1 Korintyanz 14:1-40
14 Kip aan di shoa lov, ahn chrai haad fi geh di gif dehn weh kohn fahn di spirit tu, espeshali di gif a prafesi.
2 Wahn persn weh ga di gif fi taak eena difrent langwij di taak tu Gaad ahn noh tu peepl, bikaaz nobadi noh andastan weh ih di seh, eevn doa ih di taak bowt di hoali seekrit dehn* a di spirit.
3 Bot enitaim sombadi prafesai, ih wahn inkorij ahn komfert ahn schrentn peepl.
4 Wahn persn weh taak eena difrent langwij onli schrentn ihself, bot di persn weh prafesai schrentn wahn hoal kangrigayshan.
5 Now Ah wuda waahn aala unu ga di gif fi taak eena difrent langwij, bot Ah prifaa dat unu prafesai. Kaaz ih beta fi mek unu prafesai dan fi mek unu taak eena difrent langwij, anles sombadi chranslayt weh unu seh, kaaz dat wahn schrentn di kangrigayshan.
6 Bot mi bradaz ahn sistaz, if Ah wuda kohn tu unu now di taak eena difrent langwij, weh gud dat wuda du unu? If Ah waahn help unu, Ah haftu taak tu unu wid nalij, er tel unu wahn revilayshan fahn Gaad, er wahn prafesi, er wahn teechin.
7 Da di saym wid di inschrument dehn weh mek myoozik, laik floot er haap. If wahn persn noh play difrent noat pahn di floot er di haap, how peepl wahn ku noa weh sang ih di play?
8 An if sombadi weh di bloa wahn chrompit noh play it gud ahn klyaa, hoo wahn geh redi fi waar?
9 Saym way soh, if unu yooz werdz weh noh eezi fi andastan, how enibadi wahn ku noa weh unu di seh? Dat wuda bee jos laik if unu di taak tu di breez.
10 Dehn ga lata difrent langwij weh peepl taak eena di werl, an aala dehn ga meenin.
11 Kaaz if Ah noh andastan di langwij weh sombadi di taak, Ai wahn bee wahn farina tu ahn, an di wan weh di taak wahn bee wahn farina tu mee.
12 Soh sins unu waahn di gif dehn weh kohn fahn di spirit soh bad, unu shuda chrai fi geh moa gif soh dat unu ku schrentn di kangrigayshan.
13 Soh di persn weh ga di gif fi taak eena wahn nada langwij shuda pray dat ih ku chranslayt it.
14 Kaaz if Ah di pray eena wahn nada langwij, Ah di pray bikaaz a di gif weh Ah get chroo di hoali spirit, bot eena mi main Ah noh andastan weh Ah di seh.
15 Soh den, weh Ah wahn du? Ah wahn pray wid di gif a di hoali spirit, bot Ah wahn pray eena di langwij weh Ah andastan tu. Ah wahn sing prayz wid di gif a di hoali spirit, bot Ah wahn sing prayz eena di langwij weh Ah andastan tu.
16 Adawaiz, if unu aafa prayz wid wahn gif weh unu geh chroo di hoali spirit, how wahn aadineri persn weh deh monks unu wahn ku seh “Aymen” wen unu gi tanks, sins ih noh noa weh unu di seh?
17 Da chroo, unu di gi tanks eena wahn veri gud way, bot unu noh di schrentn di ada persn.
18 Ah tank Gaad dat Ah ku taak moa langwij dan aala unu.
19 Stilyet, wen Ah deh wid wahn kangrigayshan, Ah wuda rada seh faiv werdz weh Ah ku andastan, soh dat Ah ku teech adaz, insteda ten towzn werdz eena wahn neks langwij weh nobadi andastan.
20 Mi bradaz ahn sistaz, unu noh fi tink laik pikni, bot unu fi bee laik pikni wen ih kohn tu badnis. Unu fi bee machoar eena di way unu tink.
