DI BAIBL CHAYNJ PEEPL LAIF
“Ah En Op Di Liv Pahn di Schreet”
Baan Eena: 1955
Konchri Weh Ih Kohn Fram: Spain
Laif Hischri: Jrogz ahn Alkahol Abyoos, Vailens
MI LAIF EENA DI PAAS
Som peepl tek lang fi laan di haad way eena laif. Ai da-mi sombadi laik dat. Ah baan ahn rayz da Barcelona, di sekant bigis siti da Spain. Mai famili mi liv eena wahn ayrya weh dehn kaal Somorrostro, wahn big sekshan a di siti lang di seesaid. Evribadi mi noa Somorrostro az wahn plays ful a kraim wehpaa dehn deel jrogz.
Mai ma ahn pa mi ga nain pikni, an Ai da-mi di oaldis wan. Bikaaz wi mi soh poa, mi pa sen mi fi goh werk da wahn tenis klob fi pik op baal fi di rich peepl dehn. Ai mi jos ten yaaz oal an Ah yoostu werk ten owaz evri day. Bikaaz a dat, Ah kudn gaan da skool laik ada pikni. Wen Ah mi jos 14, Ah staat tu werk eena wahn metal werkshap.
Eena 1975, Ah jain di Spanish Foreign Legion da Naat Africa ahn put aan dehn faymos yoonifaam
Eena 1975, dehn kaal mi op fi jain di militeri, kaaz dat da di laa da Spain. Ah mi waahn du sohnting wid mi laif weh wuda kaal fi lata korij, soh Ah valantyaa fi jain di Spanish Foreign Legion da Melilla, wahn Spanish kamyooniti da Naat Africa. Joorin da taim, Ah staat tu jrink ahn tek jrogz hevi.
Wen Ah lef di Legion, Ah gaahn bak da Barcelona ahn staat wahn gang. Wi yoostu teef eniting wi kuda put wi han pan. Den, wi wuda sel weh wi teef soh dat wi kuda bai jrogz. Ah staat tek LSD an ada jrogz weh get yu haip op, an Ah staat tu liv wahn laif ful a seks, alkahol, ahn vailens. Dis kaina laifstail mi mek Ah geh moa ahn moa vailent. Ah yoostu aalwayz bak wahn naif, wahn aks, er wahn masheet, an Ah neva frayd fi yooz dehn ataal!
Wahn taim, mee ahn mi gang mi teef wahn kaar ahn polees mi-di chays wi. Da mi jos laik sohnting owta wahn moovi. Wi mi jraiv di kaar fi bowt 20 mailz, til di polees staat tu shoot aata wi. Den, wi jraiva krash di kaar an aala wi ron weh. Wen mi pa fain owt, ih chays mi owta ih hows, bot Ah kyaahn blaym ahn fi dat.
Fi di neks faiv yaaz, Ah en op di liv pahn di schreet. Ah yoostu sleep eniway, fronta peepl bizniz, eena peepl kaar, pahn paak bench, an eevn eena bering grong. Fi wahn lee wail Ah mi eevn liv eena wahn kayv. Mai laif neva ga no meenin ataal, an Ai neva kay if Ah mi liv er ded. Wen Ah mi deh pahn jrogz Ah yoostu kot op mi ris er mi han. Ah stil ga di skaar dehn op tu tudeh day.
HOW DI BAIBL CHAYNJ MI LAIF
Wen Ah mi 28 yaaz oal, mi ma kohn luk fi mi fi tel mi kohn hoam. Ah tel ahn Ah mi wahn kohn hoam an Ah pramis fi schraytn owt mi laif, bot Ah mi tek lang fi kip datdeh pramis.
Wahn aftanoon, too a Jehoava Witnisiz kohn da wi doa. Az Ah mi-di lisn tu dehn, mi pa hala fahn eena di hows mek Ah slam di doa pahn dehn. Bikaaz Ah neva laik lisn, Ah neva du weh ih tel mi fi du. Dehn aafa mi chree smaal buk an Ah tek dehn. Ah aks dehn wehpaa dehn ga meetin, ahn wahn fyoo dayz layta, Ah shoa op da di Kingdom Haal.
