1 Korintyanz 3:1-23
3 Soh mi bradaz, Ah kudn taak tu unu laik how Ah taak tu spirichwal peepl, bot Ah taak tu unu laik peepl a di werl, kaaz unu da laik baybi eena di way a Krais.
2 Ah mi giv unu milk fi jrink. Ah neva giv unu salid food fi eet, bikaaz unu neva schrang inof. Az a mata a fak, unu stil noh schrang inof now,
3 bikaaz unu stil di ak laik peepl a di werl. Sins unu jelos wan anada ahn fait op monks unuself, unu di ak jos laik peepl a di werl.
4 Bikaaz wen sombadi seh, “Ai di fala Paal,” bot sombadi els seh, “Ai di fala Apolos,” unu di ak laik peepl a di werl fi chroo.
5 Soh den, hoo da Apolos? Ahn hoo da Paal? Wee da jos servants weh di du di Laad werk, ahn wi mi teech unu fi fala Jeezas.
6 Ai mi plaant di seed, an Apolos mi waata it, bot da Gaad mek ih groa.
7 Soh di persn weh plaant ahn di persn weh waata da notn, bot Gaad da di wan weh mek ih groa.
8 Now di persn weh plaant ahn di persn weh waata di werk tugeda,* bot eech persn wahn geh ih oan riwaad akaadn tu di werk weh ih du.
9 Wee di werk lang wid Gaad, an unu da laik wahn feel weh Gaad di koltivayt, er wahn hows weh Gaad di bil.
10 Gaad shoa mi grayt kainis,* ahn dat da wai Ah kuda bee wahn waiz maasta bilda. Ahn soh Ah bil wahn fongdayshan, bot sombadi els di bil tap a it now. Bot evribadi haftu bee kyaaful how dehn bil pahn da fongdayshan,
11 kaaz nobadi kyaahn bil wahn nada fongdayshan. Di onli fongdayshan da Jeezas Krais.
12 Now enibadi ku bil pahn di fongdayshan wid goal, silva, preshos stoan, boad, er jrai graas.
13 Di day wahn kohn wen peepl wahn si weh kaina werk eech persn du, kaaz faiya wahn shoa weh kaina werk ih du.
14 If di faiya noh bon dong wat eech persn bil pahn da fongdayshan, den dehn wahn geh wahn riwaad.
15 Bot if di faiya bon dong wat eech persn bil, dehn wahn looz evriting. Dehn wahn geh sayv, bot dehn wahn bee laik peepl weh geh sayv owta di faiya.
16 Unu noh noa dat unu da Gaad templ, ahn dat di spirit a Gaad deh eena unu?
17 If enibadi dischrai di templ a Gaad, Gaad wahn dischrai dehn tu. Kaaz di templ a Gaad hoali, an unu da Gaad templ.
18 Noh mek nobadi fool dehnself: If enibadi monks unu tink dat ih waiz eena dis sistem a tingz,* den mek ih bee wahn fool, soh dat ih ku bee waiz fi chroo.
19 Bikaaz di wizdom a dis werl da foolishnis tu Gaad. Da jos laik weh rait dong eena di skripcha: “Hihn kech dehn wan weh waiz eena dehn oan wizdom.”
20 Ahn wahn nada skripcha seh: “Jehoava noa dat di tinkin a waiz peepl noh gud fi notn.”
21 Soh noh mek nobadi boas bowt weh peepl du. Kaaz evriting bilangz tu unu,
22 weda da Paal er Apolos er Seefas* er di werl er laif er det er tingz weh deh ya now er tingz weh wahn kohn, evriting bilangz tu unu.
23 An unu bilangz tu Krais, ahn Krais bilangz tu Gaad.
Futnoat
^ Er “ga wan perpos.”
^ Si di Glasari, “Grayt kainis.”
^ Si di Glasari, “Sistem a tingz.”
^ Seefas da wahn nada naym fi Peeta.
