“If yu reeli waahn laan bowt Gaad, kantinyu stodi wid Jehoava Witnisiz.” Ah mi shak wen Ah hyaa dat. Rong da taim deh, Ah mi-di stodi wid Jehoava Witnisiz fi wahn lee wail. Bot fi help yu andastan wai Ah mi soh shak, mek Ah tel yu wahn lee bit bowt mi laif.

Ah mi baan da Quezaltepeque, wahn tong eena El Salvador. Mi payrents mi ga 15 chiljren, Ai da-mi di siks chail. Mai payrents mi chrai rayz mi fi bee aanis ahn fi obay di laa. Plos, Leonardo ahn sohn ada Witnisiz yoostu kohn bai fi teech wi bowt di Baibl. Bot Ai kompleetli ignoar weh Ah mi laan, an Ah mek wan bad disizhan afta di ada. Wen Ah mi 14, Ah staat tu jrink alkohol ahn tek jrogz wid mi frenz fahn skool. Wan bai wan, dehn lef skool fi jain wahn gang, an Ai fala fi dehn bad egzampl. Wi mi spen lata taim pahn di schreet; wi foas peepl fi gi wi dehn moni ahn wi teef fi pay fi wi habits.

Di gang da-mi mi famili. Ah mi bileev dat Ai mi haftu bee laayal tu dehn. Fi egzampl, wahn day wan a di gang membaz weh mi hai pahn jrogz atak mi nayba. Joorin di fait, mi nayba mi manij fi hoal ahn dong ahn kaal di polees. Wel, Ai mi beks bad, soh Ah staat tu wap op mi nayba chrok wid wahn big stik fi chrai get ahn fi let goh mi fren. Mi nayba mi-di bayg mi fi stap, bot Ah neva lisn, Ah jos brok op wan windo afta di neks, ahn damij di res a di kaar.

Wen Ah mi 18, mi gang staat tu fait wid di polees. Wahn day Ah mi-di kehr wahn hoam mayd bom, bot bifoa Ah kuda mi chroa it, ih ekspload rait eena mi han​—Ah noh noa how dat mi hapm. Ah onli memba dat Ah luk dong ahn si how mi han mi luk, den Ah faynt weh. Wen Ah wayk op eena di haaspital, Ah fain owt dat Ah mi looz mi rait han, dat Ah kudn hyaa eena mi rait ayz, ahn dat Ah mi aalmoas blain eena mi rait aiy.

Afta Ah kom owta di haaspital, Ah gaahn rait bak tu mi gang, eevn doa Ah mi geh bad hert. Bot noh lang afta dat, di polees ares mi, ahn sen mi da prizn. Bot rait deh Ah schrentn mi rilayshanship wid di gang membaz. Wi spen aal day di du tingz tugeda; wi eet brekfas, ahn smoak wi fos mariwaana jaint fi di day, til da mi taim fi goh sleep.

Wen Ah mi deh eena prizn, Leonardo mi vizit mi. Wail wi mi-di taak, ih paint tu wahn tatoo pahn mi han, an aks mi: “Yoo noa weh dehndeh chree dat meen?” Ah seh: “Yes, ih stan fi seks, jrogz, ahn rak an roal.” Bot Leonardo ansa mi seh: “Ai wuda moa tink dat dehn stan fi haaspital, prizn, ahn det. Kaaz yu mi don deh eena wahn haaspital, ahn now yu deh da prizn. Yu noa weh kohn neks, rait?”

Weh Leonardo mi seh reeli sopraiz mi. Hihn mi rait. Ai mi-di dig mi oan grayv fi chroo bai di way weh Ai mi-di liv. Leonardo mi invait mi fi stodi di Baibl wid ahn, Ah mi aksep it. Di tingz weh Ah mi laan fahn di Baibl moov mi fi chaynj mi laif. Fi egzampl, di Baibl seh dat “bad kompni spail gud karakta.” (1 Korintyanz 15:33) Soh Ah noa dat di fos ting Ah mi haftu du da fain nyoo frenz. Dats wai Ah stap goh da di gang meetin dehn an Ah staat tu goh da di meetin dehn weh Jehoava Witnisiz mi-di gat rait eensaid di prizn. Da wan a di meetin dehn, Ah meet Andrés, wan a di priznaz. Hihn mi geh baptaiz az wan a Jehoava Witnisiz rait eena di prizn. Ih mi invait mi fi goh eet brekfas wid ahn. Soh afta dat, Ah neva staaf di day di smoak mariwaana agen. Insted, mee an Andrés mi diskos wahn Baibl vers evri maanin.

