1 Samwel 12:1-25
12 Fainali Samwel tel di Izrelait dehn: “Ah don du evriting weh unu aks mi fi du, an Ah put wahn king fi rool oava unu.
2 Ahn dis da di king weh wahn rool oava* unu! Ah mi leed unu fan Ah yong op tu now, bot now Ah oal ahn mi hyaa gray ahn mi son dehn deh monks unu.
3 If unu fain eni faalt wid mi, seh it now fronta Jehoava ahn fronta di king weh hihn pik.* Ai eva tek eni a unu bul er dongki? Ai eva cheet unu er chreet unu bad? Ai eva tek wahn braib fahn unu fi mek Ah luk di ada way? Tel mi now an Ah wahn giv unu bak.”
4 Den dehn tel ahn: “Yu noh cheet wi ner chreet wi bad, ner yu noh tek braib fahn nobadi.”
5 Soh ih tel dehn: “Jehoava ahn di king weh hihn pik da mai witnis tudeh dat unu noh ga no reezn fi komplayn bowt mi.”* Soh dehn tel ahn: “Hihn da wahn witnis.”
6 Soh Samwel tel di peepl: “Yes, Jehoava da wahn witnis. Hihn da di saym wan weh mi chooz Moaziz an Ayron ahn hoo mi bring unu ansesta dehn owta Eejip.
7 Now unu kohn stan op ya an Ah wahn joj unu fronta Jehoava ahn rimain unu bowt aala di gud tingz weh Jehoava du fi unu ahn fi unu ansesta dehn.
8 “Jaykop gaahn da Eejip, ahn laytaraan unu ansesta dehn staat pray tu Jehoava fi help. Az soon az dehn du dat, Jehoava sen Moaziz an Ayron fi leed dehn fahn owta Eejip ahn put dehn fi liv ya.
9 Bot unu ansesta dehn ferget bowt dehn Gaad Jehoava, soh hihn han dehn oava tu Sisera di cheef a Hayzor aami ahn tu di Filisteen dehn ahn di king a Moawab, ahn dehn mi fait gens unu ansesta dehn.
10 Ahn dehn bayg Jehoava fi help, ahn seh, ‘Wi sin bikaaz wi lef Jehoava fi serv di Bayal* dehn ahn di Ashtoret* aidol dehn; now pleez sayv wi fahn wi enimi dehn soh dat wi ku serv yoo.’
11 Den Jehoava sen Jerobayal, Beedan, Jefta, ahn Samwel fi reskyu unu fahn aala unu enimi dehn soh dat unu ku bee sayf.
12 Ahn wen unu si dat Nayhash di Amonait king mi kohn fi fait gens unu, unu stodi tel mi, ‘No, wee don mek op wi main aredi, wee waahn wahn king fi rool oava wi!’ eevn doa unu Gaad Jehoava da unu King.
13 Now dis da di king weh unu pik, di wan weh unu mi aks fa. Si, Jehoava put wahn king fi rool oava unu.
14 Unu fi rispek Jehoava ahn serv ahn. Unu fi obay Jehoava ahn noh ribel gens fi hihn koman. Unu ahn di king weh rool oava unu fi fala unu Gaad Jehoava. If unu du aala dat, den dat gud.
15 Bot if unu noh obay Jehoava an unu ribel gens Jehoava komanment dehn, den Jehoava wahn ponish unu an unu pa.
16 Now unu kohn stan op ya ahn si dis wandaful ting weh Jehoava wahn du fronta unu.
17 Tudeh da noh di weet haavis? Ah wahn aks Jehoava fi mek ih rayn ahn tonda. Den unu wahn noa an andastan dat tu Jehoava dis da wahn eevl ting weh unu du wen unu aks fi wahn king fi rool oava unu.”
18 Den Samwel pray tu Jehoava pahn da day, ahn Jehoava mek ih rayn ahn tonda. Soh den aala di peepl geh frayd bad fi Jehoava ahn fi Samwel.
19 An aala di peepl tel Samwel: “Wi noh waahn ded, soh pray tu yu Gaad Jehoava fi wi, kaaz pahn tap a aala di wikid tingz weh wi don du aredi, wi gaahn aks fi wahn king.”
20 Soh Samwel tel di peepl: “Noh frayd. Da chroo, unu du aala dehnya bad tingz. Bot now, noh stap fala Jehoava, ahn serv Jehoava wid aala unu haat.
21 Noh ton weh fahn di chroo Gaad fi fala di faals gaadz weh kyaahn help unu ahn weh kyaahn reskyu unu, bikaaz dehn fayk.
22 Jehoava mi chooz unu fi bee fi hihn peepl, soh fi aana fi hihn grayt naym, Jehoava wahn neva abandan fi hihn peepl.
23 If Ah stap pray fi unu den Ah wahn di sin gens Jehoava, an Ah wuda neva tink fi du sohnting laik dat. Soh Ah wahn kantinyu fi teech unu di gud ahn rait way fi liv.
24 Soh shoa lata rispek fi Jehoava ahn serv ahn wid aala unu haat ahn bee faytful, kaaz hihn du wahn lata amayzin tingz fi unu.
25 Bot if unu noh ga no shaym fi du weh wikid, den hihn wahn ponish unu an unu king.”
Futnoat
^ Lit., “waak heda.”
^ Er “fronta fi hihn anointid wan.” Si di Glasari, “Anoint.”
^ Lit., “noh fain notn eena mi han.”
^ Si di Glasari, “Bayal.”
^ Si di Glasari, “Ashtoret.”
