn yoo spen wahn lata da taim di du tingz fi yuself. Yu noh tink ih onli fyaa fi aalso yooz som a da taim fi du tingz fi Jehoava?!’”—Melanie.

 Wen yu yooz Baibl prinsiplz, ih wahn help yu fi mek beta disizhanz. Fi egzampl, ih wahn help yu fi mek gud disizhanz wen yu di chooz yu frenz ahn wen yu di fays temtayshan fi du sohnting rang.

•   Ga wahn plan. Wahn teenayja weh naym Julia seh: “Mek wahn Baibl reedin skejul. Yu need fi plan wat yu wahn reed, weh taim yu wahn reed, ahn wehpaat yu gwehn fi du yu Baibl reedin.”

•   Fain di rait serkomstans. Wahn yong laydi weh naym Gianna seh: “Chrai fain wahn kwaiyet plays. Ahn mek di res a yu famili noa bowt yu Baibl reedin skejul soh dat dehn noh intarop yu wail yu di reed yu Baibl.”

   If yu di yooz wahn ilekchranik divais, put it pahn wahn setin weh noh wahn disterb yu. Yu ku eevn reed fahn wahn paypa kapi a di Baibl. In fak, risaach shoa dat wen wahn persn reed fahn wahn paypa kapi insteda wahn ilekchranik kapi, ih ku help ahn foakos an andastan weh ih reed beta.

   “Ah geh reeli dischraktid wen Ah yooz mi ilekchranik divais. Dis hapm bikaaz sohntaim Ah wuda geh difrent mesij pahn mi divais, er mi bachri ron loa, er di Intanet mait gi chrobl. Bot wen Ah di reed fahn wahn paypa kapi Ah noh haftu wori bowt non a dat, Ah jos haftu mek shoar dat Ah ga inof lait.”—Elena.

•   Pray bifoa yu staat. Aks Jehoava fi help yu andastan ahn memba weh yu reed, ahn fi benifit fahn yu Baibl reedin.—Jaymz 1:5.

   Fi werk lang wid weh yu pray fa, chrai laan moa bowt di akonk weh yu di reed eena di Baibl. How yu ku du dat? If yu di yooz di JW Library ap, er if yu di reed di Baibl onlain, yu ku klik pahn wahn vers fi fain moa risaach infamayshan an aatiklz weh wahn help yu andastan da vers beta.

•   Aks yuself sohn kweschanz. Fi egzampl: ‘Weh dis Baibl akonk teech mi bowt Jehoava? Dis bring owt eni a Jehoava kwaliti weh Ai ku kapi?’ (Ifeezhanz 5:1) ‘Weh lesn dis teech mi ahn how Ai ku yooz it eena mai laif?’ (Psalm 119:105) ‘How Ah ku yooz dehnya vers fi help ada peepl?’—Roamanz 1:11.

   Yu ku aalso aks yuself: ‘How dehnya vers help mi fi andastan di mayn mesij eena di Baibl beta?’ Da kweschan reeli impoatant. Wai? Bikaaz aala di buk dehn eena di Baibl, fahn Jenisiz tu Revilayshan, gat wan mayn mesij: How Jehoava wahn yooz ih hevnli Kingdom fi klayr ih naym ahn proov dat onli hihn ga di rait fi rool ahn dat hihn da di bes Roola.