1 Korintyanz 7:1-40
7 Now mek Ah taak tu unu bowt di tingz weh unu mi rait tu mi. Ih beta if wahn man noh toch* wahn uman.
2 Bot bikaaz sekshwal imoraliti soh kaman,* mek evri man ga ih oan waif, ahn mek evri uman ga ih oan hozban.
3 Di hozban sopoas tu satisfai di needz a ih waif,* ahn saym way soh, di waif sopoas tu satisfai di needz a ih hozban.
4 Di waif noh ga no atariti oava ih oan badi. Da ih hozban ga atariti oava fi shee badi. Saym way soh, di hozban noh ga no atariti oava ih oan badi. Da ih waif ga atariti oava fi hihn badi.
5 Noh hoal bak fahn wan anada anles di too a unu agree fi du dat fi wahn set taim. Den unu ku set taim wan said fi pray, ahn den aftawodz unu ku kohn tugeda agen, soh dat Saytan noh kip di temp unu sayka weh unu noh ga self-kanchroal.
6 Ah di seh dat unu ku du dat if unu waahn, bot da noh wahn koman.
7 Bot Ah wish evribadi kuda bee singl laik mee. Stilyet, Gaad giv eech wan dehn oan gif. Dat da wai som stay singl, ahn som geh marid.
8 Now, Ah di tel enibadi weh noh marid er weh da wahn wido dat ih beta if dehn ku stay singl laik mee.
9 Bot if dehn noh ga self-kanchroal, dehn ku geh marid. Kaaz ih beta dehn geh marid dan fi ga dizaiyaz weh dehn kyaahn kanchroal.
10 Ah di giv inschrokshanz tu unu weh marid, dat wahn waif noh fi separayt fahn ih hozban. Dat da noh fahn mee, bot da fahn di Laad.
11 Bot if shee separayt fan ih hozban, mek ih stay singl, er els mek ih get bak tugeda wid ih hozban. Ahn wahn hozban noh fi lef ih waif.
12 Bot Ah di tel di res a unu dat if eni brada ga wahn waif weh da noh wahn bileeva ahn shee wilin fi stay wid ahn, den hihn noh fi lef ahn. Dat da fahn mee ahn noh fahn di Laad.
13 An if wahn uman ga wahn hozban weh da noh wahn bileeva ahn hihn wilin fi stay wid shee, den shee noh fi lef ih hozban.
14 Kaaz if di hozban noh bileev, bot ih waif da wahn bileeva, den hihn wahn bee hoali bikaaz a ih waif. An if wahn uman noh bileev, bot ih hozban da wahn bileeva, den shee wahn bee hoali bikaaz a ih hozban. Adawaiz, unu chiljren wudn bee kleen eena Gaad sait, bot now dehn hoali.
15 Bot if di wan weh noh bileev disaid fi goh,* mek ih goh. If dat da di kays, den di brada er sista free. Gaad giv unu pees.
16 Unu waif, how unu noa weda er nat unu wahn sayv unu hozban? Er, unu hozban, how unu noa weda er nat unu wahn sayv unu waif?
17 Bot ih gud fi mek eech persn liv akaadn tu weh Jehoava giv ahn, laik how ih mi deh wen Gaad kaal ahn fi bee wahn bileeva. Ahn soh Ah gi da inschrokshan tu aala di kangrigayshan dehn.
18 If enibadi mi serkomsaiz wen Gaad kaal ahn fi bee wahn bileeva, mek ih stay laik dat. If enibadi neva serkomsaiz yet wen Gaad kaal ahn fi bee wahn bileeva, ih noh fi geh serkomsaiz.
19 Ih noh meen notn if wahn man serkomsaiz er nat. Di impoatant ting da fi mek ih obay Gaad komanment dehn.
20 Eena wateva kandishan wahn persn mi deh wen Gaad kaal ahn fi bee wahn bileeva, mek ih stay eena da kandishan.
21 Yoo da-mi wahn slayv wen Gaad kaal yu? No wori bowt dat. Bot if yu ku geh free, tek di chaans.
22 If enibadi da-mi wahn slayv wen Gaad kaal ahn fi bee wan wid di Laad, den da persn free an ih bilangz tu di Laad. Eena da saym way, enibadi weh mi free wen Gaad kaal ahn fi bee wan wid di Laad da wahn slayv a Krais now.
