Lata tooris kohn vizit di faymos waatafaal dehn weh deh kloas tu di tong a Pagsanjan da di Philippines. Rait deh, mi pa, Nardo Leron, mi groa op, bot dehn mi poa. Wen ih si di koropshan eena di govament, monks di polees dehn, ahn da ih jab, hihn mi staat tu bihayv kruwil.

Mai payrents mi werk haad fi rayz op dehn ayt pikni. Moas a di taim dehn neva deh hoam bikaaz dehn mi haftu tek kayr a sohn faam eena di mongtin dehn. Lata taimz, mee ahn mi breda Rodelio mi haftu tek kayr a wiself, ahn moas a di taim wi mi hongri. Az pikni, wi neva ga moch taim fi play. Fahn sevn yaaz oal, eech wan a wi mi haftu goh werk pahn wahn faam ahn bak sohn hevi load a kuknat, op ahn dong sohn naro pikaado road chroo di mongtin dehn. If wahn load mi tu hevi fi bak, wi mi haftu jreg it.

Wi pa yoostu beet wi op bad, bot ih mi hat wi haat eevn moa wen wi mi si hihn di beet op wi ma. Wi yoostu chrai fi stap ahn, bot wi kudn du notn bowt it. Mee ahn Rodelio mi ga wahn seekrit plan fi kil wi pa wen wi geh oalda. Ah mi reeli waahn wahn pa weh wuda lov wi!

Ah mi foschraytid ahn beks bikaaz mi pa mi soh vailent. Soh Ah lef hoam wen Ah mi 14 yaaz oal. Fi wahn wail Ah mi-di liv pan di schreet, an Ah staat tu smoak weed. Afta wahn wail, Ah staat tu jraiv wahn boat, di kehr di tooris tu di waatafaal dehn.

Sohn yaaz layta, Ah staat tu goh da yooniversiti da Manila. Bot bikaaz Ah yoostu chravl bak tu Pagsanjan fi werk pahn di weeken, Ah neva ga moch taim fi stodi. Ah mi feel laik mi laif neva ga no perpos, ahn weed neva mi-di help mi wid mi schres. Ah staat fi tek haada jrogz, eevn kokayn ahn herowin. Moas a di taim wen Ah mi tek jrogz Ah en op di du imoaral tingz. Ah mi deh rong lata poa peepl, injostis ahn sofarin. Ah mi hayt di govament an Ah mi blaym dehn fi aal di prablemz rong mi. Ah aks Gaad, “Wai mi laif da laik dis?” Bot Ah neva fain no ansaz eevn doa Ah vizit difrent rilijan. Soh Ah mi tek moa jrogz fi chrai faget mi prablemz.

Eena 1972, lata styoodents da di Philippines mi aaganaiz sohn proates gens di govament. Ah mi jain wan a dehn proates an ih ton intu wahn raiyat. Di polees mi ares wahn lata peepl, ahn sohn monts layta, di aami staat tek kanchroal oava di hoal konchri.

Ah en op di liv pahn di schreet agen. Dis taim Ah mi frayd fi di polees dehn bikaaz Ah mi tek paat eena di ribelyan. Fi sopoat mi jrog habit, Ah staat tu teef an Ah en op di du imoaral tingz fi geh moni fahn rich peepl ahn farinaz. Ah neva kyaa bowt mi laif.

Meenwail, mi ma ahn mi yonga breda staat tu stodi di Baibl wid Jehoava Witnisiz. Mi pa mi geh beks bad, an ih bon op dehn Baibl lichricha. Bot dehn neva giv op an dehn geh baptaiz az Witnisiz.

Wan day, wahn Witnis mi taak tu mi pa bowt di Baibl pramis a wahn fyoocha wen chroo jostis wahn deh aal oava di ert. (Psalm 72:12-​14) Dis pramis mi inchres mi pa soh moch dat hihn disaid fi fain owt fi ihself. Eena di Baibl, hihn neva onli fain wahn pramis dat Gaad govament wahn rool wid jostis, bot aalso weh Gaad ekspek fahn wahn pa ahn hozban. (Ifeezhanz 5:​28; 6:4) Wahn lee wail afta dat, mi pa an aala mi breda ahn sista dehn geh baptaiz az Witnisiz. Bikaaz Ah mi deh faar fahn hoam, Ah neva noa bowt dis.

Eena 1978, Ah mi moov tu Australia. Bot eevn eena dis peesful ahn rich konchri, Ah neva fain pees a main. Ah mi stil kantinyu di tek alkahol ahn jrogz. Layta da yaa, Jehoava Witnisiz mi vizit mi. Ah mi laik weh dehn mi shoa mi eena di Baibl bowt wahn peesful ert, bot Ah stil neva shoar if Ah shuda jain dehn.

