Weh yoo wuda du eena dehnya sichuwayshan?

1.   Yu teecha skoal yu bikaaz yu noh bihayv eena klaas.

    Yu tink yu shuda tel yu teecha sari—eevn if yu tink dat hihn geh beks fi no reezn?

2.   Yu fren fain owt dat yu seh sohnting bad bowt ahn.

    Yu tink yu shuda tel yu fren sari—eevn doa yoo tink dat weh yu seh da chroo?

3.   Yu geh beks wid yu pa ahn yu seh sohnting weh yu neva mi fi seh.

    Yu tink yu shuda tel yu pa sari—eevn if yu tink dat da fi hihn faalt dat yu geh beks?

 Di ansa tu dehndeh kweschan da yes. Bot wai ih impoatant fi seh “Sari” eevn if yu tink dat yu neva deh eena di rang?

•  Wai yu fi seh sari?

•  How fi seh “Sari”

•  Weh ada yong peepl di seh

•   Yu shoa dat yu machoar wen yu seh sari. Wen yu oan op tu sohnting weh yu mi seh er du, dat wahn help yu fi ga impoatant kwalitiz weh nesiseri fi wen yu geh oalda.

   “Wen wi hombl ahn payshent, ih wahn eeziya fi seh sari ahn fi lisn tu weh di ada persn ga fi seh.”—Rachel.

•   Yu mek pees wid adaz wen yu seh sari. Peepl weh seh “Sari” shoa dat di moas impoatant ting tu dehn da fi mek pees. Dehn noh wori bowt weda dehn rait er di ada persn rang.

   “Eevn if yoo tink dat yoo noh deh eena di rang, di moas impoatant ting da fi mek pees. Ahn da smaal lee werd ku sayv wahn frenship.”—Miriam.

•   Yu feel beta wen yu seh sari. If yoo noa dat sohnting weh yu seh er du mi hert sohnbadi, dat ku mek yu feel reeli bad. Bot wans yu seh sari, yu feel moch beta. a

   “Sohntaim Ah mi seh sohn meen ting tu mi ma er pa. Ah mi feel reeli bad, bot ih mi haad fi seh sari. Bot wen Ah mi seh sari, Ah mi feel beta bikaaz dat mi help wi famili fi ga pees agen.”—Nia.

 Ih eezi fi seh sari? No way! Wahn yong uman weh naym Dena mi haftu seh sari moa dahn wan taim sayka weh ih disrispek ih ma. Shee seh: “Ih reeli noh eezi fi seh sari. Ahn wen da taim fi seh sari ih feel laik sohnting deh eena mi chroat ahn da laik di werd jos kyaahn kom owt!”

•   If pasabl, goh op tu di persn ahn seh sari. Wen wi goh op tu wahn persn ahn tel dehn sari, ih shoa da persn dat wi reeli meen it. Bot if yu teks wahn persn fi seh sari, ih mait noh bileev yu. An eevn doa yu mait sen di teks wid wahn sad-fays imoaji, dat ku mek ih luk laik yu noh eevn kay bowt how yu mi mek da persn feel er dat ih noh di kohn fahn yu haat.

   Tip: If ih noh pasabl fi goh op tu di persn ahn seh sari, maybi yu ku kaal ahn er rait ahn wahn leta. Bot noh mata weh yu chooz fi du, tek di taim fi plan owt weh yu wahn seh soh dat yu noh mek tingz wers.

   Baibl prinsipl: “Di haat a di raichos wan meditayt bifoa ih ansa.”—Proverbs 15:28.

•   Seh sari rait away. If yu tek tu lang fi seh sari, di prablem wahn geh eevn moa seeryos an ih wahn haada fi deh rong di persn weh yu hert.

   Tip: Set wahn goal—fi egzampl, ‘Tudeh Ah wahn seh sari.’ Disaid wen yu wahn seh sari ahn den du it.

   Baibl prinsipl: “Setl unu [prablem] kwik-wan.”—Machyu 5:25.

•   Seh sari ahn meen it. Yu noh reeli di seh sari if yu tel di persn “sari yu feel da way.” Wahn yong uman weh naym Janelle seh, “Di persn weh yu mi hert wahn rispek yu if ih si dat yu oan op tu weh yu mi du.”

   Tip: Wen yu seh sari, noh ekspek notn bak fahn di ada persn. Soh noh seh: “Ah wahn seh sari fi weh Ai du if yoo seh sari fi weh yoo du.”

   Baibl prinsipl: “Wi mos aalwayz chrai ahn du dehn ting weh wahn bring pees.”—Roamanz 14:19.