Mai famili kohn fahn Tonga, wahn konchri weh mek op a bowt 170 ailan eena di sowtwes paat a di Pacific Ocean. Wi mi liv wahn simpl laif da Tonga; wi neva ga korant ahn wi neva ga wahn veekl. Bot fi wee hows mi ga paip waata, ahn wi mi-di rayz wahn kopl chikin. Joorin skool haliday mee ahn mai too breda yoostu help wi pa werk pahn di famili plantayshan, wehpaat wi yoostu groa banaana, yaam, dasheen, ahn kasaava. Ahn soh mi pa yoostu sel dehnya projoos ahn du sohn ada lee said jab fi sopoat di famili. Wi famili mi ga lata rispek fi di Baibl ahn wi yoostu goh da cherch regyula, laik wahn lata peepl weh liv pahn di ailan dehn eena di Pacific. Stilyet, wi mi bileev dat di onli way fi ga wahn gud laif da-mi fi moov tu wahn richa konchri.

Wen Ai mi 16, mi onkl mi mek araynjment fi mek wi famili moov tu California, U.S.A. Dat da-mi wahn big chaynj fi wee! Aldoa wi mi ga moa moni, wi mi stilyet liv eena wahn poa naybahud weh mi ga lata kraim ahn jrogz. Lata taim da nait wi mi hyaa gonshat, ahn moas a wi nayba dehn mi frayd fi di gang dehn. Lata peepl yoostu bak gon fi protek dehnself er fi setl eni kwaaril weh dehn get eena. Ai ga wahn bulit eena mai ches fahn wahn kwaaril laik dat.

Wen Ah gaahn da kalij Ah mi waahn fit een wid di res a yong peepl. Lee bit bai lee bit Ah mi gaahn da moa wail paati. Moa ahn moa, Ah mi-di jrink, fait, ahn yooz jrogz. Soon Ah mi geh huk pahn kokayn. Ah mi staat tu teef fi mek Ah ku bai jrogz. Eevn doa mi famili yoostu goh da cherch regyula, Ah neva geh no kaina gaidans fi help mi fait di temtayshan fi du weh rang. Polees ares mi lata taim kaaz a weh Ah mi soh vailent. Mi laif mi-di geh owta kanchroal! Afta wahn wail Ah mi en op da prizn.

Wan day eena 1997, wail Ah mi deh da prizn, wahn neks prizna noatis dat Ah mi-di hoal wahn Baibl. Da mi Krismos taim ahn moas a di Tongan peepl kansida Krismos az sohnting veri hoali. Hihn aks mi if Ah mi noa weh di Baibl reeli ga fi seh bowt how ahn wen Jeezas mi baan, bot Ai neva noa. Hihn mi shoa mi weh di Baibl seh bowt Jeezas bert, an Ah mi fain owt dat wahn lata di chradishan dehn weh goh lang wid Krismos neva eevn menshan eena di Baibl. (Machyu 2:1-12; Look 2:5-14) Ah mi shak, an Ah mi staat tu wanda wat els di Baibl seh. Di man mi-di goh da di meetin dehn weh Jehoava Witnisiz yoostu ga da di prizn evri week, ahn soh Ai disaid fi goh lang wid ahn. Dehn mi-di taak bowt di Baibl buk a Revilayshan. Eevn doa Ah neva andastan moch a weh dehn mi-di seh, Ah mi si dat evriting weh dehn mi-di teech kohn fahn di Baibl.

Wen di Witnis dehn mi aafa mi mai oan Baibl stodi, Ah mi hapi fi aksep. Fi di fers taim, Ah mi laan weh di Baibl pramis bowt di paradais weh wahn deh pahn di ert. (Isaiah 35:5-8) Ah mi geh fi andastan dat if Ah waahn pleez Gaad, Ah mi wahn haftu mek sohn big chaynjiz eena mi laif. Ah mi si dat Jehoava Gaad wahn neva alow mi fi liv eena paradais if Ah mi kantinyu eena mi bad wayz. (1 Korintyanz 6:9, 10) Soh Ah mek op mi main fi kanchroal mi bad tempa, fi stap smoak, ahn noh fi oava jrink er tek jrogz nohmoh.