Lee wail afta dis, Ah gaan bak tu di Philippines fi sohn weeks. Mi breda ahn sista dehn tel mi dat wi pa mi-di werk haad fi bee wahn beta persn, bot Ah mi soh beks ahn hert dat Ah neva waahn ga notn fi du wid ahn.

Mi yonga sista eksplayn tu mi fahn di Baibl wai laif ful op a sofarin an injostis. Ah mi sopraiz dat wahn teenayja wid lee bit a ekspeeryens kuda mi ga di ansa dehn tu mi kweschanz. Bifoa Ah lef, mi pa gi mi di buk You Can Live Forever in Paradise on Earth. * Hihn mi seh: “Stap luk fi ansaz ahn pees a main eena di rang way. Dis buk wahn help yu fain weh yu di luk fa.” Hihn inkorij mi fi luk fi Jehoava Witnisiz wen Ah reech bak da Australia.

Ah mi lisn tu mi pa advais an Ah mi fain wahn Kingdom Haal a Jehoava Witnisiz kloas tu mi hoam da Brisbane. Ah mi aksep wahn Baibl stodi. Di Baibl prafesi dehn eena Daniel chapta 7 ahn Isaiah chapta 9 mi shoa mi dat eena di fyoocha Gaad govament, weh noh wahn ga eni kaina koropshan, wahn rool oava wi. Ah mi laan dat wi wahn injai lata blesinz pahn wahn paradais ert. Ah mi waahn pleez Gaad, bot Ah riyalaiz dat Ah mi wahn haftu kanchroal mi feelinz, stap abyooz jrogz an alkahol, an stap liv wahn loos laif. Ah stap liv wid mi gyalfren an Ah stap mi bad habits. Az mi chros eena Jehoava mi geh schranga, Ah mi pray fi ih help fi mek sohn ada chaynjiz.

Lee bit bai lee bit, Ah mi staat tu riyalaiz dat weh Ah mi-di laan kuda reeli help wahn persn fi chaynj. Di Baibl seh dat if wi mek di efoat, wi ku bee wahn “nyoo persn.” (Koloashanz 3:​9, 10) Az Ah mi chrai fi du dis, Ah riyalaiz dat maybi ih ku bee chroo dat mai pa mi chaynj di way ih yoostu bihayv. Insteda hayt ahn an feel beks wid ahn, Ah mi waahn mek pees wid ahn. Fainali, Ah fagiv mi pa an Ah stap hoal aan tu di haychrid weh Ah mi gat tuwaadz ahn fahn sins Ai da-mi wahn lee bwai.

Az wahn yong man, moas a di taim Ah wuda fala di krowd ahn du tingz weh kuda mi hert mee an adaz. Weh di Baibl waan wi bowt mi kohn chroo eena mai laif​—Ah en op di du bad tingz sayka fala bad kompani. (1 Korintyanz 15:33) Bot Ah ga sohn kloas frenz monks Jehoava Witnisiz, ahn dehn help mee fi bee wahn beta persn. Aalso monks dehn a mi fain mi byootiful waif, Loretta. Tugeda, wi teech adaz bowt how di Baibl ku help dehn.

Tanks tu di Baibl, Ah mi si mi pa ton intu sohnbadi weh Ah neva tink hihn kuda bee​—wahn lovin hozban tu mi ma ahn wahn hombl, peesful Kristyan. Wen wi mi meet op afta Ah geh baptaiz az wan a Jehoava Witnisiz eena 1987, mi pa hog mi fi di fos taim eena mi laif!

Fi oava 35 yaaz, mi pa ahn ma mi kantinyu fi shyaa di gud nyooz fahn di Baibl wid adaz. Hihn mi chaynj fi bee wahn haad-werkin man hoo mi kay bowt adaz. Chroo dehndeh yaaz, Ah mi laan fi rispek ahn lov mi pa. Ah mi feel soh prowd fi bee ih son! Hihn mi ded eena 2016, bot Ah tink bowt ahn wahn lat, kaaz Ah noa dat mee ahn hihn mek sohn big chaynjiz eena di way wi bihayv bikaaz wi mi aplai di teechinz fahn di Baibl. Ai noh feel eevn wahn lee bit a haychrid nohmoh. An Ah soh tankful dat Ah fain mi hevnli Faada, Jehoava Gaad, weh pramis fi geh rid a aala di prablemz weh afek di famili dehn aal oava di werl.