1 Korintyanz 10:1-33
10 Mi bradaz, Ah waahn unu noa dat aala wi ansesta dehn mi deh anda di klowd, an aala dehn mi paas chroo di see.
2 Aala dehn mi geh baptaiz az falowaz a Moaziz wen dehn mi deh anda di klowd ahn wen dehn mi-di goh chroo di see.
3 Aala dehn mi eet di saym spirichwal food,
4 an aala dehn mi jrink di saym spirichwal waata. Aala dehn yoostu jrink fahn di saym spirichwal rak weh mi fala dehn, ahn da rak stan fi* di Krais.
5 Bot eevn soh, Gaad neva pleez wid moas a dehn, soh dehn mi ded eena di wildanes.
6 Dehndeh egzampl da fi waan wee, soh dat wi noh waahn tingz weh bad, laik weh dehn mi waahn.
7 Wi noh fi wership aidol laik weh som a dehn mi du. Da jos laik weh rait dong eena di Skripchaz: “Di peepl mi sidong fi eet ahn jrink. Den, dehn mi get op fi ga wahn gud taim.”
8 Ahn wi noh fi praktis sekshwal imoraliti,* laik how som a dehn mi komit sekshwal imoraliti.* Bikaaz a dat, 23,000 a dehn mi ded eena wan day.
9 Ahn wi noh fi tes Jehoava laik how som a dehn mi tes ahn. Sayka dat, dehn mi ded fahn snayk bait.
10 Ahn wi noh fi grombl needa, laik how som a dehn mi grombl. Sayka dat, Gaad aynjel mi kil dehn.
11 Dehndeh tingz weh mi hapm tu dehn geh rait dong fi waan wee, sins wi di liv eena di en a dis sistem a tingz.*
12 Soh if enibadi tink dehn di stan op schrang, mek dehn bee kyaaful dat dehn noh faal dong.
13 Eni temtayshan weh unu goh chroo da di saym laik weh evribadi els goh chroo. Bot Gaad faytful, ahn hihn noh wahn mek di temtayshan geh soh bad dat unu kyaahn bayr it. Bot wen di temtayshan kohn, hihn wahn mek wahn way owt soh dat unu ku bayr it.
14 Soh den, mi dyaa bradaz, unu mosn ga notn fi du wid aidol wership.
15 Ah di taak tu unu laik peepl weh ga gud andastandin. Joj fi unuself if Ah di tel unu di chroot er nat.
16 Wen wi jrink fahn di kop a blesin weh wi bles, wi di shayr eena di blod a di Krais. Ahn wen wi eet fahn di bred weh wi brok, wi di shayr eena di badi a di Krais.
17 Onli wan bred deh an aala wi eet fan it. Soh eevn doa da lata wi, aala wi da wan badi.
18 Luk pahn di Izrelait dehn: Wen dehn eet di sakrifais, dehn di tek paat eena wership da di alta.
19 Soh, weh Ah di seh? Dat sohnting weh peepl sakrifais tu wahn aidol meen eniting, er dat wahn aidol da wahn reel gaad?
20 No, Ah di seh dat wen peepl fahn di nayshanz mek sakrifais, dehn mek sakrifais tu di deemon dehn ahn noh tu Gaad. An Ah noh waahn unu ga notn fi du wid di deemon dehn.
21 Unu kyaahn jrink fahn di kop a Jehoava ahn fahn di kop a di deemon dehn. Unu kyaahn eet fahn “di taybl a Jehoava” ahn fahn di taybl a di deemon dehn.
22 Weh wi di du? ‘Wi di chrai mek Jehoava jelos’? Wee noh schranga dan Gaad, noh chroo?
23 Wi free fi du eniting weh wi waahn. Bot da noh evriting weh wi du wahn bee gud fi adaz. Wi free fi du eniting weh wi waahn. Bot da noh evriting weh wi du wahn inkorij adaz.
24 Mek wi kantinyu fi tink bowt weh gud fi adaz, ahn noh jos weh gud fi wiself.
25 Unu ku eet eni meet weh peepl sel da maakit. Bot bikaaz a unu kanshans, noh aks wehpaat ih kohn fram.
26 Kaaz “di ert an evriting eena it bilangz tu Jehoava.”
27 If sombadi weh da noh wahn bileeva invait unu fi eet an unu waahn goh, den eet wateva dehn giv unu. Sayka unu kanshans, noh aks wehpaat ih kohn fram.
28 Bot if enibadi tel unu, “Dis da sohnting weh mi geh aafa op az wahn sakrifais,” noh eet it kaaz unu ku ofen da persn ahn goh gens ih kanshans.
29 Ah noh di taak bowt fi unu kanshans, bot Ah di taak bowt di neks persn kanshans. Wai wahn nada persn kanshans shuda joj mai freedom?
30 If Ah tank Gaad fi weh Ah eet, den wai enibadi wahn taak bad bowt mee jos kaaz Ah eet it?
31 Soh den, weda unu di eet er jrink er du eniting els, unu mos du evriting fi bring gloari tu Gaad.
32 Bee kyaaful dat unu noh ofen di Joo dehn ahn di Greek dehn ahn di kangrigayshan a Gaad,
33 jos laik how Ai chrai pleez evribadi eena evriting. Ah di put ada peepl heda miself soh dat Gaad ku sayv dehn.
Futnoat
^ Er “da rak da-mi.”
^ Si di Glasari, “Sekshwal imoraliti.”
^ Si di Glasari, “Sekshwal imoraliti.”
^ Si di Glasari, “Sistem a tingz.”
