“Sodn-wan Ah wuda staat tu tink bowt seks ahn den Ah kyaahn tink bowt eniting els. Da laik if sombadi di kanchroal mi taats.”—Vera.

 “Ah feel laik ih impasabl fi mek Ah tek mi main aafa seks. Ih wuda bee eeziya fi mek Ah staat tu flap mi han ahn hoap dat Ah flai.”—Jan.

 Yoo ga simila feelinz laik Vera er Jan? If soh, dis aatikl ku help yu.

•  Wai wi noh fi kip di tink bowt seks?

•  Wai ih haad fi stap tink bowt seks?

•  Weh yu ku du

•  Weh ada yong peepl di seh

 Alex seh: “Mai onkl mi tel mi dat Gaad neva mi wahn gi mi di dizaiya fi seks if hihn neva waahn Ah satisfai da dizaiya.”

 Paat a weh Alex onkl mi seh da chroo—Gaad did gi wi sekshwal dizaiyaz, ahn dehn ga wahn gud reezn wai. If hyoomanz neva ga sekshwal dizaiyaz den hyoomanz noh mi wahn egzis tudeh. Soh wai yu noh fi kip di tink bowt seks? Fi too gud reezn:

•   Di Baibl teech dat Gaad wil da dat seks fi onli bee bitween wahn man ahn wahn uman weh marid tu eech ada.—Genesis 1:28; 2:24.

   If yu rispek Gaad moaral standadz ahn yu singl, ahn yu kip di tink bowt seks den yu wahn geh foschraytid bikaaz yu kyaahn satisfai yu dizaiya. If yu kip di tink bowt seks, yu mait giv intu di dizaiya ahn komit imoraliti. Wahn lata peepl weh du dis, layta wish dat dehn neva du it.

•   If yu laan fi kanchroal yu taats bowt seks ih wahn help yu fi laan fi ga self-kanchroal, weh wahn help yu eena lata difrent ayrya eena yu laif.—1 Korintyanz 9:25.

 Self-kanchroal wahn help yu fi ga wahn hapiya laif now an eena di fyoocha. Az a mata a fak, wahn risaach shoa dat ih les laikli fi chiljren weh ga self-kanchroal fi ga seeryos helt prablemz, fi wori bowt moni, ahn fi ga prablemz wid di polees wen dehn groa op. a

 Peepl rong wi aalwayz di tink ahn taak bowt seks, ahn wen yu yong yu harmoanz aalso staat tu bada yu an ih ku mek it haad fi noh tink bowt seks.

 “Ih seemz laik evri TV shoa mek ih luk laik fi ga seks wid sombadi weh yu noh marid tu da sohnting gud ahn dat dehn noh ga no bad rizolt. Ih eezi fi foakos pahn dehnya rang dizaiya wen yu noh si di bad rizolts weh seks owtsaida marij ku ga.”—Root.

 “Da werk, Ai hyaa wahn lata doti taak bowt seks, an ih mek Ah waahn noa moa. Peepl mek seks owtsaida marij luk soh naamal dat ih mek it haad fi see’t az sohnting rang.”—Nicole.

 “Ih eezi fi let yu gyaad dong wen yu di luk chroo pichaz pahn soashal meedya. Jos wan luk pahn wahn sekshwal imij ku bee di haadis ting fi ferget!”—Maria.

 Bikaaz a dat, yu mait feel laik how di apasl Paal mi feel. Hihn mi rait: “Wen Ah waahn du rait, eevl deh wid mi.”—Roamanz 7:21.

 Mek yu main tink bowt ada tingz. Chrai fi foakos pahn sohnting ada dan seks. Dis ku bee spoats, eksasaiz, er eniting els weh inchres yoo. Valerie seh: “Ih help fi reed di Baibl. Ih gat een infamayshan bowt Gaad, ahn wen yu di tink bowt Gaad, ih haada fi tink bowt seks er eniting els.”

 Ih naamal fi tink bowt seks. Bot ih op tu yoo fi disaid weh yu wahn du wid dehndeh taats. Wen yu staat tu tink bowt seks, yu ga di powa fi geh rid a dehndeh taats. Bot da yoo haftu mek di chois.

 “Wen Ai staat tu tink bowt seks, Ai foas miself fi tink bowt sohnting els. Ah aalso chrai fi figa owt weh mek Ah mi staat tu tink bowt seks—weda da wahn sang er wahn picha weh Ah need fi dileet.”—Helena.

 Baibl prinsipl: “Eniting weh rait, eniting weh kleen, . . . eniting weh gud fi unu admaiya . . . dehndeh da di kaina ting weh unu mos aalwayz di tink bowt.”—Filipiyanz 4:8.

 Chooz gud frenz. If yu frenz aalwayz di taak bowt seks, ih wahn bee haad fi mek yu noh tink bowt seks.

 “Wen Ah da-mi wahn teenayja, ih mi haad fi mek Ah noh tink bowt rang tingz, ahn di peepl weh Ah doz heng owt wid mi mek it haad fi mi. Wen yu deh wid peepl weh inkorij rang dizaiyaz, ih kaaz yu fi foakos pahn yu feelinz, ahn da rang dizaiya geh eevn schranga.”—Sarah.

 Baibl prinsipl: “Di persn weh di waak wid waiz peepl wahn geh waiz, bot tingz noh gwehn gud fi wahn persn weh ga deelinz wid peepl weh noh ga no sens.”—Proverbs 13:20.

 Kip weh fahn entataynment weh noh kleen. Evribadi noa dat moas a di entataynment weh deh tudeh promoat seks. Nicole seh: “Myoozik da wan Ah di bigis ting weh afek mee. Ih ku mek mi dizaiyaz soh schrang dat ih seemz laik tu moch fi bayr.”

 “Ai mi staat tu wach moovi ahn TV shoa weh gat een sekshwal tingz. Ah nat eevn mi riyalaiz how ih mi-di afek mi, bot Ah mi-di staat tu tink bowt seks wahn lat. Ih mi eezi fi figa owt wai Ah mi-di ga dehndeh taats. Az soon az Ah mi stap wach dehndeh taip a moovi ahn TV shoa, Ah neva tink soh moch bowt seks agen. Ih moch eeziya fi avoid rang taats wen Ah chooz mi entataynment kyaafuli.”—Joanne.

 Baibl prinsipl: “Unu noh fi sleep rong, er liv eni kaina loos laif, er greedi fi eniting. Dehndeh kaina laif shudn ga no plays monks Gaad peepl.”—Ifeezhanz 5:3.

 Ih bail dong tu dis: Sohn peepl tink dat dehn sekshwal dizaiyaz soh impoatant dat dehn noh fi chrai kanchroal it, ahn dat dehn kyaahn kanchroal it eevn if dehn chrai. Bot di Baibl tel wi sohnting difrent. Di Baibl teech wi dat wee ku kanchroal weh wi tink bowt, soh dis proov dat weh wi du veri impoatant tu Gaad.

 Baibl prinsipl: “Mek Gaad Spirit chaynj unu haat ahn di way unu tink.”—Ifeezhanz 4:23.