KWESCHANZ WEH YONG PEEPL AKS
Wai Ai fi Mek Pees Wid Mi Breda ahn Sista Dehn?
“Di wos bes frenz”
Yu praabli kaal yu breda er sista dehn “di wos bes frenz yu eva gat.” Yu lov dehn, ahn dehn lov yoo tu—bot sohntaim unu jos kyaahn get lang. Wahn 18-yaa-oal weh naym Helena seh: “Mi yonga breda laik bada mi. Hihn noa egzakli weh fi seh er du fi get pahn mi nervz!”
Som a di prablemz weh som chiljren ga ku geh solv wans dehn kamyoonikayt ahn chrai fi andastan wan anada. Fi egzampl:
Too breda weh shayr wahn room mait fait oava praivasi. Weh dehn fi du? Laan fi andastan wan anada ahn giv eech ada di spays weh dehn need. Aplai di Baibl prinsipl weh deh da Look 6:31.
Too sistaz mait “baro” eech ada kloaz ahn tingz widowt aks. Weh dehn fi du? Taak bowt it ahn set limits weh reeznabl. Aplai di Baibl prinsipl da 2 Timoti 2:24.
Somtaimz di prablemz bitween chiljren eena di famili soh seeryos dat dehn ku get eena lata chrobl. Kansida too egzamplz fahn eena di Baibl:
Miryam an Ayron mi geh jelos a dehn breda, Moaziz, ahn dat neva en gud. Reed di akonk da Numbers 12:1-15. Den aks yuself: ‘Weh Ai kud du fi noh geh jelos a mi breda er sista?’
Kayn mi get soh beks dat ih mi en op di kil ih breda Aybl. Reed di akonk da Genesis 4:1-12. Den aks yuself: ‘How Ai ku kanchroal mai anga wen Ai di deel wid mai breda er sista?
Too reezn wai yu fi mek pees
Noh mata how haad ih haad fi get lang wid yu breda ahn sista dehn, dehn ga at lees too reezn wai ih wert it.
Ih shoa dat yu machoar. Wahn yong man weh naym Alex seh: “Ai yoostu geh beks bad wid mai too yonga sista dehn. Now Ai moch moa kaam ahn payshent wid dehn. Yu ku seh dat Ai groa op.”
Di Baibl seh: “Di wan weh sloa tu anga ga gud andastandin, bot di wan weh haysti shoa dat ih foolish.”—Proverbs 14:29.
Da gud chraynin fi di fyoocha. If yu kyaahn deel wid di imperfekshan a yu breda ahn sista dehn, how yu wahn bee aybl fi deel wid yu marij mayt, wahn werkmayt, er enibadi els weh yu heng rong wid?
Fak: Yu rilayshanship eena di fyoocha wahn ga sokses if yu kamyoonikayt ahn chrai fi andastan wan anada, ahn di bes plays yu ku laan fi du dat da eena yu famili.
Di Baibl seh: “Unu mos du evriting weh unu noa fi du soh dat unu ku liv peesabl.”—Roamanz 12:18.
Yoo wuda waahn help fi solv yu prablemz wid yu breda er sista? Reed “Weh Ada Yong Peepl Di Seh,” ahn den chek owt di werksheet, “Getting Along With Siblings.”
