Ai mi baan da Ciudad Obregón weh deh eena di naat a Mexico. Ah ga too oalda sista, too oalda breda, ahn foa yonga sistaz. Wi mi liv faar owta di siti, wehpaat mi pa mi ga ih lee faam. Da mi wahn reeli nais plays fi liv, ahn wi famili mi hapi ahn yoonaitid. Bot wen Ah mi onli faiv yaaz oal, wahn harikayn mi dischrai wi faam ahn wi mi haftu moov fi goh liv da wahn nada tong.

Mi pa mi staat tu mek gud moni. Bot den, hihn mi ton wahn jronkad. Dis mi afek ih marij ahn wee, ih pikni. Wi mi staat tu smoak sigaret weh wi mi teef fahn mi pa. Wen Ah mi siks yaaz oal Ah mi geh jronk fi di fos taim. Lee wail afta, mi payrents mi brok op ahn mi bad habit mi geh wers.

Mi ma mi gaan liv wid wahn nada man ahn shee mi kehr wi wid ahn. Hihn neva giv ahn moni, ahn wi mi kyaahn liv aafa di lee bit a moni weh shee mi-di mek. Soh mee ahn mi breda dehn mi staat tu luk fi eni kaina werk weh wi kuda mi du, bot wi bayli mi-di mek inof moni fi mek wi kuda mi eet gud. Ai mi palish shooz ahn sel bred, nyoozpaypa, chingom, ahn ada lee tingz. Ah mi aalso goh bowt di siti di luk fi food fahn owta di rich peepl dehn gyaabij pan.

Wen Ah mi ten, wahn man invait mi fi werk wid ahn da di siti gyaabij domp. Ai mi aksep di aafa, Ah mi jrap owta skool, an Ah mi lef hoam. Hihn mi pay mi les dan wahn dala a day ahn gi mi food fahn owta di gyaabij domp fi eet. Ai mi liv eena wahn lee shed weh Ai mi bil owta gyaabij. Di peepl rong mi kos op wahn lat ahn liv wahn imoaral laifstail. Wahn lata dehn da-mi jrog adiks ahn jronkad. Da mi di wers taim a mi laif; Ah yoostu krai evri nait bikaaz Ah mi frayd. Bikaaz Ah mi poa ahn ga lee bit a ejukayshan, Ah mi feel shaym. Ai mi liv da di domp fi chree yaaz, til Ah mi moov da wahn nada stayt eena Mexico. Dehsoh Ah mi werk eena di feel dehn di pik flowaz ahn katn, kot sugakayn, ahn reep potayto.

Foa yaaz layta, Ai mi moov bak da Ciudad Obregón. Wan a mi aanti hoo da-mi wahn wich dakta giv mi wahn room eena ih hows. Ah mi staat tu ga naitmyaa ahn geh soh dipres dat Ah mi eevn tink bowt kil miself. Wahn nait Ah mi pray tu Gaad: “Laad, if yu egzis, Ah waahn geh fi noa yu, an Ah wahn serv yu fareva. If dehn ga wahn chroo rilijan, Ah waahn noa da wich wan.”

Ai mi aalwayz waahn laan moa bowt Gaad. Eevn wen Ah mi smaal, Ai mi gaahn da lata difrent cherch wid difrent rilijan, bot aala dehn mi lef mi disapointid. Non a dehn neva seh moch bowt di Baibl er help mi fi geh fi noa Gaad. Som mi kay bowt moni tu moch, wail adaz mi-di du imoaral tingz.

Wen Ah mi 19, wan a mi brada-in-laa tel mi dat Jehoava Witnisiz mi shoa hihn weh di Baibl seh bowt wership rilijos aidol. Hihn mi reed Exodus 20:4, 5 tu mi. Ih seh dat wi noh fi kaav owt wahn imij. Vers 5 reed: “Yu noh fi bow dong tu dehn ner geh temtid fi serv dehn, bikaaz Ai, Jehoava yu Gaad, da wahn Gaad weh ekspek yu fi wership mi wid aala yu haat.” Den mi brada-in-laa aks mi, “If Gaad yooz imij fi du miraklz, er if hihn mi waahn wi fi yooz dehn fi wership ahn, wai hihn seh wi noh fi kaav dehn er wership dehn?” Dat mi mek Ah tink. Afta dat, wi mi ga sevral diskoshan pahn difrent Baibl tapik. Ai mi injai dehndeh kanvasayshan soh moch dat di taim mi feel laik ih gaahn faas.

Layta, hihn mi kehr mi da wan a Jehoava Witnisiz meetin dehn. Ah mi reeli impres bai weh Ah mi si ahn hyaa deh. Eevn yong peepl tek paat eena di proagram, di taak soh gud fahn op pahn di platfaam! Ah seh tu miself, ‘Dehn peepl di get gud ejukayshan ya!’ Eevn doa mi hyaa mi lang an Ah mi luk ragidi, di Witnisiz mi stil welkom mi ahn chreet mi gud. Wahn famili mi eevn invait mi fi ga dina wid dehn afta di meetin!

Fahn mai stodi a di Baibl wid di Witnisiz, Ah laan dat Jehoava Gaad da wahn lovin Pa hoo kay bowt wi, noh mata if wi poa, if wi kohn fahn wahn difrent rays, er weh kaina ejukayshan wi ga. Hihn chreet evribadi di sayhn way. (Aks 10:34, 35) Fainali, Ah feel hapi an Ah noh feel laik sohnting impoatant misn eena mi laif.

Mi hoal laif mi chaynj. Ah mi stap smoak, Ah mi stap jrink, an Ah mi stap kos. Di way how Ah mi sofa az wahn chail ahn di fak dat Ah neva ga moch ejukayshan yoostu mek Ah feel laik Ah noh wert notn. Bot now, Ah noh feel laik dat nohmoh.

Ah ga wahn wandaful waif hoo lov Jehoava ahn sopoat mi. Now Ah serv az wahn chravlin oavaseeya a Jehoava Witnisiz, di vizit di difrent kangrigayshan dehn fi inkorij ahn teech mi spirichwal famili a bradaz ahn sistaz. Tanks tu di way di Baibl chaynj mi laif ahn tu di ejukayshan weh Gaad gi wi, Ah noh shaym a miself agen.