KWESCHANZ WEH YONG PEEPL AKS
How Ah Ku Avoid Negitiv Tinkin?
Weh kaina persn yoo?
Sohnbadi weh aalwayz pazitiv
“Ah chrai mi bes fi bee az hapi az pasabl ahn noh mek notn bada mi. Ai bileev dat Ah shuda jos liv eech day wid wahn smail pahn mi fays.”—Valerie.
Sohnbadi weh aalwayz negitiv
“Weneva Ah hyaa sohnting pazitiv hapm, Ah aalwayz tink dat ih song tu gud fi bee chroo, da mos wahn mistayk.”—Rebecca.
Sohnbadi weh reel ahn si how tingz reeli stan
“Wen yu aalwayz tink pazitiv, da laik yu di set op yuself, ahn wen yu aalwayz tink negitiv, Ai tink dat da wahn mizarabl way fi liv. Soh Ai jos chrai fi bee reel ahn si tingz laik how dehn reeli stan.”—Anna.
Wai ih mata?
Di Baibl seh dat “di persn weh ga wahn hapi haat aalwayz ga wahn fees evri day.” (Proverbs 15:15) Peepl weh avoid negitiv tinkin ahn luk pahn tingz weh hapm eena dehn laif eena wahn pazitiv way moa hapiya fi chroo. Dehn aalso ga moa frenz. If yu tink bowt it, hoo wuda waahn spen taim wid sohnbadi weh aalwayz negitiv?
Bot eevn if yoo da sohnbadi weh chrai noh mek notn bada yu, dehn stil ga chalenjiz eena laif weh yu haftu fays. Fi egzampl:
Yu mait wori bowt di nyooz weh yu hyaa bowt waar, vailens, ahn kraim.
Yu mait haftu deel wid prablemz eena yu famili.
Yu praabli ga yu oan weeknis dehn er tingz weh yu wish yu neva du, ahn yu haftu deel wid dehn tingz.
Maybi wan a yu fren hert yu feelinz.
Rada dahn ignoar di tingz weh di hapm rong yu—er wori soh moch bowt dehn dat dehn mek yu feel mizarabl—chrai bee balans. If yu reeznabl, dat wahn help yu fi avoid negitiv tinkin, an ih wahn help yu fi aksep di tingz weh hapm widowt geh diskorij.
Yu ku mek it chroo di staam dehn eena laif bikaaz yu noa dat di Son wahn kom out agen
Weh yu ku du?
Aksep dat yu ga tingz fi werk pan.
Di Baibl seh: “No raichos persn deh pahn di ert hoo aalwayz du gud ahn neva mek wahn mistayk.” (Ecclesiastes 7:20, Good News Translation) Di fak dat sohntaim yu mek mistayk shoa dat yoo da jos wahn hyooman, ih noh shoa dat yoo noh gud inof.
How fi bee reeznabl: Werk pahn yu weeknis dehn, bot noh ekspek fi bee perfek. Wahn yong man weh naym Kayleb seh, “Ai chrai haad fi noh tink bowt mi mistayk dehn. Insted, Ah chrai laan fahn dehn soh dat Ah ku bee wahn beta persn.”
Noh kompyaa yuself wid adaz.
Di Baibl seh: “Noh mek wi geh prowd ahn di ron gens wan anada ahn di jelos wan anada.” (Galayshanz 5:26) If yu goh pahn soashal meedya fi luk pahn pichaz a ada peepl weh gaahn da wahn paati weh dehn neva invait yoo tu, ih ku mek yu feel reeli bad. Ih ku mek yu feel laik yu bes frenz da yu wers enimi.
How fi bee reeznabl: Aksep di fak dat yu kyaahn geh invaitid tu evri singl paati. Pahn tap a dat, soashal meedya noh shoa yu di hoal stoari. Wahn yong teenayja weh naym Aleksis seh, “Moas a di taim, peepl onli shoa yu di eksaitin tingz weh hapm eena dehn laif pahn soashal meedya. Peepl noh poas evri singl ting weh hapm eena dehn laif.”
Aalwayz mek pees—espeshali eena yu famili.
Di Baibl seh: “Unu mos du evriting weh unu noa fi du soh dat unu ku liv peesabl.” (Roamanz 12:18) Yu kyaahn kanchroal di way ada peepl bihayv, bot yu ku kanchroal yuself. Yoo ku chooz fi bee peesabl.
How fi bee reeznabl: Mek wahn goal fi noh bee di persn weh mek prablemz geh wers eena yu famili, insted, chrai yu bes fi liv eena pees, jos laik eena eni ada rilayshanship. Wahn teenayja weh naym Melinda seh, “Nobadi perfek, an aala wi wahn get pahn eech ada nervz now an agen. Da wee haftu disaid how wee wahn rispan—wi wahn mek pees er du di opozit.”
Aalwayz bee tankful.
Di Baibl seh: ‘Unu fi aalwayz bee tankful.’ (Koloashanz 3:15) If yu aalwayz tankful, dat wahn help yu fi aalwayz foakos pahn di gud tingz eena yu laif insteda foakos pahn di bad tingz weh hapm.
How fi bee reeznabl: Noh ignoar yu prablemz an priten dat evriting gud eena yu laif. Wahn yong uman weh naym Rebeka seh, “Evri day Ah rait dong wan gud ting weh mi hapm eena wahn lee buk. Ah du dat soh dat Ah ku rimain miself dat Ah ga lata gud tingz fi tink bowt.”
Egzamin hoo da yu frenz.
Di Baibl seh: “Bad kompni spail gud karakta.” (1 Korintyanz 15:33) If di peepl weh yu spen wahn lata taim wid laik joj, aalwayz negitiv, er sad, yu wahn staat tu bee laik dehn.
How fi bee reeznabl: Frenz goh chroo haad taimz, ahn fi wahn wail dehn mait hayt dehn laif. Soh sopoat dehn, bot noh mek fi dehn prablemz wori yoo tu. Wahn yong uman weh naym Michelle seh, “Wi shudn onli ga frenz weh aalwayz negitiv. Eena mats, wen yu ad too negitiv nomba tugeda, yu jos wahn geh wahn biga negitiv.”
Reed moa bowt how fi bee pazitiv
Wi liv eena wahn taim weh di Baibl kaal sohn “terabl taimz.” (2 Timoti 3:1) Yoo fain it haad fi bee pazitiv bowt tingz wen di hoal werl ful op a badnis? Reed “Wai Lata Sofarin Deh?” pahn jw.org.
