Wi hapi dat yu waahn ripoat bowt di werk weh Jehoava Witnisiz du ahn wi waahn tank yu fi dat. Dis payj wahn help yu noa how fi yooz ahn spel difrent werdz ahn frayz weh wi aaganaizayshan yooz. An if sohnting stil noh klyaa fi yu, feel free fi kantak di branch aafis a Jehoava Witnisiz.

asembli. Goh tu:  serkit asembli.

Asembli Haal a Jehoava Witnisiz. Wahn bildin weh Jehoava Witnisiz oan weh ku hoal wahn lata peepl. Rait ya, kangrigayshanz fahn wahn spesifik ayrya kohn tugeda fi ga biga meetinz fi wership Jehoava. Fi shaat yu ku kaal it wahn “Asembli Haal.”

Awayk! Wahn magazeen weh Jehoava Witnisiz poblish ahn shayr wid peepl. Dis magazeen staat geh poblish eena 1919 az  The Golden Age. Eena 1937 di naym geh chaynj tu Consolation. Ahn den eena Aagas 22, 1946 di naym mi chaynj tu  Awake! Dis naym (eena Bileez Kriol, Awayk!) mi geh pik fi help peepl kip pahn di lukowt fi weh di hapm eena di werl. Dis magazeen da wan a di moas eezi fi fain magazeen aal oava di werl.

Betel, Betelait, Betel famili. “Betel” da wahn Heebroo naym weh meen “Hows a Gaad.” Dis da di naym fi aala di bildin dehn weh Jehoava Witnisiz yooz fi sopoat spirichwal aktivitiz eena difrent konchriz er ayryaz. Wi kaal Witnisiz weh serv da dehnya bildin wahn “Betelait.” Dehnya Witnisiz noh geh pay fi weh dehn du. Bikaaz aala dehn wership Gaad tugeda, liv tugeda, ahn werk tugeda dehn mek op wahn big faamli weh wi kaal di “Betel famili.” Di taitl “Beteliat” da noh wahn speshal taitl fi big dehn op er gi dehn prayz fi weh dehn du.

brada. Wahn man weh baptaiz az wan a Jehoava Witnisiz. If yu jos di yooz di werd ‘brada’ bai ihself eena yu ripoat noh kapitalaiz it. Bot if yu di yooz it wid di persn laas naym, pleez kapitalaiz di too werdz (e.g., Brada Smith). Di taitl brada da noh wahn speshal taitl fi big dehn op er gi dehn prayz. Dehnya saym tingz goh fi wahn laydi hoo da wahn Witnis (e.g., Sista Smith).—1 Peeta 5:9.

branch aafis. Dis da di loakal hedkwaataz fi di Branch Komiti weh sopoat ahn soopavaiz di werk weh Jehoava Witnisiz du eena di konchri er konchriz dehn rispansabl fa. Fi shaat wi kaal it “branch.”

Branch Komiti. Da eech branch aafis dehn ga wahn Branch Komiti. Dis komiti mek op a chree er moa eldaz. Dehnya bradaz geh apointid fi soopavaiz di werk fi di konchri er konchriz weh deh anda da branch.

Di Baibl—Nyoo Werl Chranslayshan. Dis gat een di Heebroo Skripchaz (“Oal Testiment”) ahn di Greek Skripchaz (“Nyoo Testiment”) weh Jehoava Witnisiz chranslayt ahn poblish. Wahn nada way yu ku kaal it da Nyoo Werl Chranslayshan.

Di Wachtowa di Magazeen Weh Anonks di Kingdom a Jehoava. Dis da di ful naym a di mayn magazeen weh Jehoava Witnisiz poblish. Fi shaat wi kaal it Di Wachtowa. Di naym a di magazeen help wi fi si how Gaad perpos di kohn chroo. (Machyu 24:42) Jehoava Witnisiz shayr di poblik kapi a Di Wachtowa wid enibadi weh inchrestid ahn nobadi haftu pay fi get it. Kangrigayshanz rong di werl yooz di stodi kapi a Di Wachtowa evri week fi diskos wan aatikl eena da magazeen. Fahn sins 1879 Di Wachtowa stil di geh poblish. Dis magazeen da wan a di moas eezi fi fain magazeen aal oava di werl.

