1 Jan 5:1-21
5 Evribadi weh bileev dat Jeezas da di Krais da wahn chail a Gaad, an evribadi weh lov Gaad, lov fi hihn chiljren tu.
2 Wi noa dat wi lov Gaad chiljren if wi lov Gaad an obay ih komanment dehn.
3 Ahn fi lov Gaad meenz dat wi wahn obay fi hihn komanment dehn, ahn fi hihn komanment dehn noh haad fi obay.
4 Bikaaz enibadi* weh da wahn chail a Gaad kanka di werl, ahn wi fayt da weh help wi kanka di werl.
5 Da hoo ku kanka di werl? Da di wan weh ga fayt dat Jeezas da Gaad Son.
6 Jeezas Krais mi kohn chroo waata ahn blod. Noh jos wid waata, bot wid di waata ahn wid di blod. Ahn di spirit tel wi bowt dat, bikaaz di spirit tel di chroot.*
7 Dehn ga chree ting weh tel wi di chroot bowt Jeezas:
8 di spirit ahn di waata ahn di blod; ahn di chree a dehn gree.
9 Wi bileev weh peepl seh. Bot weh Gaad seh grayta dan weh peepl seh, bikaaz Gaad tel wi bowt ih Son.
10 Di persn weh put fayt eena di Son a Gaad di shoa dat ih aksep weh Gaad tel ahn eena ih haat. Di persn weh noh ga fayt eena Gaad mek Gaad luk laik ih tel lai, bikaaz da persn noh bileev di chroot weh Gaad seh bowt ih Son.
11 Ahn dis da weh Gaad seh, dat hihn gi wi evalastin laif, ahn wi geh dis laif chroo ih Son.
12 Enibadi weh aksep di Son ga evalastin laif; enibadi weh noh aksep di Son a Gaad noh ga evalastin laif.
13 Ah di rait dehnya ting tu unu weh ga fayt eena di Son a Gaad soh dat unu ku noa dat unu ga evalastin laif.
14 Wi chros* dat noh mata weh wi aks Gaad fa, wans wi aks akaadn tu fi hihn wil, ih hyaa wi.
15 Sins wi noa dat hihn hyaa weh wi aks ahn fa, den wi noa dat wee wahn geh di tingz weh wi aks ahn fa.
16 If enibadi si ih brada di sin eena wahn way weh noh leed tu det, den ih mos pray far ahn, an Gaad wahn giv ahn laif. Dis da fi dehn wan weh noh sin eena wahn way weh leed tu det. Bot, dehn ga wahn kaina sin weh leed tu det. Ah noh di tel nobadi fi pray bowt da kaina sin.
17 Eniting weh noh raichos da sin, bot dehn ga wahn kaina sin weh noh leed tu det.
18 Wi noa dat non a Gaad chiljren kip aan di praktis sin, bot di Son a Gaad protek dehn, ahn di wikid wan kyaahn toch dehn.*
19 Wi noa dat wee bilangz tu Gaad, bot di hoal werl deh anda di powa a di wikid wan.
20 Bot wi noa dat di Son a Gaad don kohn, ahn hihn don gi wi andastandin soh dat wi ku noa di chroo Gaad. Ahn chroo fi hihn Son, Jeezas Krais, wi ku liv akaadn tu di way hihn waahn. Hihn da di chroo Gaad, an evalastin laif kohn fahn hihn.
21 Mi dyaa chiljren, kip weh fahn aidol.
Futnoat
^ Lit., “evriting.”
^ Er “di spirit da di chroot.”
^ Er “ga kanfidens.”
^ Er “noh ga no powa oava dehn.”