21 Da jos laik weh rait dong eena di Laa: “Jehoava seh, ‘Ah wahn yooz schraynjaz ahn farinaz weh taak difrent langwij fi taak tu dis peepl. An eevn soh, dehn noh wahn lisn tu mi.’”
22 Soh den, wen peepl taak eena difrent langwij, dat da wahn sain fi peepl weh noh bileev eena Jeezas, noh fi peepl weh bileev. Pahn di ada han, prafesi da fi peepl weh bileev eena Jeezas, noh fi peepl weh noh bileev.
23 Soh if evribadi eena di kangrigayshan kohn tugeda an aala dehn taak difrent langwij saym taim, den wen aadineri peepl er peepl weh da noh bileeva kom een, weh unu tink dehn wahn seh? Unu noh tink dehn wahn seh dat unu don looz unu main?
24 Bot if aala unu di prafesai ahn wahn aadineri persn er sombadi weh da noh wahn bileeva kom een, ih wahn geh kongsl fahn evribadi weh di taak, an ih wahn chek ihself gud.
25 Den ih wahn klyaa fi si weh deh eena ih haat, an ih wahn neel dong ahn wership Gaad, an ih wahn seh: “Gaad deh wid unu fi chroo!”
26 Soh den, weh unu fi du, bradaz ahn sistaz? Wen unu kohn tugeda, wan a unu ku sing tu Gaad, wan ku teech, ahn wan ku giv wahn revilayshan. Wan a unu ku taak difrent langwij, ahn wahn neks wan ku chranslayt dehn. Unu mos du evriting fi schrentn wan anada.
27 An if enibadi taak eena wahn nada langwij, noh mek moa dan too er chree peepl taak, ahn mek dehn tek tern, ahn sombadi fi chranslayt weh dehn seh.
28 Bot if nobadi noh dehdeh fi chranslayt, dehn fi kip kwaiyet eena di kangrigayshan, ahn dehn fi taak tu dehnself ahn tu Gaad.
29 Too er chree prafit ku taak, ahn di res fi lisn soh dat dehn ku andastan di meenin a weh dehn seh.
30 Bot if sombadi geh wahn revilayshan wail ih di sidong rait deh wid unu, mek di persn weh di taak kip kwaiyet soh dat di ada persn ku taak.
31 Laik dat, aala unu ku tek tern fi prafesai, soh dat aala unu ku laan ahn geh inkorij.
32 Ahn di prafit dehn fi kanchroal di way dehn yooz di gif a di spirit.
33 Kaaz Gaad da wahn Gaad a pees, an ih du evriting eena wahn aadali way.
Jos laik eena aala di kangrigayshan a di hoali peepl,
34 di uman dehn fi kip kwaiyet eena di kangrigayshan, kaaz dehn noh ga permishan fi taak. Bot dehn fi bee wilin fi obay, jos laik weh di Laa seh.
35 If dehn noh andastan sohnting, dehn fi aks dehn hozban wen dehn goh hoam, kaaz da wahn shaym fi mek wahn uman taak eena di kangrigayshan.
36 Tel mi, Gaad werd mi kohn fahn unu? Da onli unu mi get it ahn nobadi els?
37 If enibadi tink dat ih da wahn prafit er ih ga wahn gif weh kohn fahn di spirit, ih haftu aksep dat di tingz weh Ah di rait tu unu da di Laad komanment.
38 Bot if enibadi ignoar dat, den Gaad wahn ignoar dehn tu.*
39 Soh mi bradaz ahn sistaz, kip aan di werk haad fi prafesai, ahn noh stap nobadi fahn taak difrent langwij.
40 Bot unu mos du evriting eena wahn deesent an aadali way.
Futnoat
^ Er “saykrid seekrit dehn.” Si di Glasari, “Hoali seekrit.”
^ Dis ku aalso bee “if enibadi noh waahn andastan dis, ih wahn kantinyu fi noh andastan.”