elda. Wan a Jehoava Witnisiz weh da wahn spirichwali machoar man weh geh apointid fi teech ahn tek kyaa a evribadi eena di kangrigayshan. Eldaz fi kantinyu meet di kwalifikayshanz weh deh eena di Baibl da 1 Timoti 3:1-7; Taitos 1:5-9; Jaymz 3:17, 18; ahn 1 Peeta 5:2. Nobadi pay di eldaz fi weh dehn du. Moas eldaz werk fi tek kyaa a dehn faamli. Eevn doa di eldaz ga moa rispansabiliti eena di kangrigayshan, dis noh mek dehn no difrent fahn enibadi els eena di kangrigayshan. Di werd elda da noh wahn speshal taitl fi big op di eldaz er gi dehn prayz fi weh dehn du.

 feel servis. Dis da weh wahn Witnis du eena ih servis tu Jehoava Gaad. Wen ih du dis ih fala Jeezas koman fi shayr di “gud nyooz bowt di Kingdom” tu peepl “aal oava di ert soh dat aala di nayshan dehn ku noa bowt it.”—Machyu 24:14; 28:19.

Gilyad, Gilyad Skool. Dehnya da di shaata naym fi di Wachtowa Baibl Skool a Gilyad. Di skool mi staat eena 1943 fi chrayn mishineriz. Jehoava Witnisiz weh geh invaitid fi goh da dis skool goh chroo wahn Baibl koars fi faiv monts. If yu yooz di werd “skool” bai ihself ih fi bee eena smaal letaz.

Govanin Badi a Jehoava Witnisiz. Wahn smaal groop a eldaz weh apointid fi tek kyaa a di spirichwal needz fi Jehoava Witnisiz rong di werl. Sohntaim fi shaat wi kaal dehn “Govanin Badi.” Dehnya bradaz play wahn big paat di pripyaa poblikayshanz weh bays pahn di Baibl. Eevn doa dehn soopavaiz di spirichwal werk weh Jehoava Witnisiz du rong di werl, dehn stil si Jeezas Krais az di Leeda a Jehoava Witnisiz. Aala di aafis dehn fi di Govanin Badi deh da di Werl Hedkwaataz a Jehoava Witnisiz da Warwick, New York, U.S.A.

 intanashanal kanvenshan. Dis da wahn meetin wi ga evri kopl a yaaz fi chree dayz. Da dehnya kanvenshan ih help wi fi wership Jehoava an ih shoa wi how di Baibl ku help wi eena wi laif. Jehoava Witnisiz araynj dis proagram fahn staat tu finish. Soh lang heda taim, wi wuda fain difrent sitiz rong di werl fi ga dis kanvenshan. Jehoava Witnisiz fahn rong di werl geh invaitid fi kohn da dehnya intanashanal kanvenshan. Dehnya kanvenshan oapm tu di poblik ahn da fi inkorij evribadi fi bee Gaad fren ahn fi mek Jehoava Witnisiz fahn rong di werl feel moa yoonaitid. Wi naamali wuda rent wahn plays fi di intanashanal kanvenshan. Di proagram da fahn Fraideh chroo Sondeh. Wi noh chaaj fi goh een ahn wi noh tek op kalekshan.

Jeezas Krais. Da Gaad onli Son. (Jan 3:16) Fi Jehoava Witnisiz, Jeezas Krais da dehn Leeda. Wi werk haad fi fala fi hihn egzampl ahn fi praktis weh hihn mi teech. Jehoava Witnisiz bileev no ada man da-mi laik Jeezas an owta aala di Witnisiz weh eva deh, Jeezas da di moas impoatant wan. Ahn hihn da di wan weh Jehoava yooz if sayv peepl.—Isaiah 9:6, 7; Revilayshan 1:5.

Jehoava. Di Baibl tel wi dat dis da di naym a di almaiti Gaad, di wan weh mek evriting. (Saamz 83:18) If wi di taak bowt wan a Jehoava Witnisiz wi noh kaal dehn “Jehoava” (e.g., “da Jehoava”) bikaaz Jehoava da Gaad naym.

