1 Peeta 3:1-22
3 Soh den, eena da saym way, unu waif, unu mos put unuself anda di atariti a unu hozban, soh dat if eni a dehn noh di obay di werd a Gaad, dehn mait staat tu obay bikaaz a how unu bihayv, an unu noh wahn haftu seh wahn werd,
2 bikaaz dehn wahn si fi dehnself unu gud kandok* ahn di deep rispek weh unu shoa.
3 Yu byooti noh fi bee pahn di owtsaid, fi egzampl, fansi hyaa stail ahn goal juwelri er ekspensiv kloaz;
4 insteda dat, yu byooti fi kohn fahn yu haat; ahn dis kaina byooti wahn neva fayd weh. Da byooti da wahn kwaiyet ahn jentl spirit, weh way moa impoatant tu Gaad.
5 Kaaz dat da di kaina byooti weh di hoali uman dehn eena di paas mi gat; dehn mi put dehnself anda di atariti a dehn hozban.
6 Memba dat Saara mi obay Aybraham; shee mi kaal ahn laad. An unu ku bee fi shee daata dehn if unu kantinyu fi du gud ahn noh giv een tu fyaa.
7 Eena da saym way tu, unu hozban, unu mos liv wid unu waif eena wahn way weh shoa dat unu andastan shee. Chreet ahn wid rispek kaaz shee da di uman ahn di weeka wan, ahn shee aalso wahn geh di kaina laif weh unu wahn get, weh da wahn kain gif fahn Gaad. Adawaiz, Gaad noh wahn hyaa unu pryaaz.
8 Fainali, aala unu mos bee wan eena di way unu tink, lov wan anada laik famili, shoa kompashan, ahn bee hombl.
9 Noh pay bak eevl fi eevl, er if sombadi insolt yu, noh insolt dehn bak. Insteda dat, du sohnting gud fi dehn, kaaz Gaad chooz unu fi gi blesinz tu adaz, soh dat hihn ku bles unu tu.
10 Kaaz “enibadi weh waahn injai laif ahn liv wid hapinis haftu chrai noh fi seh eniting bad ahn noh fi chrik adaz needa.
11 Da persn haftu ton ih bak pahn weh bad ahn du weh gud; ih need fi waahn ga pees wid adaz ahn kantinyu fi werk haad far it.
12 Kaaz Jehoava si di raichos wan dehn, an ih hyaa wen dehn di poar owt dehn haat eena pryaaz tu ahn, bot Jehoava ton ih bak pahn di wan dehn weh di du bad tingz.”
13 Tink bowt it, hoo ku haam unu if unu di du gud wid unu hoal haat?
14 Bot eevn if unu sofa bikaaz unu raichos, unu wahn stil bee hapi. Bot noh frayd fi weh adaz frayd fa,* ahn noh mek notn wori unu needa.
15 Bot aana di Krais az unu Laad eena unu haat, an aalwayz bee redi fi difen unu hoap fronta evribadi weh aks unu bowt it, bot mek shoar fi bee jentl ahn shoa deep rispek.
16 Kip wahn gud kanshans, soh dat wen peepl akyooz unu a eniting, dehn wahn geh shaym wen dehn si fi unu gud kandok az Krais falowaz.
17 Ih beta fi sofa bikaaz yu di du gud, if dat da weh Gaad alow, dan fi sofa bikaaz yu di du weh bad.
18 Kaaz Krais mi ded onli wan taim fi wi sin dehn. Hihn da-mi wahn raichos persn, an ih ded fi peepl weh noh raichos, soh dat hihn ku help wi fain Gaad. Hihn da-mi wahn man wen dehn kil ahn, bot hihn da-mi wahn spirit wen Gaad rezorek ahn bak tu laif.
19 An az wahn spirit, hihn gaahn preech wahn jojment mesij tu di aynjel dehn weh deh eena prizn.
20 Dehn neva obeedyant wen Gaad mi-di wayt payshent-wan* eena Noawa dayz, wen Noawa an ih famili mi-di bil di aak. Da aak mi kehr wahn fyoo peepl—ayt soal—* chroo di flod waata soh dat dehn kuda mi geh sayv.
21 Wi ku kompyaa weh mi hapm bak den tu di baptizm weh di sayv unu now, weh unu mi wilin fi du bikaaz a fayt eena Jeezas Krais hoo don kohn bak tu laif. Di perpos a baptizm da noh fi wash aaf di dert fahn yu skin, bot da fi mek yu aks Gaad fi wahn gud kanshans.
22 Ahn wi noa dat Jeezas deh da Gaad rait han, kaaz ih gaahn bak da hevn, ahn di aynjel dehn ahn di wan dehn weh gat atariti ahn powa da hevn obay ahn.
Futnoat
^ Er “unu kleen kandok.”
^ Dis ku aalso bee “noh frayd wen dehn chretn yu.”
^ Lit., “wen di payshens a Gaad mi-di wayt.”
^ Er “ayt persn.”
