2 Korintyanz 13:1-14
13 Dis da di terd taim Ah di kohn luk fi unu. Wi reed eena di Skripcha seh, “Yu haftu ga at lees too witnis fi proov eni chaaj weh yu bring gens enibadi da koat.”*
2 Ah mi don waan dehn wan weh mi sin, wen Ah mi deh wid unu pahn mi sekant vizit. Ahn now wail Ah noh dehdeh wid unu, Ah di waan aal di res, dat wen Ah kohn tu unu agen, Ah noh wahn goh eezi pahn dehn ataal.
3 Unu seh dat unu waahn proof seh dat Jeezas di taak chroo mee. Wel, Krais noh week wen ih di deel wid unu; hihn da wahn maiti powa monks unu.
4 Aldoa hihn mi ded pahn di kraas eena weeknis, hihn di liv now bai di maiti powa a Gaad. Wee week jos laik how hihn mi week. Bot wee wahn kantinyu fi liv bai Gaad powa jos laik how Jeezas du.
5 Unu fi chek unu haat gud ahn si if unu di liv eena fayt fi chroo. Tes owt unuself ahn si if Krais Jeezas di liv eena unu. If unu kyaahn du dat, den unu fayl di tes.
6 Ah hoap dat unu fain owt seh dat wee neva fayl di tes.
7 Wi pray tu Gaad seh dat unu noh wahn du notn weh rang. Da noh kaaz wee waahn evribadi si dat wee paas di tes, bot da fi mek unu du weh rait, eevn doa tu unu ih mait luk laik wee fayl.
8 Kaa wee kyaahn du notn fi fait gens di chroot, oanli fi fait far it.
9 Wee hapi wen wee week ahn unu schrang. Wi pray dat Gaad mek unu groa tu di fulis.
10 Soh Ah di rait dehnya ting tu unu now bifoa Ah get deh, soh dat wen Ah kohn, Ah noh wahn hafu bee soh haad pahn unu, wen Ah yooz di atariti weh di Laad gi mi. Da atariti da fi bil unu op, noh fi tayr unu dong.
11 Fainali, mi bradaz ahn sistaz, Ah waahn tel unu gudbai! Lisn tu weh Ah di bayg unu seh, ahn chrai fi get lang wid wan anada, ahn liv eena pees. Ahn di Gaad a lov ahn pees wahn deh wid unu.
12 Greet wan anada wid wahn hoali kis.
13 Aala Gaad peepl dehn seh fi tel unu heloa.
14 Mek di grays a di Laad Jeezas Krais, ahn di lov a Gaad deh wid unu, ahn mek di Hoali Spirit jain aala unu haat tugeda.
Futnoat
^ 13:1 Dyooteronomi 19:15.