Di gang membaz mi noatis di chaynjiz weh Ah mi-di mek. Bikaaz a dat, wan a di gang leeda seh dat ih mi need fi taak tu mi. Ah mi frayd bad. Ah neva noa weh ih mi wahn du tu mi afta ih fain owt weh Ah mi-di plan fi du, bikaaz ih mi aalmoas impasabl fi lef wahn gang. Ih mi seh: “Wi noatis dat yu noh di kohn da wi meetin dehn agen; yu staat tu goh da Jehoava Witnisiz wan. Weh yu di plan fi du?” Ah mi tel ahn dat Ah waahn kantinyu stodi di Baibl ahn chaynj mi laif. Ah mi onli shak wen ih tel mi dat di gang mi wahn rispek mi az lang az Ah proov dat Ah reeli waahn bee wan a Jehoava Witnisiz. Den ih seh: “Kongrajulayshanz! If yu reeli waahn laan bowt Gaad, kantinyu stodi di Baibl wid Jehoava Witnisiz. Wi ekspek yu fi stap du bad tingz now. Yu di goh dong di rait road. Di Witnisiz reeli ku help yu. Ah mi stodi wid dehn da Stayts, ahn som a mi famili membaz da Jehoava Witnisiz. Noh bee frayd. Kantinyu du weh yu di du.” Ah mi frayd fi chroo, bot at di saym taim, Ah mi onli hapi. Ah tel Jehoava tanks eena mi haat. Ah mi feel jos laik wahn berd weh get owta ih kayj, an Ah mi andastan Jeezas werdz: “Unu wahn noa di chroot bowt Gaad, ahn da sayhn chroot wahn mek unu free fi chroo.”​—Jan 8:​32.

Bot som a mi oal frenz stil mi-di chrai aafa mi jrogz; dat da-mi reeli wahn tes fi mee. An Ah noh wahn lai, sohntaimz Ah mi en op di giv een. Bot eena taim, afta lata sinsyaa pryaaz, Ah fainali beet di habit.​—Psalm 51:10, 11.

Afta Ah kom owta prizn, lata peepl mi tink dat Ah mi wahn goh bak tu mi oal way a laif, bot notn neva goh soh. Insted, Ah gaan bak da prizn fi shyaa weh Ah mi-di laan wid di ada priznaz. Fainali, dehn riyalaiz dat Ah mi mek wahn chaynj. Bot ih sad fi seh doh, dat mi enimi dehn neva feel di saym way.

Wahn day wen Ah gaan owt fi preech, sohn gang membaz fahn wahn nada gang sorong mee ahn wahn neks brada. Dehn mi ga sohn wepan pahn dehn, kaaz dehn mi waahn kil mi. Eena wahn kain way di brada eksplayn tu dehn dat Ai da neva wahn gang memba nohmoh. Wail aala dis mi-di hapm, Ah mi-di chrai mi bes fi stay kaam. Afta dehn beet mi op ahn waan mi neva fi goh eena da ayrya agen, dehn loawa dehn wepan ahn let wi goh. Di Baibl reeli chaynj mi laif. Eena di paas Ai wuda mi chrai tek rivenj. Bot now Ah fala di Baibl kongsl eena 1 Tesaloanyanz 5:​15: “Mek shoar dat nobadi noh pay bak eevl wid eevl. Yu fi chrai aal di taim fi du gud tu wan anada ahn tu evribadi.”

Eva sins Ah geh baptaiz az wan a Jehoava Witnisiz, Ah chrai haad fi bee wahn aanis man. Bot ih neva eezi ataal! Da mi onli wid Jehoava help, di kongsl fahn di Baibl, ahn di sopoat weh Ah get fahn mi nyoo frenz, dat Ah kuda mi ga sokses. Ah wuda neva waahn goh bak tu mi oal way a laif.​—2 Peeta 2:​22.

Ah yoostu bee wahn vailent man weh ful a anga. Ai noa fi shoar dat if Ah neva giv op da daynjaros way a laif, Ai mi wahn don ded lang taim. Di tingz weh Ah laan fahn di Baibl reeli chaynj mi. Ah giv op aala mi bad habits. An Ah laan fi bee peesabl wid peepl weh yoostu bee mi enimi. (Look 6:​27) Ahn now Ah ga gud frenz weh help mi fi ga gud kwalitiz. (Proverbs 13:20) Ah liv wahn hapi laif wid wahn perpos, di serv wahn Gaad hoo mi redi fi fagiv aala di bad tingz weh Ah mi du.​—Isaiah 1:​18.

Eena 2006, Ah gaan da wahn speshal chraynin skool fi singl Kristyan bradaz. Yaaz layta, Ah geh marid tu mi byootiful waif, ahn tugeda wi di rayz wi lee gyal. Now Ah spen lata taim di teech adaz di sayhn Baibl prinsiplz weh mi help mee. Ah di serv az wahn elda eena di kangrigayshan tu; Ah chrai help di yong wanz noh fi mek di saym mistayk dehn weh Ai mi mek wen Ai da-mi fi dehn ayj. Insteda dig mi oan grayv, Ah di pripyaa fi evalastin laif weh Gaad pramis wi eena di Baibl.