1 Korintyanz 12:1-31
12 Now, mi bradaz, Ah waahn mek unu noa bowt di gif dehn weh kohn fahn di spirit.
2 Unu noa dat wen unu da-mi peepl a di nayshanz,* unu mi wership aidol weh kyaahn taak an unu mi du wateva dehn mi waahn unu du.
3 Ah waahn mek unu noa dat nobadi kyaahn seh: “Kers Jeezas!” if Gaad spirit di gaid dehn. Ahn nobadi kyaahn seh: “Jeezas da di Laad!” eksep if di hoali spirit di gaid dehn.
4 Now difrent gif deh, bot aala dehn kohn fahn di saym spirit.
5 Lata difrent wayz deh fi serv, bot onli wan Laad deh.
6 Difrent wayz deh how Gaad werk eena peepl, bot da di saym Gaad werk eena evribadi.
7 Ih klyaa fi si weh di hoali spirit di help eech persn du fi benifit adaz.
8 Kaaz da saym spirit mek wan persn taak wid wizdom,* ahn da saym spirit mek wahn nada persn taak wid nalij.
9 Ahn da saym spirit mek wan persn ga fayt, ahn da saym spirit gi wahn neks persn di gif fi heel.
10 Da saym spirit mek som peepl du miraklz, ahn mek adaz prafesai. Som ku noa weda er nat sohnting weh sombadi teech kohn fahn Gaad. Som ku taak difrent langwij,* an adaz ku chranslayt di difrent langwij dehn.
11 Bot da di saym spirit giv aala dehndeh gif tu peepl, an ih shayr it tu eech wan akaadn tu ih wil.
12 Jos laik how wahn badi ga lata paats, an aala di paats mek op wan badi, da rait soh wid di Krais.
13 Aala wi mi geh baptaiz wid wan spirit fi mek op wan badi, weda wi da Joo er Greek, weda wi da wahn slayv er wi free, an aala wi jrink fahn wan spirit.
14 Di badi noh ga jos wan paat, bot ih ga lata paats.
15 If di fut wuda seh, “Sins Ai da noh wahn han, Ai da noh paat a di badi,” dat noh meenz dat ih da noh paat a di badi.
16 An if di ayz wuda seh, “Sins Ai da noh wahn aiy, Ai da noh paat a di badi,” dat noh meenz dat ih da noh paat a di badi.
17 If di hoal badi da-mi wahn aiy, wid wat wi wuda hyaa? If di hoal badi da-mi wahn ayz, wid wat wi wuda smel?
18 Bot now Gaad don put eech paat a di badi eena dehn plays di way how hihn waahn.
19 If di hoal badi da-mi jos wan paat, how dat kuda bee wahn badi?
20 Now lata difrent paats deh, bot da jos wan badi.
21 Di aiy kyaahn tel di han, “Ai noh need yoo.” Ahn di hed kyaahn tel di fut, “Ai noh need yoo.”
22 Az a mata a fak, eevn doa som paats a di badi luk week, wi stil need dehn.
23 Ahn wi chreet dehn paat a di badi weh wi tink ga les aana wid grayta aana, ahn wi shoa moa rispek fi dehn paat a wi badi weh wi tink shaymful.
24 Bot di paats weh luk gud noh need notn. Ahn soh Gaad mi put aala di paats a di badi tugeda eena soch a way dat di paat dehn weh ga les aana geh grayta aana.
25 Soh di badi noh sopoas tu ga no divizhan, bot aala di paat dehn fi tek kayr a wan anada.
26 If wan paat sofa, aala di ada paat dehn sofa lang wid it. Er if wan paat geh aana, aala di ada paat dehn rijais lang wid it.
27 Now unu da Krais badi, an eech wan a unu da paat a fi hihn badi.
28 Gaad put eech persn eena di kangrigayshan: fers, di apasl dehn; sekant, di prafit dehn; terd, di teecha dehn. Ih put som peepl fi du miraklz, an adaz ga di gif fi heel. Ih put som a dehn fi help adaz, ahn som fi tek di leed, an adaz ku taak eena difrent langwij.
29 Weh unu tink? Aala dehn da apasl? Aala dehn da prafit? Aala dehn da teecha? Aala dehn ku du miraklz?
30 Aala dehn ga di gif fi heel? Aala dehn ku taak eena difrent langwij? Aala dehn ku chranslayt difrent langwij?
31 Bot unu mos kip di werk haad fi geh di grayta gif dehn. Ahn now Ah wahn shoa unu wahn moch beta way.
Futnoat
^ Dis di taak bowt wen dehn neva yet bileev eena Gaad.
^ Er “gi wan persn wahn mesij a wizdom.”
^ Er “difrent tongz.”
