1 Peeta 4:1-19
4 Soh den, sins Krais mi sofa wen hihn da-mi wahn hyooman, unu need fi bee redi fi ga di saym atichood laik hihn;* bikaaz wahn persn weh sofa shoa dat ih stap praktis sin,
2 soh dat wail ih alaiv, ih ku liv fi du di wil a Gaad, ahn noh liv fi ihself.
3 Kaaz unu mi spen inof taim eena di paas di du weh peepl weh noh noa Gaad du. Unu yoostu bihayv eena wahn brayzn way,* unu mi jos waahn du loan imoaral tingz, geh jronk, goh da wail paati, goh da jrinkin paati jos fi si hoo ku jrink moa dan evribadi els, ahn wership aidol eena lata disgostin wayz.
4 Now, dehndeh saym peepl sopraiz dat unu noh kantinyu fi tek paat eena fi dehn way-owt laifstail, ahn soh dehn insolt unu op.
5 Bot dehndeh peepl wahn haftu gi wahn akonk tu Krais fi di tingz weh dehn du; hihn da di wan weh wahn joj di livin ahn di ded.
6 In fak, dat da di reezn wai di gud nyooz mi geh preech eevn tu di ded,* soh dat eevn doa peepl joj dehn bays pahn how dehn luk, dehn ku liv anda di gaidans a di spirit a Gaad.
7 Bot di en deh kloas. Soh den, unu mos bee sensabl ahn yooz gud jojment; unu mos aalwayz rimemba dat unu need fi pray.
8 Bot moa dan eniting els, lov wan anada fahn unu haat, bikaaz di persn weh ga lov aalwayz wilin fi fergiv adaz.
9 Unu mos welkom wan anada wid aala unu haat* ahn noh grombl bowt it needa.
10 Unu da gud servants,* ahn bikaaz a Gaad grayt kainis,* eech wan a unu mi geh wahn gif, soh yooz it fi serv wan anada.
11 If enibadi ga eniting fi seh, mek ih seh it laik da wahn mesij fahn Gaad; if enibadi serv adaz, mek ih pen pahn di schrent a Gaad; soh dat eena evriting, Gaad geh di gloari chroo Jeezas Krais. Gaad ga di gloari ahn powa fareva an eva. Aymen.
12 Mi dyaa bradaz ahn sistaz, noh bee sopraiz bowt di chraiyalz* weh unu di fays, laik if da sohnting schraynj di hapm tu unu.
13 Insteda dat, unu fi rijais kaaz unu di sofa fi di saym reezn dehn laik Krais, soh dat joorin di taim wen hihn wahn shoa ih gloari, unu wahn ku bee hapi an oavafloa wid jai.
14 If peepl di insolt unu fi weh unu da Krais falowaz, unu fi bee hapi, bikaaz ih wahn shoa dat di spirit weh soh wandaful deh pahn unu.
15 Bot Ah wudn waahn non a unu sofa bikaaz unu kil sombadi, teef sohnting, du sohnting eevl, er intafayr eena ada peepl bizniz.
16 Bot if enibadi sofa fi weh ih da wahn Kristyan, ih noh fi feel shaym bowt dat ataal, insted, ih fi kantinyu aana Gaad naym bai di way ih liv ih laif az wahn Kristyan.
17 Kaaz dis da di set taim* wen di jojment fi staat. An ih wahn staat wid di peepl a Gaad. Now, if ih wahn staat fers wid wee, weh wahn bee di rizolt fi di wan dehn weh rifyooz fi obay di gud nyooz fahn Gaad?
18 “If wahn raichos persn haftu werk haad fi mek Gaad sayv ahn, den weh wahn hapm tu di sina ahn di persn weh noh rispek Gaad?”
19 Soh den, if unu di sofa fi du di wil a Gaad, kip aan di du gud ahn put unu laif* eena di han dehn a wi faytful Kriyayta.
Futnoat
^ Er “fi tink laik hihn.”
^ Er “bihayv eena wahn way weh noh shoa no shaym.” Dis da di plooral faam a di Greek werd a·selʹgei·a. Si di Glasari, “Brayzn kandok.”
^ Er “tu peepl weh spirichwali ded.”
^ Er “Unu mos shoa kainis tu wan anada.”
^ Er “gud hows manija.”
^ Si di Glasari, “Grayt kainis.”
^ Er “chraiyalz weh bon laik faiya.”
^ Er “apointid taim.”
^ Er “soal.” Si di Glasari, “Soal.”
