1 Samwel 13:1-23
13 Saal mi . . .* yaaz oal wen ih staat rool az king, an ih mi rool oava Izrel fi too yaaz.
2 Saal chooz 3,000 man fahn owta Izrel fi mek op ih aami. Too towzn a dehn mi deh wid Saal da Mikmash an eena di mongtin dehn rong Betel, ahn 1,000 a dehn mi deh wid Janatan da Gibiya eena Benjamin chraib teritori, an ih sen di res a di peepl bak hoam.*
3 Den Janatan kanka di groop a Filisteen soalja weh mi deh da Geeba ahn di Filisteen dehn hyaa bowt it. Ahn Saal sen sohn mesinja aal chroo Izrel fi bloa di haan ahn seh: “Aal Heebroo peepl need fi hyaa dis!”
4 Soh aala di Izrelait dehn hyaa dis nyooz: “Saal kanka wahn groop a Filisteen soaljaz, soh now di Filisteen dehn hayt di Izrelait dehn.” Soh dehn kaal di peepl fi fala Saal da Gilgal.
5 Di Filisteen dehn aalso gyada tugeda fi fait di Izrelait dehn, wid 30,000 waar chariyat ahn 6,000 haasman ahn soh moch soalja dat dehn da-mi laik di san pahn di seesaid. Ahn dehn gaan op da di ees a Bet-ayven ahn dehn kyamp da Mikmash.
6 Ahn di Izrelait dehn riyalaiz dat dehn mi eena lata chrobl, ahn dehn mi schres rait owt bikaaz dehn enimi mi-di kohn fi atak dehn. Soh di peepl dehn gaahn haid monks di rak dehn an eena sohn kayv, sohn hoal, sohn plays andagrong, an eena sohn waata hoal.
7 Som a di Heebroo dehn mi eevn kraas di Jaadn Riva ahn gaahn da Gad ahn Gilyad, bot Saal mi stil deh da Gilgal an evribadi weh mi-di fala ahn mi-di chrimbl weh dehn soh frayd.
8 Ih kantinyu wayt di sevn dayz til di taim wen Samwel seh ih mi wahn reech, bot Samwel neva get da Gilgal, soh di peepl mi-di abandan Saal.
9 Soh Saal seh: “Bring di sakrifais ya fi mek Ah bon it, ahn bring mi di pees sakrifais* tu.” Ahn den ih bon di sakrifais.
10 Bot az soon az ih finish bon di sakrifais, Samwel reech. Soh Saal gaan owt gaahn meet ahn an bles ahn.
11 Den Samwel seh: “Da weh yu gaahn du?” Ahn Saal tel ahn: “Di peepl mi-di abandan mi, ahn yu neva kohn wen yu seh yu mi wahn kohn, ahn di Filisteen dehn mi-di staat gyada tugeda da Mikmash.
12 Soh Ah seh tu miself, ‘Now di Filisteen dehn wahn kohn dong ya da Gilgal kohn fait gens mi, an Ah noh aks Jehoava fi help* yet.’ Soh Ah mi feel laik Ah mi haftu bon di sakrifais.”
13 Den Samwel tel Saal: “Yu du fool! Yu neva obay di komanment weh yu Gaad Jehoava gi yu. If yu mi obay, den Jehoava mi wahn mek yoo ahn yu disendant dehn rool oava Izrel fareva.
14 Now yu kingdom noh wahn laas. Jehoava wahn fain wahn man weh hihn hapi wid, ahn Jehoava wahn mek hihn wahn leeda oava fi hihn peepl, bikaaz yoo neva obay weh Jehoava koman yu.”
15 Den Samwel get op ahn lef fahn Gilgal ahn gaahn da Gibiya eena Benjamin chraib teritori, ahn Saal konk humoch peepl mi stil deh wid ahn, an da mi bowt 600 man.
16 Saal, ih son Janatan, ahn di peepl weh mi stil deh wid dehn mi-di liv da Geeba eena Benjamin chraib teritori, ahn di Filisteen dehn mi set op dehn kyamp da Mikmash.
17 Ahn chree groop a Filisteen soalja yoostu lef fahn dehn kyamp fi goh atak di Izrelait dehn. Wan groop yoostu ton tuwaadz di road weh goh da Ofra, ahn da di lan weh naym Shoowal.
18 Wahn nada groop yoostu ton tuwaadz di road weh goh da Bet-hoaron. Ahn di terd groop yoostu ton tuwaadz di road weh goh da di boada fahn wehpaat yu ku luk dong ahn si Zeboayim Vali, ahn weh goh tuwaadz di wildanes.*
19 Now dehn neva ga nobadi eena Izrel weh mek ting owta metal, bikaaz di Filisteen dehn seh: “Wi noh waahn di Heebroo dehn fi mek wahn soad er wahn spyaa.”
20 An aala di Izrelait dehn mi haftu goh da di Filisteen dehn fi mek dehn shaapm di blayd fi dehn plow, dehn matuk,* dehn aks, er dehn sikl.*
21 Dehn yoostu chaaj dehn wahn pim* fi shaapm di blayd fi dehn plow, dehn matuk, dehn pichfaak, dehn aks, ahn fi fiks di metal point pahn di stik weh dehn yooz fi jraiv dehn kyatl.
22 Enitaim dehn wuda goh da waar, non a di peepl weh mi deh wid Saal ahn Janatan mi ga eni soad er spyaa; onli Saal an ih son Janatan mi ga wahn wepan.
23 Now wahn groop a Filisteen soalja mi gaahn da di plays wehpaat yu ku kraas di vali da Mikmash.
Futnoat
^ Di nomba misn eena di Heebroo teks.
^ Er “bak da dehn tent.”
^ Lit., “kamyoonyan sakrifais.” Si di Glasari, “Pees sakrifais.”
^ Er “noh saafn Jehoava fays.”
^ Si di Glasari, “Wildanes.”
^ Dis da wahn tool weh dehn yooz fi faamin. Ih mi ga wahn lang handl wid wahn shaap blayd pahn di en weh dehn mi yooz fi dig op er saafn soil.
^ Dis da wahn tool weh dehn yooz fi faamin weh da laik wahn machet bot ih ga wahn blayd weh kerv insted.
^ Wahn oal-taim mezhament weh way bowt too terdz a wahn shekl. Si Apendiks B14.