Di fos ting weh Ah mi noatis da-mi how neet evribadi mi jres. Ah mi luk soh difrent wid mi lang hyaa, mi byaadz, ahn mi doti kloaz. Ah neva feel laik Ah mi fit een ataal, soh Ah mi stay owtsaid. Bot sodn-wan Ah geh wahn sopraiz! Ah si wahn bwai naym Juan weh yoostu deh eena wi gang, an ih mi jres op eena wahn soot. Laytaraan Ah fain owt dat hihn mi baptaiz az wan a Jehoava Witnisiz wan yaa bifoa. Bikaaz Ah si hihn, Ah geh di kanfidens fi gaan eensaid. Da rait deh evriting staat chaynj fi mee.
Ah aksep wahn Baibl stodi, ahn soon Ah kanshos dat fi pleez Gaad Ah mi wahn haftu chaynj mi wayz ahn mi laifstail. Dat neva eezi! Ah mi laan dat if Ah waahn pleez Jehoava Gaad, Ah wuda haftu ‘mek Gaad chaynj di way Ah tink soh dat evriting weh Ah du wuda chaynj.’ (Roamanz 12:2) Di mersi weh Gaad shoa mi reeli toch mi haat. Ah mi feel laik Gaad mi-di gi mi wahn chaans fi staat oava nyoo, eevn doa Ah mi du wahn lata rang eena mi laif. Di tingz weh Ah mi laan bowt Jehoava Gaad mi reeli sink dong eena mi haat. Ah kuda mi si dat mi Kriyayta reeli kay bowt mi.—1 Peeta 5:6, 7.
Soh den, Ah staat mek chaynjiz. Fi egzampl, wen wi mi-di stodi bowt di tapik a tubaako, Ah tel miself, ‘If Jehoava Gaad waahn mek Ah stay kleen eena evri way, den dehnya sigaret haftu goh!’ (2 Korintyanz 7:1) Ahn soh Ah dash aala dehn eena di dert baks!
Ah mi need fi stap yooz ahn sel jrogz tu. Dat mi tek lee bit moa taim ahn haad werk. Fi du it, Ah noa Ah mi need fi stap heng rong wid aala mi oal frenz. Dehn neva mi-di help mi fi mek proagres ataal. Soon, Ah laan fi pen moa pahn Gaad ahn mi nyoo frenz eena di kangrigayshan. Fi dehn lov ahn inchres eena mi da-mi sohnting weh Ah neva eva mi feel bifoa. Az di monts dehn gaan bai, Ah staat tu bee wahn “nyoo persn,” di kaina persn Gaad pleez wid. (Ifeezhanz 4:24) Eena Aagas 1985, Ah geh baptaiz az wan a Jehoava Witnisiz.
HOW AH BENIFIT
Di Baibl gi mi wahn nyoo staat eena laif. Ih set mi free fahn wahn laifstail weh onli mi-di dischrai mi badi ahn mek Ah liv eena shaym. In fak, moa dan 30 a mi oal fren dehn mi ded yong fahn AIDS er ada siknis weh kohn fahn jrog abyoos. Ah soh tankful dat, bikaaz Ah mi laan fi yooz di Baibl eena mi laif, Ah neva gaan dong da road deh.
Ah noh bak rong naif, masheet, er aks agen. Ah bak wahn Baibl now, ahn Ah yooz it fi help ada peepl—sohnting Ah wuda neva eevn imajin wen Ah mi yonga. Tudeh, mee ahn mi waif di serv az ful-taim preechaz.
Mai ma ahn pa neva did baptaiz az Witnisiz, bot dehn mi reeli apreeshiayt di benifits weh Ai mi geh fahn stodi di Baibl. In fak, mi pa yoostu stan op fi di Witnisiz fronta ih fren dehn. Ih mi veri playn fi mek hihn si dat mai fayt mi chaynj mi laif fi di beta. Mai ma mi aalwayz seh dat Ah shuda mi staat stodi di Baibl erliya eena laif. Ai agree wid ahn 100 persent!
Mai ekspeeryens eena laif teech mi dat satisfakshan noh kohn fahn jrogz er ada laifstail eena di werl. Ah get chroo chroo satisfakshan eena laif fahn shayr di chroot fahn di Baibl wid adaz—di saym chroot weh mi sayv mai laif!