Heebrooz 8:1-13
8 Now di hoal ting weh wi di seh da dis: Fi wee hai prees di sidong pahn di rait han said* a di grayt chroan a Gaad op da hevn.
2 Jeezas serv az hai prees eena di chroo chroo plays a wership. Dis plays da weh di Laad bil. No hyooman been neva bil it.
3 Di werk weh evri hai prees fi du da fi aafa gif ahn sakrifais tu Gaad, soh fi wee hai prees haftu aafa sohnting tu.
4 Now if Jeezas mi deh dong ya pahn ert, ih neva mi wahn bee wahn prees ataal, kaa dehn don ga prees ya fi aafa op gif akaadn tu weh Moaziz Laa seh.
5 Di werk weh dehn prees du da oanli wahn kapi a weh hapm op da hevn. Da noh di reel ting. Kaa wen Moaziz mi-di geh redi fi bil di tent wichpaa dehn doz aafa sakrifais, Gaad waan ahn seh, “Mek shoar yu bil it egzakli akaadn tu weh Ah mi shoa yu op pahn di mongtin.”*
6 Bot now Gaad pik Jeezas fi du di werk a wahn prees, ahn da werk beta dahn weh dehn ada prees dehn doz du. Sayhn way, Jeezas mek wahn beta agreement bitween Gaad ahn peepl, ahn anda dis nyoo agreement, Gaad mek wahn pramis weh beta dan di oal wan.
7 If sohnting neva rang wid di fos agreement, den wi noh mi wahn need wahn nyoo wan.
8 Bot Gaad mi fain faalt wid da fos agreement wen ih seh,“Di taim di kohn wenAh wahn mek wahn nyoo agreement
wid di peepl a Izreahn wid di peepl a Jooda.
9 Dis nyoo agreement noh wahn bee laik di agreementweh Ah mi mek wid fi dehn ansesta dehn,
wen Ah tek dehn bai dehn hanahn leed dehn owta Eejip.Dehn brok dehn agreement wid mee,soh Ah ton mi bak pahn dehn.Dis da weh Ai di Laad seh.
10 Dis da di agreement weh Ah wahn mekwid di peepl a Izrel wen di taim kohn:Ah wahn rait mi laa dehn pahn dehn mainsoh dat dehn ku andastan dehn,an Ah wahn rait dehn eena dehn haatsoh dat dehn ku obay dehn.Ai wahn bee dehn Gaad,ahn dehn wahn bee mai peepl.
11 Ahn dehn noh wahn haftu teech dehn faamli,er tel dehn nayba* seh, ‘Unu mos kohn fi noa di Laad.’Kaa aala dehn, fahn di lees tu di graytis,wahn don noa mi.
12 Ah wahn fagiv aal di rang ting dehn weh dehn mi du,an Ah noh wahn memba dehn sin dehn nohmoh.”*
13 Wen Gaad seh dat dis da wahn nyoo agreement, dat meen dat Gaad don mek di oal wan owt-daytid. Ahn eniting weh oal ahn owt-daytid wahn soon disapyaa.
