1 Korintyanz 5:1-13
5 Akchwali, Ah hyaa dat wahn man deh monks unu weh di liv wid* ih pa waif. Da kaina sekshwal imoraliti* nat eevn egzis monks peepl a di nayshanz.
2 An unu prowd a dat? Insteda dat, unu sopoas tu feel sad, an unu fi put di man weh di du dat owt fahn monks unu.
3 Eevn doa Ah noh dehdeh wid unu, Ah di tink bowt unu prablem, an Ah don joj di man weh di du dat jos laik if Ah mi dehdeh wid unu.
4 Wen unu gyada tugeda eena di naym a wi Laad Jeezas, da laik if Ah dehdeh wid unu lang wid di powa a wi Laad Jeezas.
5 Unu mos han da kaina man oava tu Saytan soh dat unu ku dischrai ih sinful wayz. Dat wahn protek di spirit a di kangrigayshan joorin di day a di Laad.
6 Unu di boas, ahn dat noh gud. Weh hapm? Unu noh noa dat wahn lee bit a ees mek di hoal bred doa rayz?
7 Geh rid a di oal ees soh dat unu ku bee wahn nyoo bred doa weh noh gat een no ees. Kaaz Krais, wi Paasoava lam, mi ded az wahn sakrifais.
8 Soh den, wi noh fi selibrayt di ada festival* wid oal ees, ner wid ees weh stan fi sin er wikidnis. Bot insted, mek wi eet bred weh noh gat een no ees, weh stan fi wahn raichos an aanis haat.
9 Eena mi leta Ah mi rait tu unu dat unu fi stap spen taim wid peepl weh praktis sekshwal imoraliti.*
10 Now Ah noh meen dat unu fi separayt unuself kompleetli fahn di peepl eena dis werl weh praktis sekshwal imoraliti* er weh greedi er weh teef er weh wership aidol. Kaaz den unu wuda haftu get owta dis werl fi chroo.
11 Bot now Ah di rait tu unu fi stap spen taim wid eni brada weh praktis sekshwal imoraliti* er weh greedi er weh wership aidol er weh slanda peepl er weh da wahn jronkad er weh teef. Noh eevn eet wid sombadi laik dat.
12 Kaaz da noh mai plays fi joj peepl weh deh pahn di owtsaid.* Unu fi joj peepl weh deh pahn di eensaid, noh chroo?
13 Ahn Gaad fi joj peepl weh deh pahn di owtsaid. Da jos laik weh di skripcha seh: “Unu fi tek owt di wikid persn fahn monks unu.”
Futnoat
^ Er “weh ga.”
^ Di Greek werd da por·nei′a. Si di Glasari, “Sekshwal imoraliti.”
^ Dis ku rifaa tu di Festival a di Bred Widowt Ees. Si di Glasari, “Festival a di Bred Widowt Ees.”
^ Si di Glasari, “Sekshwal imoraliti.”
^ Si di Glasari, “Sekshwal imoraliti.”
^ Si di Glasari, “Sekshwal imoraliti.”
^ Er “peepl weh da noh paat a di Kristyan kangrigayshan.”
