1 Samwel 2:1-36
2 Den Hana pray ahn seh:
“Mai haat rijais sayka Jehoava;Da Jehoava gi mee schrent.
Ah rijais bikaaz yoo sayv mi,Ahn sayka dat mi mowt oapm waid fi ansa mi enimi dehn.
2 Nobadi els hoali laik Jehoava,Dehn noh ga no ada Gaad bot yoo,Ahn yoo da di onli wan weh schrang laik wahn rak.
3 Stap taak big;Noh seh notn owta praid,Kaaz Jehoava Gaad noa evriting,Ahn hihn si weh peepl du an ih joj dehn eena wahn fyaa way.
4 Hihn brok op di schrang man dehn boa an aro,Bot ih schrentn di wan dehn weh di luk fi jrap dong.
5 Di wan dehn weh yoostu eet gud wahn haftu geh wahn jab jos soh dat ih ku eet bred,Bot di wan dehn weh mi hongri noh wahn hongri nohmoh.
Di wuman weh kudn geh pregnant gi bert tu sevn pikni,Bot di wan weh mi ga lata pikni kyaahn ga nohmoh.
6 Jehoava ku kil, an ih ku sayv* laif;Ih ku bring sombadi dong tu di Grayv,* an ih ku bring dehn bak tu laif.
7 Jehoava ku mek sombadi poa, an ih ku mek sombadi rich;Hihn ku bring sombadi dong, an ih ku lif sombadi op.
8 Hihn lif op peepl weh poa fahn di dos;Hihn lif dehn op owta di gyaabij domp,Ih mek dehn sidong wid di prins dehn,An ih gi dehn wahn anarabl pozishan.
Di ert fongdayshan deh eena Jehoava han,Ahn hihn put di lan pahn di fongdayshan.
9 Hihn protek peepl weh laayal tu hihn,Bot az fi di wikid, ih wahn shet dehn mowt ahn lef dehn eena daaknis,Kaaz wahn man noh win notn wid ih oan powa.
10 Jehoava wahn dischrai enibadi weh fait gens ahn;*Wen ih shoa ih anga gens dehn, ih wahn bee laik tonda fahn hevn.
Jehoava wahn joj di hoal ert,Hihn wahn gi powa tu fi hihn kingAn ih wahn gi schrent tu di wan weh hihn anoint.”*
11 Den Elkayna gaahn bak hoam da Rayma, bot di lee bwai stay wid Eelai di prees ahn staat tu serv Jehoava.
12 Now Eelai son dehn mi onli wikid; dehn neva ga no kaina rispek fi Jehoava.
13 Insteda jos tek di paat a di sakrifais weh mi bilangz tu dehn, dis da weh di prees dehn mi du wid di peepl dehn sakrifais: Enitaim wahn man mi-di aafa wahn sakrifais wan a di prees servant wuda kohn wid wahn big faak eena ih han wail di meet stil mi-di bail,
14 an ih wuda push it eena di baysn er eni ada pat weh dehn yooz fi kuk di meet, ahn wateva pees a meet kom owt pahn di faak di prees wuda tek fi ihself. Dat da weh dehn wuda du tu aal di Izrelait dehn weh goh da Shailo.
15 Pahn tap a dat, di man weh mi-di aafa op di sakrifais neva eevn ga taim fi mek di fat smoak, kaaz wan a di prees servant wuda tel ahn: “Gi di prees wahn pees a meet fi roas, kaaz ih noh wahn tek no bail meet fahn yu, onli raa meet.”
16 Wen di man wuda tel ahn: “Mek shoar dehn mek di fat smoak fers, den yu ku tek wateva yu waahn,”* di servant wuda tel ahn: “No! If yu noh gi mi it now, Ah wahn tek it miself!”
17 Soh di prees dehn servant mi-di komit wahn seeryos sin eena Jehoava sait, kaaz dehn mi disrispek Jehoava sakrifais.
18 Now Samwel mi-di wayr wahn linen efod* an ih mi-di serv Jehoava eevn doa ih da-mi jos wahn lee bwai.
19 An evri yaa ih ma wuda mek ahn wahn lee koat wid no sleev an ih wuda kehr it lang wid ahn wen ih goh wid ih hozban fi aafa op dehn sakrifais fi di yaa.
20 An Eelai bles Elkayna an ih waif an ih tel ahn: “Ah hoap Jehoava gi yu wahn nada pikni fahn dis waif fi tek di plays a di wan weh unu len Jehoava.” Ahn den dehn gaahn bak hoam.
