Briana seh: “Ai mi don staat reed di Baibl, bot Ai geh diskorij bikaaz ih gat een lata ting fi reed.”

 If yu eva feel laik dat, den dis aatikl ku help yu!

•  Wai yu fi reed di Baibl?

•  How Ai shuda reed di Baibl?

•  Weh ada yong peepl di seh

 Wen yoo tink bowt reed di Baibl, yu see’t az sohnting boarin fi du? If dat da di kays, wahn lata peepl feel di saym way. Di Baibl da wahn buk weh ga moa dan wahn towzn payj, smaal werdz, ahn no pichaz. Soh ih noh mait bee di kaina buk yoo wuda reed. Di shoa dehn pahn TV an ada veedyo mait seem moa inchrestin.

 Bot tink bowt dis: If yoo wuda fain wahn aynshent chrezha ches, yoo noh tink yu wuda waahn fain owt weh deh eensaid a da chrezha ches?

 Di Baibl da jos laik wahn chrezha ches. Ih gat een wahn lata chrezhaz weh ku help yu bee waiz ahn . . .

•   mek gud disizhanz

•   get lang wid yu payrents

•   fain di bes kaina frenz

•   deel wid schres

 Wai wahn oal buk laik dat ku help wee tudeh? Da bikaaz “evriting weh deh eena di Skripchaz kohn fahn Gaad.” (2 Timoti 3:16) Dis meen dat di advais weh deh eena di Baibl kohn fahn sombadi weh waiza dan hyoomanz.

 Wan way yu ku du dat da fi reed di Baibl fahn biginin tu en. Dat wahn gi yu wahn baysik andastandin a weh di Baibl di tel yu. Dehn ga wahn lata wayz how yu ku reed di Baibl. Tink bowt dehnya too egzampl:

•    Yu ku reed di 66 buk dehn weh deh eena di Baibl fahn Genesis tu Revilayshan.

•    Yu ku reed di Baibl eena di aada how di ivent dehn mi akchwali tek plays.

 Sohnting weh ku help: Apendiks A7 eena di New World Translation gat een wahn lis a how di mayn ivent dehn eena Jeezas laif pahn di ert mi hapm eena aada.

 Wahn sekant way fi reed di Baibl da fi fain wahn Baibl pasij bowt sombadi weh gaahn chroo sohnting simila tu weh yoo di goh chroo eena laif. Fi egzampl:

•   Yoo wuda laik fi fain frenz weh yu ku chros? Reed bowt Janatan ahn Dayvid eena di Baibl. (1 Samuel, chapta 18-​20) Den yooz di werksheet “How to Find Loyal Friends” fi laan difrent lesn fahn dis akonk weh yu ku yooz eena yu laif.

•   Yoo wuda laik fi bee schranga ahn noh giv een tu temtayshan? Reed di Baibl akonk bowt how Joazef neva giv een tu temtayshan. (Genesis, chapta 39) Den yooz di werk sheet “How to Resist Temptation . . . Joseph​—Part 1” ahn “Falsely Accused! Joseph​—Part 2” fi laan difrent lesn fahn dis akonk weh yu ku yooz eena yu laif.

•   Yoo wuda waahn noa how pryaa ku help yu? Reed di Baibl akonk a Nehimaiya. (Nehemiah, chapta 2) Den yooz di werksheet “God Answered His Prayer” fi laan difrent lesn fahn dis akonk weh yu ku yooz eena yu laif.

 Sohnting weh ku help: Wen yu di reed Baibl, mek shoar yu deh eena wahn ayrya weh kwaiyet soh dat yu ku foakos.

 Wahn terd way fi reed di Baibl da fi pik wahn pasij er wan a di saam dehn ahn reed it. Den tink bowt how yu ku yooz weh yu di laan eena yu laif. Afta yu reed, aks yuself kweschan laik dehnya:

•    Wai Jehoava put dis eena di Baibl?

•    Weh dis teech mee bowt di way how Jehoava du tingz ahn weh kaina persn hihn?

•    How Ai ku yooz weh Ah di laan eena mi laif?

 Sohnting weh ku help: Set wahn goal, rait dong wahn dayt weh yu wuda wahn staat yu Baibl reedin.