Ah mi baan eena di siti a Calgary, weh deh da Alberta, Canada. Wen Ai da-mi jos wahn lee bwai, mai payrents mi geh wahn divoas, soh mee ahn mai ma gaahn liv wid mi grani ahn mi grampa. Dehn mi lov mee ahn mai ma, an Ai mi veri hapi wen Ah mi smaal. Wen Ah memba dehndeh peesful yaaz ahn wandaful memriz, Ah feel reeli hapi.

Wen Ah mi sevn yaaz oal, mi laif mi geh wers kaaz mi ma ahn mi pa mi get marid agen ahn den wi mi moov tu St. Louis, Missouri, da di United States. Rait deh, Ah mi fain owt dat mai pa da-mi wahn kruwil man. Fi egzampl, afta mai fers day da mi nyoo skool, wen Ah gaahn hoam, mi pa mi fain owt dat di ada pikni dehn mi buli mi, ahn dat Ah neva fait bak. Hihn geh beks bad wid mi, soh ih beet mi wers dan how di pikni dehn da skool mi beet mi! Ah put da soa-kaal lesn intu praktis, an Ah mi get eena mi fers fait wen Ah mi jos sevn yaaz oal.

Bikaaz mai pa mi ga wahn bad tempa, dat mi mek mai ma laif mizarabl, soh dehn mi aalwayz di kwaaril wid wan anada. Ah mi staat tu abyooz jrogz an alkohol wen Ah mi onli 11 yaaz oal. Ah staat tu get moa ahn moa vailent, an Ah mi get eena wahn lata schreet fait. Ahn bai di taim Ah mi grajuayt fahn hai skool, Ai mi eevn wers dan bifoa.

Wen Ah mi 18 yaaz oal, Ah mi jain di U.S. Marine Corps. Joorin da taim, Ah mi laan how fi kil peepl. Afta faiv yaaz, Ah mi lef di militeri fi stodi saikoloji, bikaaz Ah mi waahn werk wid di Federal Bureau of Investigation. Ah staat tu stodi da wahn yooniversiti da di United States, ahn wen Ah mi moov bak da Canada, Ah kantinyu mi stodiz oava deh.

Wen Ah mi deh da yooniversiti, Ah staat tu geh disapointid eena peepl. Dehn onli mi kay bowt dehnself. Mai laif neva ga no meenin, an ih mi luk laik peepl kudn werk tugeda fi solv dehn prablemz. Ah mi giv op pahn di hoap dat hyoomanz ku mek di werl bee wahn beta plays.

Bikaaz Ah mi feel laik mi laif neva ga no meenin, Ah staat tu jrink moa ahn tek moa jrogz, an Ah geh greedi fi moni ahn seks. Ah yoostu goh fahn wan paati tu di neks ahn fahn wan uman tu wahn nada uman. Di militeri chraynin weh Ai mi geh mi giv mi di korij fi get eena wahn lata fait. Ah mi tink dat Ah ku disaid fi miself weh rait ahn weh rang, soh Ah wuda goh op tu enibadi weh Ah neva tink mi chreet adaz eena wahn fyaa way. Bot reeli, Ah jos mi mek vailens kanchroal mi laif eevn moa.

Wan day wen mi fren mi deh wid mi da mi hows, wi mi hai pahn jrogz, ahn wi mi-di pripyaa fi ship aaf mariwaana fi sel, ahn den mi fren mi aks mi if Ah mi bileev eena Gaad. Den Ai tel ahn, “If Gaad rispansabl fi aala di sofarin eena di werl, den Ai noh waahn ga notn fi du wid hihn!” Di neks day, wen Ah mi jos staat mi nyoo jab, wan a di werkaz, hoo da-mi wan a Jehoava Witnisiz, mi aks mi, “Yoo tink Gaad rispansabl fi aala di sofarin eena di werl?” Ah mi sopraiz bikaaz a weh Ah mi-di taak bowt di day bifoa, an Ah mi reeli waahn noa moa. Fi siks monts wi mi taak bowt wahn lata difrent tingz, ahn hihn mi shoa mi ansaz fahn di Baibl tu wahn lata haad kweschanz Ah yoostu aks bowt laif.

Ah mi-di liv wid mi gyalfren rong da taim, ahn wee mi-di plan fi geh marid, bot shee neva waahnt Ai tel ahn bowt aala di tingz weh Ah mi-di laan. Wahn Sondeh Ah mi tel ahn dat Ah mi invait di Witnisiz da wi hows fi stodi di Baibl wid wi. Wel, di neks day wen Ah kohn hoam fahn werk, Ah noatis dat shee mi kehr evriting owta di hows ahn shee mi lef mi. Ah gaahn baal owtsaid. Ah mi pray tu Gaad, ahn bayg ahn fi help. Dat da-mi di fers taim Ah yooz Gaad naym, Jehoava, wen Ah pray.—Psalm 83:18.

