1 Samwel 15:1-35
15 Den Samwel tel Saal: “Da Jehoava sen mi fi anoint* yu az king oava fi hihn peepl di Izrelait dehn. Soh now lisn tu weh Jehoava ga fi seh.
2 Dis da weh Jehoava di Komanda a di hevnli aamiz seh: ‘Ah wahn mek di Amalekait dehn pay sayka weh dehn fait gens di Izrelait dehn wen dehn mi-di kom owta Eejip.
3 Now goh an atak di Amalekait dehn ahn dischrai aala dehn lang wid evriting weh dehn gat. Noh shoa dehn no mersi. Yu fi kil aala dehn—man, wuman, pikni, an eevn dehn baybi. Ahn yu mos kil dehn bul, kyamil, sheep, ahn dongki dehn tu.’”
4 Soh Saal kaal di aami tugeda ahn konk dehn da Telayim: Dehn mi ga 10,000 man fahn Jooda chraib ahn 200,000 soalja fahn di ada Izrelait chraib dehn.
5 Saal an ih aami gaahn da Amalek siti, an ih put ih soalja dehn fi haid eena di vali* fi laywayt di Amalekait dehn.
6 Den Saal tel di Kenait dehn: “Unu goh fahn rong di Amalekait dehn soh dat Ah noh dischrai unu lang wid dehn. Kaaz unu mi shoa lov* tu aala di Izrelait dehn rong di taim wen dehn mi kom op owta Eejip.” Soh di Kenait dehn lef fahn rong di Amalekait dehn.
7 Afta dat, Saal dehn kil di Amalekait dehn aal di way fahn Havila tu Shur weh deh kloas tu Eejip.
8 Ahn dehn kil aal di peepl wid dehn soad bot dehn kech Aygag di Amalekait king alaiv.
9 Ahn Saal an ih aami neva kil* Aygag ner di bes a di flak, di kyatl, di fat animal dehn, di ram dehn, an evriting weh gud. Dehn neva waahn dischrai dehndeh tingz. Bot evriting weh neva gud ahn weh dehn neva waahn, dehn dischrai.
10 Den Jehoava tel Samwel:
11 “Ah sari* Ah mek Saal bee king, kaaz ih stap fala mi an ih noh du weh Ah tel ahn.” Ahn Samwel mi feel bad sayka dat, an ih pray haad tu Jehoava aal nait.
12 Wen Samwel wayk op erli di maanin fi goh meet Saal, dehn tel Samwel: “Saal gaahn da Karmel, an ih set op wahn big stoan deh fi mek peepl memba ahn. Den ih ton rong ahn gaahn dong da Gilgal.”
13 Wen Samwel fainali reech Saal, Saal tel ahn: “Ah pray dat Jehoava bles yu. Ah du weh Jehoava tel mi fi du.”
14 Bot Samwel seh: “Wel wai Ah di hyaa sheep ahn kow di mek naiz den?”
15 Den Saal tel ahn: “Wi bring dehn bak fahn di Amalekait dehn, kaaz di soalja dehn sayv di bes a di flak ahn di kyatl fi sakrifais tu yu Gaad Jehoava; bot wi dischrai evriting els.”
16 Den Samwel tel Saal: “Stap! Mek Ah tel yu weh Jehoava tel mi laas nait.” Soh Saal tel ahn: “Tel mi!”
17 Soh Samwel seh: “Memba how yoo neva tink yu impoatant wen Jehoava anoint yu fi bee king oava Izrel chraib dehn?
18 Bot den Jehoava sen yu pahn wahn mishan ahn tel yu, ‘Goh ahn dischrai di Amalekait dehn; aala dehn da sinaz. Fait gens dehn til yu kil aala dehn.’
19 Wai yu neva obay weh Jehoava tel yu? Insted, yu hori gaahn greedi op di tingz weh unu tek fahn di enimi dehn eevn doa Jehoava tel yu noh fi du dat!”
20 Bot Saal tel Samwel: “Yes Ah mi du weh Jehoava tel mi fi du! Ah gaahn pahn di mishan jos laik weh Jehoava tel mi fi du, an Ah bring bak Aygag di Amalekait king, an Ah dischrai aala di Amalekait dehn.