Eena 1999, bifoa Ah mi finish serv mi taim da prizn, Ah mi geh chransfer tu wahn nada prizn. Ah neva ga no kantak wid di Witnisiz fi oava wahn yaa. Bot Ah mi mek op mi main dat Ah wuda kantinyu fi mek chaynjiz eena mi laif. Eena 2000, di govament kyansl mi permishan fi stay eena di United States, ahn dehn dipoat mi tu Tonga.

Afta dehn sen mi bak da Tonga, Ah neva ways no taim fi gaahn luk fi Jehoava Witnisiz fi mek Ah kantinyu mi Baibl stodi. Ah mi lov weh Ah mi-di laan, an Ah mi impres wen Ah si dat di Witnisiz pahn di ailan mi bays evriting weh dehn teech pahn di Baibl, jos laik di Witnisiz da Stayts.

Lata peepl wehpaat wee liv mi noa mai pa bikaaz hihn mi ga wahn impoatant pozishan eena ih cherch. Soh wen mai famili si dat Ah mi-di spen taim wid Jehoava Witnisiz dehn mi kanfyooz ahn dehn neva hapi ataal. Bot laytaraan, mi payrents mi hapi wen dehn si how Baibl prinsiplz mi-di help mi fi kleen op mi laif.

Wan a di haadis chaynjiz Ah mi haftu mek da-mi fi stap jrink kava. Kava da wahn jrink weh dehn mek fahn di root a di pepa plaant, ahn wen yu jrink it ih mek yu rilaks. Lata peepl eena mai kolcha abyooz dis jrink, ahn lata man da Tonga spen owaz evri week di jrink kava. Now dat Ah mi deh bak eena mi hoam konchri, Ah mi mek it wahn habit fi goh da wahn kava klob nayli evri nait fi jrink kava til Ah nayli paas owt. Paat a di prablem da-mi dat Ah mi-di heng owt wid frenz weh neva kay weh di Baibl seh. Bot Ah mi geh fi andastan dat Gaad neva pleez wid weh Ah mi-di du. Soh Ah mi chaynj mi wayz fi pleez Gaad an injai fi hihn blesin.

Ah mi staat tu goh da aala di meetin dehn weh Jehoava Witnisiz gat. Bikaaz Ah mi-di spen moa taim wid ada peepl weh mi-di chrai pleez Gaad, ih mi eeziya fi noh giv een tu temtayshan. Eena 2002, Ah mi geh baptaiz az wan a Jehoava Witnisiz.

Ai benifit fahn Gaad payshens laik how di Baibl seh: ‘Di Laad onli payshent wid unu bikaaz ih noh waahn non a unu geh dischrai, bot ih waahn aala unu ton fahn unu sin dehn.’ (2 Peeta 3:9) Hihn kuda mi dischrai dis wikid oal werl lang taim, bot ih alow it fi kantinyu lang inof fi mek peepl laik mee laan fi bee fi hihn fren. Ih mek Ah feel gud fi tink dat hihn mait yooz mee fi help ada peepl du dat tu.

Wid Jehoava help Ah mi aybl fi tek bak kanchroal a mi laif. Ah noh teef nohmoh fi pay fi wahn habit weh ku kil mi. Rada, Ah chrai help mi naybaz fi bee Jehoava fren tu. Ah meet mi lovli waif, Tea, chroo di kangrigayshan a Jehoava Witnisiz. Mee, shee, ahn wi yong son ga wahn veri hapi famili laif. Tugeda wi teech ada peepl weh di Baibl seh bowt di hoap fi liv fareva eena wahn peesful paradais.