1 Jan 3:1-24
3 Yu si humoch di Faada lov wi? Hihn kaal wi fi hihn chiljren,* ahn wee da fi hihn chiljren fi chroo. Dat da wai di werl noh noa wi, bikaaz di werl noh noa hihn needa.
2 Mi dyaa bradaz, eevn doa wi da Gaad chiljren, wi noh noa yet weh wi wahn bee eena di fyoocha. Wi noa dat wen ih shoa ihself, wee wahn bee laik hihn, bikaaz wi wahn si ahn jos laik how ih reeli stan.
3 An evribadi weh chros eena hihn mek dehnself kleen, jos laik how hihn kleen.
4 Evribadi weh kip aan di praktis sin di brok Gaad laa, ahn sin da wen wi brok Gaad laa.
5 Unu noa dat Jeezas mi kohn fi geh rid a wi sin dehn, ahn no sin noh deh eena hihn.
6 Enibadi weh di waak wid hihn noh wahn kip aan di praktis sin, an enibadi weh kip aan di praktis sin noh noa hihn, ahn dehn noh ga no fayt eena hihn.
7 Mi dyaa chiljren, noh mek nobadi chrik unu; enibadi weh du weh rait da sombadi raichos, jos laik how Jeezas raichos.
8 Evribadi weh kip aan di praktis sin kohn fahn di Devl, bikaaz di Devl di sin fahn di biginin. Dat da wai di Son a Gaad mi kohn, fi dischrai evriting weh di Devl du.
9 Enibadi weh noh kip aan di praktis sin da wahn chail a Gaad, bikaaz Gaad hoali spirit deh eena ahn, an ih kyaahn praktis sin, bikaaz ih da wahn chail a Gaad.
10 Dis da how wi ku noa hoo da di chiljren a Gaad ahn hoo da di chiljren a di Devl: If sombadi noh kip aan di du weh rait er noh lov ih brada, den ih noh kohn fahn Gaad.
11 Aalwayz memba di mesij weh unu mi hyaa fahn di biginin, dat wi fi lov wan anada.
12 Wi noh fi bee laik Kayn, hoo mi deh anda di powa a Saytan* an en op di kil ih oan breda. Ahn wai ih mi kil ahn? Bikaaz evriting weh hihn mi du mi wikid, bot evriting weh ih breda mi du mi raichos.
13 Mi bradaz, noh bee sopraiz dat di werl hayt unu.
14 Wi noa wi mi ded bifoa, bot now wi alaiv, bikaaz wi lov wan anada laik bradaz. If sombadi noh lov ih bradaz, da laik if ih ded.
15 Enibadi weh hayt ih brada da wahn merdara, an unu noa dat no merdara noh wahn geh evalastin laif.
16 Soh dis mek wi noa weh da lov, bikaaz Jeezas Krais mi ded* fi wi, ahn wee mos giv op wi laif* fi wi bradaz tu.
17 Bot if sombadi ga di meenz fi help adaz an ih si dat ih brada need help ahn stilyet rifyooz fi shoa ahn kompashan, den how ih ku seh dat ih lov Gaad?
18 Mi dyaa chiljren, wi noh onli fi seh dat wi lov wan anada, bot wi mos shoa it bai weh wi du, an ih mos kohn fahn wi haat.
19 Soh dat da how wi wahn noa dat wi bilangz tu di chroot, ahn wi wahn ku bee shoar dat Gaad lov wi
20 eevn wen wi haat kandem wi, bikaaz Gaad grayta dan wi haat ahn hihn noa evriting.
21 Mi dyaa bradaz, if wi haat noh kandem wi, den wi noh haftu frayd wen wi taak tu Gaad.
22 Ahn wateva wi aks ahn fa, hihn gi wi, bikaaz wi obay ih komanment dehn ahn wi du di tingz weh pleez hihn.
23 Dis da fi hihn komanment: dat wi fi ga fayt eena di naym a ih Son Jeezas Krais ahn lov wan anada, jos laik weh hihn* mi koman wi fi du.
24 Pahn tap a dat, enibadi weh obay Gaad komanment dehn kantinyu fi waak wid hihn, ahn Gaad deh wid da persn. Ahn bikaaz ih gi wi ih hoali spirit, wi noa dat hihn deh wid wi.
Futnoat
^ Lit., “chiljren a Gaad.”
^ Lit., “di wikid wan.”
^ Er “mi giv op ih soal.”
^ Er “soal.”
^ Ih pasabl dat dis di rifaa tu Jeezas.