 Jehoava Witnisiz. Wahn groop a Kristyanz weh wership Jehoava Gaad. Wi teech peepl di chroot bowt di Baibl eena difrent wayz. Ahn wen wi teech peepl bowt di Baibl, wi goal da fi shayr di gud nyooz bowt Gaad Kingdom er govament wid dehn. (Machyu 24:14) Dis naym mek wi difrent fan ada rilijan bikaaz ih shoa peepl di Gaad wi wership an ih hailait di werk wi du eena ih naym. Fi bee wan a Jehoava Witnisiz, wahn persn need fi ga wahn gud andastandin a baysik Baibl teechin, don kwalifai fi preech, an ih don dedikayt ih laif tu Jehoava ahn geh baptaiz. Di fers taim yu di rifaa tu Jehoava Witnisiz eena wahn aatikl az wahn groop pleez yooz di kompleet naym, “Jehoava Witnisiz.” Wahn nada way yu ku kaal wi da “di Witnisiz.” Pahn di ada han, if yu di foakos pahn wan persn, pleez yooz “wahn Witnis” er “wan a Jehoava Witnisiz”. Ih wuda bee rang fi rifaa tu wan persn az “Jehoava Witnis.”—Isaiah 43:10.

kangrigayshan. Wahn groop a Witnisiz weh kohn tugeda fi wership. Eena eech kangrigayshan dehn ga wahn badi a eldaz. Dehnya eldaz yooz di Baibl fi teech ahn help gaid evribadi eena di kangrigayshan. Enibadi ku kohn da di kangrigayshan meetinz. Wi noh chaaj fi goh een ahn wi noh tek op kalekshan.

kanvenshan. Goh tu:  intanashanal kanvenshan ahn  reejinal kanvenshan.

Kingdom Haal a Jehoava Witnisiz. Dis da wahn bildin weh wan er moa kangrigayshanz meet fi wership. Wi naamali kaal it “Kingdom Haal.” Pleez no yooz di werd “cherch” wen yu di rifaa tu di bildin.

Memoaryal a Krais det. Evri yaa wi selibrayt di aniversri a Jeezas Krais det. Wi aalso kaal it di Laad Eevnin Meel, di Laas Sopa, di Memoaryal, er di Memoaryal a Jeezas det. Fi Jehoava Witnisiz dis da di moas impoatant selibrayshan fi wi evri yaa ahn da di onli selibrayshan weh Jeezas mi tel ih falowaz fi du.—Look 22:19, 20.

midweek meetin. Dis da wahn kangrigayshan meetin weh wi ga evri week ahn weh naamali hapm eena di nait pahn wahn week day. Dis meetin naym Wi Kristyan Laif ahn Minischri, an ih ga chree paats. Di goal a dis meetin da fi help wi bee beta teechaz a di Baibl ahn fi liv wahn beta laif. Laik aala di meetinz weh Jehoava Witnisiz gat, wi noh chaaj fi goh een ahn wi noh tek op kalekshan. Yu ku kohn in-persn er wach dis meetin oava di Intanet.

ministeeryal servant. Wan a Jehoava Witnisiz weh da wahn spirichwali machoar man. Hihn help di eldaz tek kyaa a di kangrigayshan. Ministeeryal servant fi kantinyu meet di kwalifikayshanz weh deh eena di Baibl da 1 Timoti 3:8-10, 12, 13 ahn Taitos 2:6-8. Wahn ministeeryal servant help wid difrent asainments eena di kangrigayshan. Nobadi pay di ministeeryal servants fi weh dehn du. Moas a di ministeeryal servants werk fi tek kyaa a dehn faamli. Afta wahn wail wahn ministeeryal servant ku kwalifai fi bee wahn elda. Di werd ministeeryal servant da noh wahn speshal taitl fi big dehn op er gi dehn prayz fi weh dehn du.

mishineri. Wahn Witnis weh di Govanin Badi a Jehoava Witnisiz asain fi goh preech eena difrent paats a di werl. Dehnya mishineriz moa dan hapi fi lef dehn hows ahn fi goh liv da wahn nada konchri fi shayr di gud nyooz bowt di Kingdom.—Machyu 24:14.

painyaa. Wahn Witnis weh preech fi wahn spesifik nomba a owaz. Moas a di taim di werd painyaa di rifaa tu wahn “regyula painyaa” weh preech fi siks honjrid owaz fi di yaa (50 owaz eech mont). Sohntaim di werd painyaa ku di rifaa tu wahn “agzilari painyaa” weh preech 15 er 30 owaz a mont er moa if ih kud. Nobadi pay painyaaz fi weh dehn du. Moas a di painyaaz werk fi tek kyaa a dehn faamli. Di werd painyaa da noh wahn speshal taitl fi big op dehn op er gi dehn prayz fi weh dehn du.