Too dayz layta, Ah mi ga mi fers Baibl stodi wid di Witnisiz; wahn marid kopl mi kom. Afta dehn mi gaan, Ah mi kantinyu fi reed di buk weh naym You Can Live Forever in Paradise on Earth, an Ah mi finish it da sayhn nait. * Di tingz weh Ah mi laan bowt Jehoava Gaad an ih Son, Jeezas Krais, mi reeli toch mi haat. Ah mi geh fi si dat Jehoava da wahn lovin Gaad, an ih feel sad wen ih si wi di sofa. (Isaiah 63:9) Wat toch mi haat di moas da-mi wen Ah fain owt humoch Gaad lov mi wen ih mi sakrifais ih son fi mee. (1 Jan 4:10) Sayka dat, Ah mi riyalaiz dat Jehoava payshent wid mi ‘bikaaz ih noh waahn non a wi geh dischrai, bot ih waahn aala wi ton fahn wi sin dehn.’ (2 Peeta 3:9) Ah mi feel laik Jehoava mi-di jraa mi tu ahn.—Jan 6:44.

Da sayhn week, Ah staat tu goh da di meetin dehn. Ah mi ga lang hyaa, Ah mi wayr ayring, an Ah mi luk laik sohnbadi weh peepl wuda bee frayd fa. Bot di Witnisiz mi chreet mi laik Ai da-mi wahn memba a dehn famili weh dehn neva si fahn lang taim. Dehn mi ak laik chroo chroo Kristyanz. Ai mi feel laik Ai mi deh bak hoam wid mai grani ahn mai grampa, bot ih mi eevn beta dan dat.

Afta dat, di tingz weh Ah mi-di laan fahn di Baibl staat tu chaynj mi laif. Ah kot mi hyaa, Ah stap praktis sekshwal imoraliti, an Ah stap abyooz jrogz an alkohol. (1 Korintyanz 6:9, 10; 11:14) Ai mi waahn pleez Jehoava. Soh wen Ah fain owt dat hihn neva hapi wid sohnting weh Ah mi-di du, Ah neva tel miself dat dehndeh tingz mi okay. Insteda dat, Ah mi feel reeli bad bowt di tingz weh Ah mi-di du. Ah wuda tel miself dat Ah kyaahn bihayv laik dat nohmoh. Ahn rait away Ah wuda chrai chaynj di way Ah mi-di tink an ak. Sayka dat, mi laif mi geh beta wen Ah mi du tingz Jehoava way. Soh Ah mi geh baptaiz pahn Joolai 29, 1989, jos siks monts afta Ah mi staat tu stodi di Baibl.

Di Baibl help mi fi chaynj fi bee wahn beta persn. Eena di paas, if Ai wuda eva kohn fays tu fays wid wahn kruwil persn, Ai wuda aalwayz rispan eena wahn vailent way. Bot now Ai werk haad fi bee “peesabl wid evribadi.” (Roamanz 12:18) Ai tank Jehoava fi dis, bikaaz if da neva fi di powa a ih Werd an ih hoali spirit, Ai neva mi wahn chaynj.—Galayshanz 5:22, 23; Heebrooz 4:12.

Insteda mek jrogz, vailens, an imoaral dizaiyaz kanchroal mi laif, now Ah werk haad fi pleez Jehoava Gaad an Ah giv ahn mi bes. Wan way Ah du dat da wen Ah help adaz fi get fi noa hihn. Wahn kopl yaaz afta Ah mi get baptaiz, Ah mi moov tu wahn nada paat a di werl weh mi need help wid di preechin werk. Oava di yaaz Ah mi ga di privilij fi teech wahn lata peepl fahn di Baibl, an Ah geh fi si how di Baibl mi help dehn eena dehn laif tu. Ai aalso hapi dat mi ma mi kohn fi bee wan a Jehoava Witnisiz. Wan ting weh mi help shee fi mek da chaynj, da-mi wen shee si di pazitiv chaynjiz eena mi kandok ahn mi atichood.

Eena 1999, Ah grajuayt fahn di skool weh wi staat tu kaal di Skool fi Kingdom Ivanjelaizaz da El Salvador. Da skool mi chrayn mi an ih mi giv mi evriting weh Ah mi need soh dat Ai kud tek di leed eena di preechin werk, an ih aalso help mi fi teech ahn tek kyaa a di kangrigayshan. Da saym yaa, Ah mi geh marid tu mi byootiful waif, Eugenia. Wi preech ful taim da Guatemala.

Now, insteda bee disapointid wid laif, Ai ga wahn lata reezn fi bee hapi. Ahn now mi laif ful op wid chroo lov ahn pees bikaaz Ah aplai Baibl teechinz, an Ah stap bee wahn slayv tu sekshwal imoraliti ahn vailens.