•  Weh yu shuda noa

•  Weh yu ku du

•  Weh ada yong peepl di seh

 Peepl onli wahn chros yu if dehn si dat yu dizerv dehn chros. Wen yu obay di roolz weh yu payrents set fi yu, da laik yu di pay aaf wahn loan. Yu oa it tu yu payrents fi bee obeedyant, an if yu aalwayz mek shoar dat yu kom op wid yu ‘payments,’ den yu payrents wahn giv yu moa ‘kredit’ (er freedom). Pan di ada han, if yu du tingz fi mek dehn looz dehn chros eena yu, noh geh sopraiz wen yu payrents noh wilin fi “len” yu moa freedom, kaa dehn kyaahn chros yu.

 Ih tek taim fi mek peepl chros yu. Yu need fi proov dat yu da wahn rispansabl persn bai di tingz weh yu du, ahn den yu payrents wahn giv yu moa freedom.

 WAHN CHROO STOARI: “Az wahn teenayja, Ai mi noa egzakli weh mai payrents mi waahn mek Ah du. Soh Ah yoostu ak laik Ah mi-di du evriting weh dehn mi waahn, wen reeli, Ai mi-di du weh Ai mi waahn eena seekrit. Dat mi mek it haad fi mek mai payrents chros mi. Afta wahn wail, Ah mi laan dat dehn noh ga no way rong it: Yu kyaahn cheet di sistem fi geh moa freedom. Yu haftu werk haad fi gayn dehn chros.”​—Craig.

 Bee aanis​—eevn wen ih haad. Evribadi mek mistayk, bot wen yu tel lai fi kova it (er wen yu hoal bak sohn infamayshan fi mek dehn noh noa di hoal stoari), ih wahn brok di chros weh yu payrents gat eena yu. Pahn di ada han, wen yu bil op wahn rekad az sombadi weh kompleetli aanis, yu payrents wahn si di dat yu machoar inof fi admit yu mistayk dehn. Ahn dat da di kaina persn weh dehn ku chros.

 “Yu noh wahn aalwayz looz peepl chros bikaaz a weh yu mek wahn mistayk, bot yu wahn aalwayz looz dehn chros if yu chrai haid yu mistayk dehn.”​—Anna.

 Di Baibl seh: “Wi waahn du di rait ting aal di taim.”​—Heebrooz 13:18.

•   Tink bowt dis: Wen yu payrents aks wehpaat yu gwehn ahn weh yu gwehn goh du, yoo tel dehn di hoal chroot? Er wen yu payrents aks wehpaat yu mi deh ahn weh yu mi-di du, yu hoal bak som a di deetaylz weh dehn wuda waahn noa?

 Bee rispansabl. Obay aala di roolz weh yu payrents set fi yu. Aalwayz du di werk weh yu payrents giv yu fi du rong di hows. Wen yu ga wahn apointment, mek shoar yu get deh pahn taim. Tek rispansabiliti fi yu skool werk. Noh stay owt layta dan di taim weh yu payrents set fi yu.

 “If yu payrents alow yu fi heng owt wid yu fren dehn, bot dehn aks yu fi get bak hoam bai 9:00 p.m., noh kohn hoam rong 10:30 ahn ekspek dat dehn wahn alow yu fi goh owt wid yu fren dehn neks taim!”​—Ryan.

 Di Baibl seh: “Yu si, eech wan a wi rispansabl fi how wi liv.”​—Galayshanz 6:5

•   Tink bowt dis: Yoo yoozhwali get da yu apointment dehn pahn taim, yoo yoozhwali du aala di werk weh yu payrents aks yu fi du rong yu hows, ahn yu yoozhwali obay di roolz weh yu payrents set​—eevn di wan dehn weh yu noh laik?

 Bee payshent. If yu looz yu payrents chros, ih wahn tek taim fi mek dehn chros yu agen. Bee wilin fi wayt.

 “Ai mi foschraytid wen mi payrents neva waahn giv mi moa rispansabiliti wen Ah mi reech wahn sertn ayj. Ah neva riyalaiz dat fi groa op ahn fi geh oalda da too difrent ting. Ah mi aks mi payrents fi giv mi di apachooniti fi proov miself. Ih mek tek sohn taim, bot ih mi werk. An Ah mi laan dat da noh mi ayj wahn mek dehn chros mi. Da weh Ah du, dat da weh wahn mek dehn chros mi.”​—Rachel.

 Di Baibl seh: “Tes owt unuself.”​—2 Korintyanz 13:5.

•   Tink bowt dis: Wat da sohn tingz weh yoo ku du fi “tes owt” yuself ahn fi proov tu yu payrents dat dehn ku chros yu (er dat dehn ku chros yu agen)?

 TIP: Set wahn goal, weda da fi aalwayz reech weh yu gwehn pahn taim, er fi du aala di werk weh yu payrents gi yu fi du rong di hows, er fi reech hoam wen yu payrents aks yu fi reech hoam, er du eniting els. Tel yu payrents bowt di goal weh yu set, an aks dehn weh dehn wuda waahn yu du soh dat dehn ku chros yu. Den werk haad fi fala di kongsl fahn di Baibl: “Giv op unu oal way a livin, weh mek unu du dehn bad tingz weh unu yoostu du.” (Ifeezhanz 4:​22) Az taim goh bai, yu payrents wahn si yu proagres!