1 Samwel 19:1-24
19 Laytaraan Saal taak tu ih son Janatan ahn tu aala ih servant dehn ahn tel dehn dat ih mi-di plan fi kil Dayvid.
2 Now Saal son Janatan mi lov Dayvid, soh Janatan tel Dayvid: “Mi pa Saal di plan fi kil yu. Soh pleez deh pahn yu gyaad tumaaro maanin, ahn goh fain wahn plays fi haid ahn stay deh.
3 Ah gwehn goh stan op neks tu mi pa rong di plays weh yu wahn deh. An Ah wahn taak tu mi pa bowt yu, an if Ah fain owt eniting, Ah wahn tel yu.”
4 Soh wen Janatan gaahn taak tu ih pa Saal, ih taak gud bowt Dayvid. Ih tel ahn: “Mi king, pleez noh du notn fi hert yu servant Dayvid, kaaz hihn noh du yu notn an evriting weh hihn du werk owt gud fi yu.
5 Hihn ris ih laif fi kil di Filisteen, soh Jehoava mi gi di Izrelait dehn wahn big vikchri.* Yoo mi see’t ahn yu mi soh hapi. Soh wai yu gwehn goh kil Dayvid fi no reezn? Wai yu wahn sin gens ahn wen hihn inosent?”
6 Ahn Saal lisn tu Janatan, ahn Saal seh: “Ah swayr eena di naym a di livin Gaad Jehoava, Ah noh wahn kil ahn.”
7 Aftawodz, Janatan kaal Dayvid ahn tel ahn evriting weh hihn ahn Saal taak bowt. Soh Janatan kehr Dayvid da Saal, an ih kantinyu serv ahn jos laik bifoa.
8 Afta wahn wail waar brok owt agen, ahn Dayvid gaahn gaahn fait gens di Filisteen dehn an ih kil lata dehn, ahn di res a dehn ron weh fan ahn.
9 Ahn Jehoava alow Saal oan main fi bada ahn wen ih mi-di sidong eena ih hows wid ih spyaa eena ih han, wail Dayvid mi-di play myoozik pahn di haap.
10 Soh Saal chrai pin Dayvid tu di waal wid di spyaa, bot ih daj Saal, ahn di spyaa gaan eena di waal. Dayvid ron weh an eskayp da saym nait.
11 Laytaraan Saal sen sohn mesinja fi wach Dayvid hows ahn fi kil ahn eena di maanin, bot Dayvid waif Maikal tel ahn: “If yu noh eskayp tunait, tumaaro yu wahn ded.”
12 Rait away Maikal help Dayvid klaim dong fahn di windo fi mek ih ku get weh.
13 Den Maikal tek wahn aidol* ahn put it pahn di bed, an ih put wahn net weh mek owta goat hyaa bai wehpaat ih hed wuda deh, an ih kova it wid wahn roab.
14 Soh now Saal sen sohn mesinja fi kech Dayvid, bot shee tel dehn: “Ih sik.”
15 Soh Saal sen di mesinja dehn fi goh si Dayvid an ih tel dehn: “Bring ahn ya pan ih bed mek Ah kil ahn.”
16 Wen di mesinja dehn gaan eena di hows, dehn fain di aidol* pahn di bed ahn wahn net weh mek owta goat hyaa wehpaat ih hed mi fi deh.
17 Den Saal aks Maikal: “Wai yu chrik mi laik dis? Wai yu mek mi enimi get weh?” Ahn Maikal tel Saal: “Hihn tel mi, ‘If yu noh mek Ah get weh, Ah wahn kil yu!’”
18 Now Dayvid mi ron weh, an ih eskayp ahn gaahn da Samwel an ih tel ahn evriting weh Saal mi du ahn. Den hihn ahn Samwel gaahn da Naiyot ahn dehn stay deh.
19 Afta wahn wail sombadi tel Saal: “Dayvid deh da Naiyot eena Rayma.”
20 Rait away Saal sen sohn mesinja fi kyapcha Dayvid. Wen dehn reech, di oalda prafit dehn mi-di prafesai ahn Samwel mi-di stan op ahn tek di leed oava dehn. Wen Saal mesinja dehn si dat, Gaad spirit kohn pahn dehn ahn dehn staat ak laik prafit.
21 Wen dehn tel Saal weh hapm, ih hori sen sohn moa mesinja, ahn dehn staat ak laik prafit tu. Soh Saal sen sohn moa mesinja agen. Dis da-mi di terd set, an eevn dehn staat ak laik prafit.
22 Fainali hihn gaahn da Rayma. Wen ih reech bai di big wel weh deh da Seeku, ih aks: “Wehpaat Samwel ahn Dayvid deh?” Ahn dehn tel ahn: “Dehn deh da Naiyot.”
23 Wail Saal mi-di goh da Naiyot, Gaad spirit kohn pahn hihn tu, an ih mi-di ak laik wahn prafit wail ih mi-di waak til ih reech da Naiyot.
24 An ih tek aaf ih kloaz an ih mi-di ak laik wahn prafit fronta Samwel, an ih lidong deh naykid hoal day ahn hoal nait. Dat da wai dehn seh: “Saal da wahn prafit tu?”
Futnoat
^ Er “Jehoava sayv di Izrelait dehn.”
^ Lit., “terafim aidol.” Si di Glasari, “Terafim.”
^ Lit., “terafim aidol.”
