1 Korintyanz 16:1-24
16 Now Ah waahn taak tu unu bowt di moni weh unu wahn kalek fi di hoali peepl, soh dat unu ku fala di saym inschrokshanz weh Ah mi giv tu di kangrigayshan dehn da Galaysha.
2 Pahn di fers day a evri week, eech wan a unu fi set sohnting wan said akaadn tu humoch moni unu mek, soh dat unu noh haftu kalek no moni wen Ah reech.
3 Bot wen Ah reech, Ah wahn sen sohn bradaz tu Jeroosalem fi kehr di doanayshan weh unu mi wilin fi giv. Ah wahn sen di bradaz weh unu mi rekomen eena unu leta.
4 Bot if ih beta fi mek Ai goh tu, den dehn gwehn lang wid mee.
5 Bot Ah wahn kohn si unu afta Ah paas chroo Masidoanya, kaaz Ah di plan fi chravl chroo Masidoanya.
6 An Ah mait stay wid unu fi wahn lee wail er eevn spen di winta wid unu soh dat aftawodz unu ku goh wahn lee wayz wid mi tu wehpaat Ah mait goh neks.
7 Ah noh waahn vizit unu jos fi wahn lee wail, bikaaz Ah hoap fi spen sohn taim wid unu, if Jehoava alow mi.
8 Bot Ah di stay da Efisos til Pentikaas,
9 bikaaz wahn doa oapm op tu mi weh gi mi di apachooniti fi du lata werk, bot lata peepl deh gens mi tu.
10 Now if Timoti reech deh, mek shoar dat ih noh ga notn fi wori bowt wail ih deh wid unu, bikaaz hihn di werk fi Jehoava, jos laik mee.
11 Soh den, noh mek nobadi luk dong pan ahn. Sen ahn pan ih way eena pees soh dat ih ku kohn tu mi, bikaaz mee ahn di ada bradaz di wayt far ahn.
12 Now Ah waahn taak tu unu bowt wi brada Apolos. Ah mi inkorij ahn fi goh lang wid di bradaz wen dehn vizit unu. Hihn neva ga planz fi goh now, bot ih gwehn wen ih geh di chaans.
13 Unu mos aalwayz deh pahn unu gyaad. Stan op schrang eena di fayt. Aalwayz shoa korij ahn schrentn unuself.
14 Mek shoar evriting weh unu du, unu du owta lov.
15 Unu noa dat di peepl weh liv eena Stefanas hows da-mi di fers set a peepl fi bee Krais disaipl da Akaya, ahn dat dehn mi werk haad fi serv aala di hoali peepl. Soh den, mi bradaz ahn sistaz, dis da weh Ah di inkorij unu fi du:
16 Put unuself anda peepl laik dehndeh an evribadi els weh di werk haad lang wid dehn tu.
17 Bot Ah onli hapi dat Stefanas ahn Fortyunaatos an Akaykos deh ya wid mi, bikaaz dehn mek op fi weh unu noh deh ya.
18 Kaaz dehn mi inkorij mee ahn dehn mi inkorij unu tu. Ahn soh unu mos aana bradaz laik dehndeh.
19 Di kangrigayshan dehn da Aysha seh fi tel unu heloa. Akwila ahn Priska ahn di kangrigayshan weh meet eena dehn hows sen dehn waam greetinz tu unu eena di naym a di Laad.
20 Aala di bradaz ahn sistaz seh fi tel unu heloa. Greet wan anada wid wahn hoali kis.
21 Dis da mee, Paal, di seh heloa tu unu eena mi oan hanraitin.
22 Enibadi weh noh lov di Laad dizerv fi geh kandem. Laad, pleez kohn soon!
23 Ah pray dat di Laad Jeezas shoa unu ih grayt kainis.*
24 Ah waahn mek unu noa dat Ah lov aala unu weh da wan wid Krais Jeezas.
Futnoat
^ Si di Glasari, “Grayt kainis.”
