1 Korintyanz 13:1-13
-
Lov da di bes way (1-13)
13 If Ah taak aala di langwij dehn weh peepl taak ahn di langwij weh di aynjel dehn taak, bot Ah noh ga lov, den Ai da jos laik wahn bel weh di ring er wahn emti jrom weh di mek lata naiz.
2 An if Ah ku prafesai an andastan aala di hoali seekrit dehn, an if Ah noa evriting, an if mi fayt soh schrang dat Ah ku moov di mongtin dehn, bot Ah noh ga lov, den Ai da noh notn.*
3 An if Ah sel evriting weh Ah gat soh dat Ah ku feed adaz, an if Ah giv op mi laif soh dat Ah ga reezn fi goh aan boasi, bot Ah noh ga lov, den non a dat noh wahn du mi no gud.
4 Lov payshent ahn kain. Lov noh jelos, ih noh bregin, an ih noh prowd.
5 Lov noh ignarant, an ih noh tink onli bowt ih oanself. Lov noh eezi fi geh beks, an ih noh hoal malis.
6 Lov noh rijais oava notn weh noh raichos, bot ih rijais wid di chroot.
7 Lov bayr op anda evriting, bileev evriting, hoap eena evriting, an ih noh giv op noh mata weh hapm.
8 Lov wahn neva fayl. Bot if Gaad gi sombadi di gif fi prafesai, da gif wahn kohn tu wahn en. If ih gi sombadi di gif fi taak difrent langwij, dat wahn stap tu. If ih gi dehn di gif a nalij, da gif wahn kohn tu wahn en.
9 Sins wi noh noa evriting, wi kyaahn prafesai bowt evriting.
10 Bot wen wi noa evriting, wi wahn ku prafesai bowt evriting.
11 Wen Ai da-mi pikni, Ah yoostu taak laik pikni, tink laik pikni, an eksplayn tingz laik pikni. Bot now dat Ai da wahn man, Ah noh goh aan laik pikni nohmoh.
12 Now da laik if wi di luk eena wahn miro weh mek owta metal, ahn wi noh di si tingz klyaa. Bot aftawodz wi wahn si gud, laik if wi deh wid sombadi fays-tu-fays. Now Ah noh noa evriting bowt Gaad, bot soon Ah wahn noa evriting bowt ahn, jos laik how hihn noa evriting bowt mee.
13 Now wi wahn aalwayz ga fayt, hoap, ahn lov. Bot di graytis wan da lov.
Futnoat
^ Er “Ai yoosles.”