Poblik Meetin. Dis da wahn kangrigayshan meetin weh wi gat evri week ahn weh naamali deh pahn di weeken. Dis meetin ga too paats. Di fers paat da wahn taak weh da maynli fi di poblik ahn weh laas fi 30 minits. Di neks paat da di Wachtowa Stodi, dis da wahn poblikayshan weh diskos Baibl tapiks. Di Wachtowa gat een moa dan wan aatikl. Soh evri week wi wuda diskos wan aatikl fi wan owa. Laik aala di meetinz weh Jehoava Witnisiz gat, wi noh chaaj fi goh een ahn wi noh tek op kalekshan. Yu ku kohn in-persn er wach dis meetin oava di Intanet.

poblisha. Dis da wahn persn weh goh owt ahn preech ahn da paat a wahn kangrigayshan a Jehoava Witnisiz. Fi bee wahn poblisha wahn persn need fi andastan baysik Baibl teechinz ahn di liv wahn laif weh mach di standadz eena di Baibl. Nobadi pay poblishaz fi weh dehn du. Di werd poblisha da noh wahn speshal taitl fi big op dehn op er gi dehn prayz fi weh dehn du.

preech. Goh tu:  feel servis.

 reejinal kanvenshan. Difrent kangrigayshanz a Jehoava Witnisiz fahn wahn spesifik ayrya meet fi chree dayz evri yaa. Dehnya kanvenshan inkorij evribadi fi bee Gaad fren ahn dehn oapm tu di poblik. Yu laan how di Baibl ku help yu eena yu laif noh mata how oal yu. Joorin dis meetin dehn wuda ak owt tingz weh hapm eena wi evriday laif ahn difrent Baibl akonks fi shoa wi how fi yooz di Baibl eena wi laif. Naamali, wi wuda rent wahn plays fi di kanvenshan. Bot if wahn Asembli Haal a Jehoava Witnisiz avaylabl an ih ga inof spays den wi wuda gat it deh. Di proagram da fahn Fraideh chroo Sondeh. Aalso, wi ku wach wahn rikaadn a di hoal proagram tu. Laik aala di meetinz weh Jehoava Witnisiz gat, wi noh chaaj fi goh een ahn wi noh tek op kalekshan.

serkit. Wahn groop a kangrigayshanz a Jehoava Witnisiz eena wahn spesifik ayrya mek op wahn serkit.

 serkit asembli. Dis da wen too taimz eena di yaa difrent kangrigayshanz a Jehoava Witnisiz meet tugeda fi wahn day. Dehnya asembli wuda naamali hapm oava di weeken an ih oapm tu di poblik. Di goal da dehnya asembli da fi help evribadi bee Gaad fren. Yu laan how di Baibl ku help yu eena yu laif noh mata how oal yu. Joorin dis meetin dehn wuda ak owt tingz weh hapm eena wi evriday laif fi shoa wi how wi ku yooz di Baibl eena wi laif. Moas a di taim wi ga dis meetin da wahn Asembli Haal a Jehoava Witnisiz. Er wi wuda rent wahn plays er wach di proagram oava di Intanet. Wi noh chaaj fi goh een ahn wi noh tek op kalekshan.

serkit oavaseeya. Wahn elda weh ga lata ekspeeryens hoo geh dairekshan bowt ih asainment fahn di branch aafis. If ih marid, ih waif wuda goh lang wid ahn fi vizit eech kangrigayshan eena wahn serkit too taimz a yaa. Wen ih vizit di bradaz ahn sistaz eena wahn kangrigayshan ih inkorij dehn. Pahn tap a dat, ih inkorij ahn giv inschrokshan tu di eldaz ahn di ministeeryal servants. Bifoa di serkit oavaseeya vizit eech kangrigayshan ih wuda tink bowt weh di kangrigayshan need. Di taitl serkit oavaseeya da noh wahn speshal taitl fi big ahn op er giv ahn prayz fi weh ih du.

sista. Wahn laydi weh baptaiz az wan a Jehoava Witnisiz. If yu jos di yooz di werd ‘sista’ bai ihself eena yu ripoat noh kapitalaiz it. Bot if yu di yooz it wid di persn laas naym, pleez kapitalaiz di too werdz (e.g., Sista Smith). Di taitl sista da noh wahn speshal taitl fi big dehn op er gi dehn prayz. Dehnya saym tingz goh fi wahn man hoo da wahn Witnis (e.g., Brada Smith).

NOAT: Di fers taim yu rifaa tu Jehoava Witnisiz eena yu ripoat pleez yooz di kompleet naym. If yu wahn noa moa, goh tu:  Jehoava Witnisiz.