1 Samwel 11:1-15
11 Den Nayhash di Amonait gaan op gaahn set op kyamp fi fait gens di man dehn fahn Jaybesh weh deh da Gilyad. An aala di man dehn fahn Jaybesh tel Nayhash: “Lesgoh mek wahn kovenant* wid eech ada, ahn den wee wahn serv yoo.”
2 Soh Nayhash di Amonait tel dehn: “Ah onli wahn mek dis kovenant wid unu if unu mek Ah dig owt aala unu rait aiy. Ah wahn du dis fi shaym Izrel.”
3 Den di elda* dehn fahn Jaybesh tel hihn: “Gi wi sevn dayz soh dat wi ku sen sohn mesinja tu aala di teritori dehn da Izrel fi si if enibadi ku help wi. Bot if nobadi kyaahn help wi, den wi wahn han wiself oava tu yoo.”
4 Laytaraan di mesinja dehn reech Gibiya wehpaat Saal mi liv, ahn dehn tel di peepl di mesij, an aala dehn staat tu baal haad.
5 Bot Saal mi-di kohn bak fahn di feel di waak bihain di kyatl, an ih seh: “Da weh hapm tu evribadi? Da wai dehn di baal?” Soh di peepl tel ahn evriting weh di mesinja dehn fahn Jaybesh mi seh.
6 Wen Saal hyaa weh dehn seh, Gaad spirit giv ahn powa, ahn den Saal geh beks bad.
7 Soh hihn geh too bul ahn chap dehn op, ahn hihn tel sohn mesinja fi kehr di peesiz tu aala di teritori dehn da Izrel, ahn di mesinja dehn tel di peepl: “Dis da weh wahn hapm tu unu kyatl if unu noh fala Saal ahn Samwel!” An owta rispek fi Jehoava di peepl gyada tugeda az wan fi wan reezn.*
8 Den Saal konk dehn da Beezek, ahn dehn mi ga 30,000 man fahn Jooda chraib ahn 300,000 man fahn di ada Izrelait chraib dehn.
9 Den Saal ahn fi hihn aami tel di mesinja dehn weh mi dehdeh: “Dis da weh unu mos tel di man dehn fahn Jaybesh weh deh da Gilyad, ‘Tumaaro wen di son geh hat, wi wahn reskyu unu.’” Soh di mesinja dehn tel di man dehn fahn Jaybesh weh Saal dehn seh, ahn dehn mi onli hapi.
10 Soh di man dehn fahn Jaybesh tel Nayhash: “Tumaaro wi wahn han wiself oava tu yu, ahn yoo ku du wi wateva yu tink rait.”
11 Pahn di neks day, Saal divaid op ih aami intu chree groop, ahn dehn sneek eena di kyamp erli da maanin bifoa di son kom op* ahn staat tu kil di Amonait dehn, ahn dehn neva don til rong di midl a di day. Ahn di wan dehn weh mi servaiv mi skyata bowt di plays soh dat eech wan a dehn mi-di ron weh bai dehnself.
12 Den di peepl tel Samwel: “Hoo mi-di seh dat dehn neva waahn Saal fi bee wi king? Han dehn oava tu wi soh dat wi ku kil dehn.”
13 Bot Saal seh: “Unu mosn kil nobadi tudeh, bikaaz Jehoava reskyu Izrel tudeh.”
14 Afta dat, Samwel tel di peepl: “Lesgoh da Gilgal fi anonks agen dat Saal da di king.”
15 Soh evribadi gaahn da Gilgal ahn dehn mek Saal dehn king fronta Jehoava. Den dehn aafa op pees sakrifais* fronta Jehoava, ahn Saal ahn di res a di Izrelait dehn selibrayt weh dehn mi soh hapi.
Futnoat
^ Er “agreement.” Si di Glasari, “Kovenant.”
^ Si di Glasari, “Elda.”
^ Lit., “az wan man.”
^ Dis da fahn bowt too aklak da maanin til bowt siks aklak da maanin.
^ Lit., “kamyoonyan sakrifais.” Si di Glasari, “Pees sakrifais.”
