1 Peeta 2:1-25
2 Soh geh rid a aal kaina wikidnis, ahn stap di chrai chrik peepl ahn jelos dehn ahn seh tingz fi insolt dehn, ahn noh bee wahn hipokrit.
2 Insteda dat, jos laik how wahn nyoobaan baybi onli waahn ih ma milk, unu fi waahn di pyoar milk weh deh eena di werd a Gaad, soh dat unu ku groa ahn geh sayv.
3 Bot di onli way unu ku du dis da if unu noa dat di Laad kain.*
4 Peepl rijek hihn az di livin stoan, bot Gaad mi chooz hihn, ahn hihn preshos tu Gaad. Wen unu shoa fayt eena ahn,
5 unu weh da laik livin stoanz di geh bil op intu wahn spirichwal hows fi bee wahn groop a hoali prees, soh dat unu ku aafa op spirichwal sakrifais weh Gaad pleez wid, chroo Jeezas Krais.
6 Kaaz wan paat a di Skripchaz seh: “Ai di set wahn stoan da Zaiyan, wahn stoan weh Ai pik ahn weh onli preshos. Da stoan da di kaanastoan fi di fongdayshan, ahn da stoan noh wahn let dong nobadi weh shoa dehn fayt eena it.”
7 Soh den, bikaaz unu bileev eena ahn, hihn preshos tu unu; bot fi dehn wan weh noh bileev eena ahn, dis da weh di Skripchaz seh, “di stoan weh di bilda dehn neva waahn, en op fi bee di moas impoatant kaanastoan.”*
8 Ih aalso en op fi bee “wahn stoan weh mek peepl stombl ahn wahn rak weh ofen dehn.” Dehn di stombl ahn faal dong bikaaz dehn noh obeedyant tu di werd a Gaad. Ahn dat wahn bee di en rizolt fi peepl laik dis.
9 Bot unu da “wahn chraib weh Gaad chooz, wahn groop a king weh serv az prees, ahn wahn hoali nayshan. Gaad mi chooz unu fi bee fi hihn peepl, soh dat unu ku anonks tu peepl evriway bowt di kainis” a di Wan weh kaal unu fahn owta di daaknis ahn bring unu intu ih wandaful lait.
10 Kaaz unu neva yoostu bee Gaad peepl, bot now unu da fi hihn peepl. Ahn hihn neva yoostu shoa unu mersi, bot now hihn di shoa unu mersi.
11 Mi dyaa bradaz ahn sistaz, eevn doa unu di liv az farinaz ahn schraynjaz eena dis werl, Ah stil waahn inkorij unu fi kantinyu fi fait gens eni sinful dizaiya weh di waar gens unu.*
12 Kip unu kandok gud monks di peepl a dis werl, soh dat wen dehn di akyooz unu seh dat unu du sohnting rang, dehn ku si fi dehnself dat unu di du tingz weh gud, ahn bikaaz a dat, dehn wahn aana Gaad pahn di day wen ih kohn fi mek ih inspekshan.
13 Du weh di Laad waahn yu du ahn put yuself anda di koman a evribadi weh ga atariti, noh kay if da tu wahn king bikaaz hihn haiya dan yoo,
14 er tu di govna dehn weh di king mi chooz fi ponish enibadi weh du rang bot fi prayz di wan dehn weh du gud.
15 Bikaaz da di wil a Gaad dat fi unu gud kandok ku put wahn stap tu* di foolish taak a peepl weh noh ga no sens.
16 Unu da free peepl, bot noh yooz unu freedom az wahn ekskyoos fi du weh rang, bot liv az peepl weh serv Gaad.
17 Unu mos shoa rispek fi aal kaina peepl, ga lov fi wi bradaz weh deh aal oava di werl, fyaa Gaad, ahn rispek di king.
18 If unu da wahn servant, put unuself anda di koman a fi unu maasta wid ful rispek, noh onli tu di wan dehn weh gud ahn weh ga wahn saaf haat, bot eevn tu di wan dehn weh haad fi pleez.
19 Bikaaz Gaad pleez wid enibadi weh bayr op anda chraiyal* ahn weh sofa sayka weh dehn waahn kip wahn gud kanshans fronta Hihn.
20 Weh kaina prayz unu wuda dizerv if dehn di beet unu fi weh unu sin an unu bayr it? Bot lesgoh seh dat unu di bayr op anda difrent kaina sofarin bikaaz unu di du gud tingz, now dat da sohnting weh Gaad pleez wid.
21 In fak, Gaad mi chooz unu fi sofa laik Krais, bikaaz Krais ihself mi sofa fi unu. Unu mos fala ih egzampl kloas-wan.*
22 Hihn neva komit no sin ner chrik enibadi.
23 Wen peepl mi insolt ahn, hihn neva insolt dehn bak. Wen adaz mi mek hihn sofa, ih neva chretn dehn, bot ih put ih hoap eena di Wan weh joj wid raichosnis.
24 Az a mata a fak, hihn kehr fi wee sin dehn eena fi hihn badi wen dehn mi nayl ahn pahn di stayk,* soh dat wi ku bee free fahn wi sin dehn ahn liv fi du tingz weh raichos. Ahn “sayka di brooz dehn weh hihn mi get, unu mi geh heel.”
25 Kaaz unu da-mi laik sheep weh laas dehn way, bot now unu fain unu way bak tu di shepad weh di wach oava unu soal.*
Futnoat
^ Er “if unu ekspeeryens di kainis a di Laad.”
^ Lit., “di hed a di kaana.”
^ Er “weh di fait gens unu soal.”
^ Lit., “ku mozl.”
^ Er “weh indyoar sofarin; weh indyoar payn.”
^ Er “Unu mos fala ih futstep dehn kloas-wan.”
^ Er “pahn di chree.”
^ Er “tu di shepad an oavaseeya a unu laif.”