23 Gaad mi pay wahn hai prais fi unu. Unu noh fi slayv fi nobadi els.
24 Mi bradaz, eena wateva kandishan wahn persn mi deh wen Gaad kaal ahn fi bee wahn bileeva, mek ih stay eena da saym kandishan eena Gaad sait.
25 Now Ah di taak bowt peepl weh da verjin.* Ah noh ga no koman fahn di Laad, bot Ah di taak tu unu bikaaz di Laad shoa mi mersi, soh unu ku chros weh Ah seh.
26 Soh den, bikaaz wi liv eena haad taimz, Ah tink dat di bes ting fi wahn persn du da fi kantinyu laik how ih deh.
27 If yu ga wahn waif, stay wid yu waif. If yu noh ga wahn waif, stap luk fi wahn waif.
28 Bot eevn if yu geh marid, yu noh di sin. An if wahn verjin geh marid, ih noh di sin. Bot peepl weh geh marid wahn ga lata prablemz. Ah di chrai sayv unu fahn dat.
29 Mi bradaz, Ah waahn unu noa dat onli wahn lee bit a taim lef. Fahn now aan, enibadi weh marid fi bee laik sombadi weh noh marid.
30 Enibadi weh di krai, fi bee laik sombadi weh noh di krai, an enibadi weh di rijais, fi bee laik sombadi weh noh di rijais. Enibadi weh di bai tingz, fi bee laik sombadi weh noh ga notn.
31 Enibadi weh di yooz di werl, fi bee laik sombadi weh noh di mek ful yoos a it. Di werl laik how wi noa it now* di chaynj.
32 Ah noh waahn unu wori bowt notn. Di singl man onli kansaan bowt di Laad werk bikaaz ih waahn pleez di Laad.
33 Di marid man wori bowt di tingz a di werl bikaaz ih waahn pleez ih waif,
34 ahn soh ih dischraktid. Pahn tap a dat, wahn uman weh noh marid er wahn verjin onli kansaan bowt di Laad werk, soh dat dehn ku bee hoali eena dehn badi ahn dehn main. Bot di marid uman wori bowt di tingz a di werl bikaaz shee waahn pleez ih hozban.
35 Bot Ah tel unu dat fi unu oan gud. Ah noh di chrai stap unu, bot Ah waahn inkorij unu fi du weh rait ahn fi mek unu kantinyu fi serv di Laad wid aala unu haat widowt dischrakshan.
36 If enibadi weh singl feel laik ih kyaahn kanchroal ih sekshwal dizaiyaz, an if di taim a ih yoot don paas, den dis da weh ih shuda du: Mek ih geh marid if dat da weh ih waahn du; ih noh di sin. Mek dehn geh marid.
37 Bot if enibadi don disaid eena ih haat ahn noh feel di need fi geh marid, an ih ku kanchroal ih oan dizaiyaz, an ih don mek op ih main fi stay singl,* ih wahn du gud.
38 Soh den, enibadi weh geh marid du gud, bot enibadi weh noh geh marid du beta.
39 Wahn waif haftu stay wid ih hozban az lang az hihn liv. Bot if ih hozban ded, shee free fi geh marid tu enibadi shee waahn, az lang az hihn da wahn falowa a di Laad.
40 Bot eena mai opinyan, shee wahn bee hapiya if shee stay singl. An Ah shoar dat Gaad spirit di gaid mi tu.
Futnoat
^ Dis di rifaa tu sekshwal kantak.
^ Rait ya Paal mi yooz di plooral faam a di Greek werd por·nei′a. Si di Glasari, “Sekshwal imoraliti.”
^ Dis di rifaa tu sekshwal rilayshan bitween hozban ahn waif.
^ Er “separayt.”
^ Er “weh neva geh marid bifoa.”
^ Er “Di seen a dis werl.” Dis di rifaa tu how di stayj eena wahn tayta stay di chaynj.
^ Er “stay wahn verjin.”