21 Jehoava mi shoa kompashan fi Hana ahn shee geh pregnant ahn ga chree moa son ahn too daata. Ahn Samwel groa op di serv Jehoava.
22 Now Eelai mi reeli oal, an ih mi hyaa bowt evriting weh ih son dehn mi-di du tu aala di Izrelait dehn ahn bowt how dehn mi-di sleep rong wid di wuman dehn weh serv fronta di meetin tent.*
23 Ih yoostu tel dehn: “Aiy man, da wai unu kip di du dehnya kaina ting? Kaaz Ah di hyaa loan bad tingz bowt unu fahn evribadi.
24 No, mi son, di tingz weh Ah hyaa Jehoava peepl di seh bowt unu da noh notn gud.
25 If wahn man sin gens wahn neks man, sohnbadi ku aks Jehoava fi help ahn; bot if wahn man sin gens Jehoava, hoo ku pray far ahn?” Bot dehn rifyooz fi lisn tu ahn, an Jehoava mi don mek op ih main fi kil dehn.
26 Meenwail, Samwel mi-di groa biga ahn biga, ahn Jehoava ahn di peepl mi-di geh fi laik ahn moa ahn moa.
27 Ahn Gaad sen wahn man fi tel Eelai: “Dis da weh Jehoava seh: ‘Wen yu ansesta an ih famili dehn da-mi slayv eena Fayro* hows da Eejip, Ai neva shoa dehn da hoo mee?
28 An Ah mi pik hihn owta aala Izrel chraib dehn fi bee mi prees ahn fi mek sakrifais pahn mi alta, fi aafa insens, ahn fi wayr wahn efod wail ih serv mi. Dat da wai Ah mi gi hihn an ih disendant dehn di rait fi tek pees a di meet weh di Izrelait dehn bring fi bon az wahn sakrifais fi mi.
29 Soh wai unu disrispek di aafrin ahn di sakrifais weh Ah koman unu fi mek eena mi hows? Wai yu aalwayz aana yu son dehn moa dan mee ahn ful op unuself wid di bes pees a evri aafrin weh mi peepl Izrel mek?
30 “‘Dats wai Jehoava di Gaad a Izrel seh: “Ah mi did seh dat yu ansesta ahn fi hihn famili ahn fi yoo famili wuda aalwayz serv mi.” Bot now Jehoava seh: “Ah wuda neva mek dat hapm, bikaaz Ah wahn aana enibadi weh aana mee, bot Ah wahn hayt enibadi weh hayt mee.”
31 Wahn day wahn kohn wen Ah wahn tek weh yu schrent ahn di schrent a yu ansesta famili, soh dat no man fahn yu famili wahn liv til dehn geh oal.
32 Ahn joorin wahn taim wen Ah wahn du lata gud fi Izrel, yoo wahn si wahn enimi eena mi hows. Ahn yu noh wahn si wahn oal man eena yu famili eva agen.
33 Ah wahn lef wahn man fahn yu famili fi kantinyu serv da di alta, ahn sayka hihn yu gwehn blain an ih wahn kaaz yu lata saro,* bot moas a yu famili wahn geh kil wid soad.
34 Ahn yu too son, Hofnai ahn Finiyas, wahn ded pahn di saym day, ahn dat wahn bee wahn sain fi mek yu si dat weh Ah di seh da chroo.
35 Den Ah wahn chooz wahn faytful prees fi miself. Hihn wahn du weh Ai waahn,* an Ah wahn mek fi hihn famili serv az prees fi wahn lang taim, ahn hihn wahn aalwayz serv az prees fi di wan weh Ai anoint.
36 Di res a yu famili wahn bow dong tu hihn ahn dehn wahn bayg fi werk soh dehn ku ga wahn lee moni ahn wahn loaf a bred. Ahn dehn wahn seh: “Pleez mek Ah bee wahn prees, soh dat Ah ku eet pees a bred.”’”
Futnoat
^ Er “giv.”
^ Er “Sheeyol,” weh da di Grayv. Si di Glasari, “Grayv.”
^ Dis ku aalso bee “Enibadi weh fait gens Jehoava wahn geh fraitn.”
^ Si di Glasari, “Anoint.”
^ Er “yu soal krayv.” Si di Glasari, “Soal.”
^ Si di Glasari, “Efod.”
^ Si di Glasari, “Meetin tent.”
^ Si di Glasari, “Fayro.”
^ Er “ih wahn mek yu soal pain weh.”
^ Er “weh deh eena mi haat an eena mi soal.”