21 Bot di peepl tek di bes sheep ahn kyatl fahn monks di tingz weh dehn tek fahn dehn enimi, di tingz weh dehn mi fi dischrai, fi sakrifais tu yu Gaad Jehoava da Gilgal.”
22 Den Samwel seh: “Wich wan Jehoava prifaa? Fi mek yu aafa op bon aafrin* tu ahn er fi mek yu obay ahn? Lisn ya! Ih beta fi obay Jehoava dan fi aafa sakrifais, an ih beta fi lisn dan fi aafa di fat fahn wahn ram.
23 Kaaz if yu ribel, ih jos az bad az if yu geh help fahn deemonz fi noa di fyoocha, an if yu goh hed ahn du tingz weh yu noh ga di atariti fi du, ih jos az bad az if yu du majik ahn wership aidol.* Soh laik how yu neva obay weh Jehoava tel yu fi du, hihn noh waahn yoo bee king nohmoh.”
24 Den Saal tel Samwel: “Ah sin, kaaz Ah neva obay weh Jehoava koman mi fi du ner weh yoo tel mi fi du, kaaz Ah mi frayd fi di peepl soh Ah du weh dehn tel mi.
25 Soh now pleez fergiv mi fi mi sin ahn kohn bak wid mi soh Ah ku bow dong tu Jehoava.”
26 Bot Samwel tel Saal: “Ah noh gwehn bak wid yu, kaaz yu neva du weh Jehoava tel yu fi du, ahn Jehoava noh waahn yu bee king oava Izrel nohmoh.”
27 Wen Samwel mi-di ton fi lef, Saal grab di ej a ih sleevles koat, bot wahn pees mi tayr.
28 Soh den Samwel tel ahn: “Jos laik how mi koat tayr fahn owta yu han, rait soh Jehoava tek weh di kingdom a Izrel fahn yu tudeh, an ih wahn giv it tu sombadi beta dan yoo.
29 Ahn di Moas Hai Gaad a Izrel wahn aalwayz kip ih werd an ih noh chaynj ih main,* kaaz hihn da noh laik man weh chaynj dehn main.”*
30 Den ih seh: “Ah sin, bot pleez shoa mi aana fronta di eldaz* weh di tek di leed monks mi peepl ahn fronta di Izrelait dehn. Kohn bak wid mi an Ah wahn bow dong tu yu Gaad Jehoava.”
31 Soh Samwel gaahn bak wid Saal, ahn Saal bow dong tu Jehoava.
32 Ahn Samwel seh: “Bring Aygag di king a Amalek oava ya.” Den Aygag gaahn tu ahn, bot ih neva waahn goh kaaz ih mi kaina frayd,* kaaz at fers Aygag mi-di tink tu ihself: ‘Ah noh haftu frayd fi mi laif nohmoh.’
33 Bot Samwel tel ahn: “Jos laik how fi yoo soad lef lata wuman widowt pikni, rait soh fi yoo ma wahn lef widowt pikni.” Ahn den Samwel chap op Aygag eena peesiz fronta Jehoava da Gilgal.
34 Den Samwel gaahn da Rayma, ahn Saal gaahn bak hoam da Gibiya wehpaat ih kohn fram.
35 Ahn fi az lang az Samwel mi liv, ih neva did si Saal agen kaaz Samwel mi veri sad* sayka Saal. Ahn Jehoava mi sari dat ih mek Saal bee king oava Izrel.
Futnoat
^ Si di Glasari, “Anoint.”
^ Er “wadi.” Si di Glasari, “Wadi.”
^ Er “laayal lov.” Si di Glasari, “Laayal lov.”
^ Er “aami shoa kompashan tu.”
^ Er “Ah feel sad dat.”
^ Si di Glasari, “Bon aafrin.”
^ Lit., “terafim aidol dehn.” Si di Glasari, “Terafim.”
^ Er “feel rigret.”
^ Er “feel rigret.”
^ Si di Glasari, “Elda.”
^ Dis ku aalso bee “an ih neva frayd ataal.”
^ Er “mi-di moarn.” Si di Glasari, “Moarn.”
