Ah mi baan da Montreal, wan a di bigis siti da Canada. Mee ahn mi chree brada ahn sista mi ga lovin payrents. Wi mi groa op eena wahn nais ayrya kaal Rosemont. Wi mi injai wahn kwaiyet ahn peesful laif tugeda.

Fan Ah yong, Ah mi inchrestid eena di Baibl. Ah memba wen Ah mi 12, Ah reed bowt Jeezas laif eena di Nyoo Testiment an Ah mi reeli laik it. Di lov ahn kompashan weh hihn mi gat fi adaz moov mee fi waahn bee laik hihn. Bot, di oalda Ah get, di les Ah mi waahn dat bikaaz a di frenz weh Ah mi gat.

Mi pa mi gi mi wahn saksafoan weh hihn yoostu play. Ah aalso get fahn mi pa wahn lov fi myoozik ahn dat mi geh fi bee di foakos a mi laif. Ah mi injai myoozik wahn lat soh Ah laan fi play di gitar. In taim, mee ahn som a mi frenz get wahn rak ban tugeda, ahn wi mi play da wahn fyoo shoa. Sohn big taim myoozik projoosa mi hyaa wi myoozik an aafa fi du moa advataizment fi wi. Ah mi sain wahn kanchrak wid wahn big rekad kompani. Mi myoozik mi geh papyula ahn dehn yoostu play it aal di taim pahn di rayjo stayshan dehn da Quebec.

Ah mi tink Ah ga evriting weh Ah mi waahn. Ah mi yong ahn faymos, an Ah mi-di mek lata moni di du weh Ah lov. Joorin di day Ah goh chrayn da di jim, du intavyoo, sain op tingz fi peepl, ahn goh pahn wahn taak shoa. Da nait, Ah yoostu play da wahn fyoo shoa ahn den goh bash op aftawodz. Fi deel wid di schres, Ah staat aaf di jrink alkahol bot Ah en op di yooz jrogz laytaraan kaaz Ah kudn handl it. Ah neva kay bowt eniting an Ah mi liv wahn loos laif.

Som peepl mi waahn di laif Ai mi-di liv bikaaz dehn mi tink Ah hapi. Bot deep dong eensaida mi, Ah mi feel soh emti, espeshali wen Ah mi deh bai miself. Ah mi feel dipres ahn schres owt. Wen Ah mi deh da di tap a mi kareeya, too a mi projoosa ded fahn AIDS. Dat mi shak mi! Eevn doa Ah mi lov myoozik, Ah mi hayt di laif weh kohn lang wid it.

Eevn doa tingz mi-di goh gud fi mi, Ah neva laik weh Ah mi-di si eena di werl. Ah yoostu wanda how soh moch injostis deh? Ahn wai Gaad noh du sohnting bowt it. In fak, Ah yoostu pray tu Gaad fi geh wahn ansa. Wahn taim wen wi neva mi-di du eni myoozik toar, Ah staat reed di Baibl agen. Aldoa Ah neva reeli andastan weh Ah mi-di reed, Ah riyalaiz dat di werl wahn soon en.

Wen Ah mi-di reed di Baibl, Ah fain owt dat Jeezas mi faas eena di dezert fi 40 dayz. (Machyu 4:​1, 2) Ah tel miself dat if Ai wuda du di saym ting, maybi Gaad wuda mek Ah geh fi noa Hihn, soh Ah set wahn dayt wen Ah mi wahn bigin. Too weeks bifoa Ah staat du mi faas, too Jehoava Witnisiz nak pahn mi doa, an Ah tel dehn fi kom een. Ah du laik Ah mi-di ekspek dehn. Ah luk pahn wan a dehn weh mi naym Jacques, rait eena ih aiy an aks, “How wi ku noa dat wi di liv eena di laas dayz a dis werl?” Wel, ih oapm ih Baibl ahn reed 2 Timoti 3:​1-5. Ah staat tu faiya aaf lata kweschan, an evritaim dehn ansa mi fahn di Baibl. Ah mi reeli impres wid dat. Afta wahn fyoo vizit, Ah riyalaiz dat Ah neva need fi faas.

Ah staat to stodi di Baibl wid di Witnisiz. Den in taim, Ah kot mi lang hyaa ahn staat goh da aala di meetin dehn da di Kingdom Haal rong weh Ah liv. Ah mi eevn moa kanvins dat Ah mi fain di chroot wen Ah si how dehn welkom mi da dehnya meetin.

Bikaaz Ah mi waahn aplai weh Ah mi-di laan fahn di Baibl, Ah stap play myoozik ahn staat werk da wahn fakchri weh Ah mi-di mek les moni. Ah mi stap yooz jrogz ahn lef da loos laif. Ah mi laan fi tink moa bowt peepl ahn noh bee selfish. Ahn bikaaz Ah mi ga too chiljren an Ah neva marid, Ah mi haftu laan how fi tek kayr a dehn eena wahn imoashanal ahn spirichwal way.

Ih neva mi eezi fi Ah mek aala dehndeh chaynjiz. Ah mi geh sik anaal bikaaz Ah mi-di chrai lef mi adikshan an Ah eevn jrap bak eena di habit kopl taimz. (Roamanz 7:​19, 21-​24) Da mi wahn chalenj fi lef da kaina loos livin. An, Ah mi feel soh taiyad fahn werk eena di fakchri. Di lee bit a moni weh Ah mi mek mi yoostu diskorij mi. Ih mi tek mi chree monts fi mek di saym amonk a moni laik weh Ah mi mek eena jos too owaz di play myoozik.

Pryaa mi help mi fi noh giv op, ahn fi kantinyu mek dehnya chaynjiz. Wen Ah reed di Baibl, Ah feel inkorij tu. Ah reeli laik 2 Korintyanz 7:1, weh inkorij aal Kristyanz fi ‘kip weh fahn evriting weh noh wahn mek dehn badi ahn spirit kleen.’ Wahn nada skripcha weh mi help mi fi si dat ih pasabl fi lef mi bad habits da-mi Filipiyanz 4:​13, weh seh: “Ah ga di schrent fi du evriting fahn di wan hoo gi mi powa.” (NW) Jehoava Gaad ansa mi pryaaz ahn help mi fi andastan an aplai Baibl chroot eena mi laif. (1 Peeta 4:​1, 2) Ah mi geh baptaiz az wan a Jehoava Witnisiz eena 1997.

Ah noa dat if Ah mi kantinyu fi liv da kaina laif, Ah wuda mi bee ded bai now. Insted, Ah di injai wahn hapi laif now! Mi wandaful waif, Elvie, da wahn blesin tu mi. Di too a wi injai fi spen taim di teech adaz bowt di Baibl. Dis mek Ah feel hapi ahn kantentid. Ah reeli apreeshiayt dat Jehoava mi jraa mi tu hihn.​—Jan 6:​44.