1 Korintyanz 2:1-16
2 Soh, mi bradaz, wen Ah mi kohn tu unu, Ah neva kohn fi impres unu wid fansi werdz er wid mi oan wizdom wen Ah tel unu bowt Gaad hoali seekrit.*
2 Kaaz wen Ah mi deh wid unu Ah mi disaid fi taak onli bowt Jeezas Krais ahn fi hihn det pahn di stayk.
3 Ahn wen Ah mi kohn tu unu, Ah mi week ahn frayd, an Ah mi-di chrimbl anaal.
4 Ahn wen Ah mi taak ahn preech, Ah neva chrai kanvins unu wid fansi werdz laik weh waiz peepl yooz. Bot insteda dat, mi werdz mi shoa di powa a di hoali spirit,
5 soh dat unu put unu fayt eena Gaad powa, ahn noh eena hyooman wizdom.
6 Now wi di taak bowt wizdom monks peepl weh machoar, noh bowt di wizdom a dis sistem a tingz* ner di wizdom a peepl weh rool eena dis sistem a tingz, kaaz dehn wahn soon kohn tu notn.
7 Bot wi di taak bowt Gaad wizdom weh hihn mi haid eena wahn hoali seekrit.* Fahn bifoa dehnya sistem a tingz mi egzis, Gaad mi disaid fi yooz da wizdom fi gi wee gloari.
8 Dat da di wizdom weh non a di peepl weh rool eena dis sistem a tingz* neva noa, bikaaz if dehn mi noa it, dehn neva mi wahn kil wi grayt Laad.*
9 Bot jos laik weh rait dong eena di skripcha: “Nobadi si ahn nobadi hyaa, ahn peepl kyaahn imajin eena dehn haat di tingz weh Gaad pripyaa fi peepl weh lov ahn.”
10 Bikaaz Gaad shoa wi dehnya tingz chroo ih hoali spirit. Ahn di spirit saach chroo evriting, eevn di deep tingz a Gaad.
11 Nobadi noh noa weh sombadi els di tink. Onli da persn ku noa weh deh eena ih oan haat. Saym way soh, nobadi noh noa Gaad tinkin anles Gaad gi dehn ih spirit.
12 Now wee mi geh di spirit a Gaad, noh di spirit a di werl, soh dat wi ku noa di tingz weh Gaad gi wi owta kainis.
13 Soh wen wi taak bowt dehndeh tingz, wi yooz werdz weh wi laan fahn di spirit, ahn noh werdz weh wi laan fahn hyooman wizdom. Wi eksplayn* spirichwal mataz wid spirichwal werdz.
14 Wahn fizikal man noh aksep di tingz weh kohn fahn di spirit a Gaad, kaaz tu hihn dehndeh tingz foolish. An ih kyaahn noa dehn, kaaz di onli way ih ku joj dehndeh tingz da if ih ga Gaad spirit.
15 Bot wahn spirichwal man ku joj evriting, ahn nobadi kyaahn joj hihn.
16 Kaaz laik weh di skripcha seh: “Hoo ku noa di main a Jehoava, soh dat ih ku tel ahn weh fi du?” Bot wi doo ga di main a Krais.
Futnoat
^ Er “saykrid seekrit.” Si di Glasari, “Hoali seekrit.”
^ Si di Glasari, “Sistem a tingz.”
^ Er “saykrid seekrit.” Si di Glasari, “Hoali seekrit.”
^ Si di Glasari, “Sistem a tingz.”
^ Er “nayl wi grayt Laad pahn di stayk.”
^ Er “Wi put tugeda.”
