1 Samwel 20:1-42
-
Janatan laayal tu Dayvid (1-42)
20 Den Dayvid ron weh fahn Naiyot weh deh eena Rayma an ih gaahn da Janatan an ih aks ahn: “Da weh Ah du? Weh kraim Ah komit? Da how Ah sin gens yu pa fi mek ih waahn kil mi?”
2 Den Janatan tel ahn: “Noh man! Yu noh wahn ded. Luk ya! Mai pa noh wahn du notn, big er smaal, widowt tel mee. Wai mi pa wuda haid dis fahn mi? Dis noh wahn hapm.”
3 Bot Dayvid seh: “Yu pa wel noa dat yoo ahn mee da fren, soh hihn wuda seh, ‘Noh mek Janatan noa er hihn wahn geh beks.’ Bot Ah swayr, jos laik how Jehoava livin ahn jos laik how yoo livin, Ah don ga wan fut eena di grayv!”
4 Den Janatan tel Dayvid: “Tel mi weh yu waahn an Ah wahn du it fi yu.”
5 Den Dayvid tel Janatan: “Tumaaro da di nyoo moon, an Ah sopoas tu sidong wid di king fi eet. Soh yu mos sen mi weh an Ah wahn haid owtsaida di siti til di day afta tumaaro, til eena di eevnin.
6 If yu pa noatis dat Ah noh deh ya, den tel ahn, ‘Dayvid bayg mi fi mek ih hori goh hoam da Betlihem, kaaz ih famili aafa wahn sakrifais deh evri yaa.’
7 If ih seh, ‘Dat aarait,’ wel den Ah noh ga no reezn fi frayd. Bot if ih geh beks, den yu ku bee shoar dat ih don mek op ih main fi hert mi.
8 Shoa lov* tu mee, yu servant, kaaz yu mek wahn kovenant* wid mi fronta Jehoava. Bot if Ah gilti, den kil mi yuself. Wai bada han mi oava tu yu pa?”
9 Soh den Janatan tel ahn: “Noh eevn taak laik dat! If Ai fain owt dat mai pa don mek op ih main fi hert yu, yu noh tink Ah wuda tel yu?”
10 Den Dayvid aks Janatan: “Hoo wahn tel mi if yu pa beks wid mi?”
11 Soh Janatan tel Dayvid: “Lesgoh owtsaida di siti.” Soh di too a dehn gaan owtsaida di siti.
12 Den Janatan tel Dayvid: “Mek Izrel Gaad Jehoava bee wahn witnis dat bai rong dis taim tumaaro er bai di day afta tumaaro Ah wahn fain owt weh mai pa di tink. If hihn hapi wid yu, den Ah wahn sen sombadi fi mek yu noa.
13 Bot if mi pa di plan fi hert yu an Ai noh tel yu, soh dat yu ku get weh ahn goh sohnweh sayf, den mek Jehoava ponish mee er wers. Ah hoap Jehoava wahn deh wid yu jos laik how ih yoostu deh wid mi pa.
14 Wail Ai alaiv an eevn wen Ah ded, shoa mi di saym kaina lov* Jehoava shoa.
15 Neva stap shoa lov* tu mi faamli, eevn wen Jehoava dischrai aala yu enimi dehn.”
16 Soh Janatan mek wahn kovenant wid Dayvid faamli, an ih seh: “Jehoava wahn definaytli ponish Dayvid enimi dehn.”
17 Soh Janatan mek Dayvid swayr agen bays pahn fi hihn lov fi Janatan, kaaz hihn mi lov ahn di saym way laik hihn mi lov ihself.*
18 Den Janatan tel ahn: “Tumaaro da di nyoo moon, ahn dehn wahn noatis dat yu noh dehdeh, kaaz yu seet wahn emti.
19 Bai di day afta tumaaro, dehn wahn di wanda weh hapm tu yu, ahn yu mos kohn da di plays weh yu mi-di haid di ada day ahn stay kloas tu dis rak rait ya.
20 Ah wahn play laik Ah di shoot aata sohnting saida di rak, an Ah wahn shoot chree aro tuwaadz it.
21 Den Ah wahn tel di servant, ‘Goh fain di aro dehn.’ An if Ah tel ahn, ‘Si di aro dehn saida yu, goh get dehn,’ den yu ku kohn bak, bikaaz Ah swayr eena di naym a di livin Gaad Jehoava dat wahn meenz dat evriting gud ahn dat yu noh deh eena daynja.
22 Bot if Ah tel ahn, ‘Bwai! Di aro dehn noh dehdeh, yu haftu goh moa,’ den goh, kaaz Jehoava waahn mek yu goh.
23 Jehoava wahn bee di witnis a di kovenant weh wee mek wid wan anada fareva.”
24 Soh Dayvid haid owtsaida di siti. Wen di nyoo moon kohn, di king sidong da di taybl fi eet.
25 Di king mi-di sidong wehpaat ih aalwayz sidong bai di waal. Janatan mi-di sidong kraas fan ahn, an Abner mi-di sidong saida Saal, bot Dayvid spat mi emti.
26 Bot Saal neva seh notn da day, kaaz ih seh tu ihself: ‘Sohnting mosi hapm weh mek ih noh kleen. Yes, maybi ih noh kleen.’
27 Ahn di day afta di nyoo moon, Dayvid spat mi stil emti. Den Saal aks ih son Janatan: “Wai Jesi son noh kohn yestudeh ner tudeh fi kohn eet wid wi?”
28 Janatan tel Saal: “Dayvid bayg mi soh dat ih ku goh da Betlihem.
29 Ih tel mi, ‘Pleez mek Ah goh, kaaz wi ga wahn famili sakrifais eena di siti, ahn da mai oan breda kaal mi. Soh if yu hapi wid mi, pleez mek Ah goh si mi breda dehn.’ Dat da wai ih neva kohn da di king taybl.”
30 Den Saal geh beks wid Janatan ahn tel ahn: “Yoo son a wahn stobant wuman! Yu noh tink Ai noa dat yu tek said wid Jesi son? Yu shaym yuself ahn yu shaym yu ma.
31 Az lang az Jesi son alaiv, needa yoo ner yu roolaship wahn laas. Soh now sen sombadi fi bring ahn ya, kaaz hihn haftu ded.”
32 Bot Janatan aks ih pa Saal: “Wai hihn haftu ded? Weh hihn du?”
33 Soh Saal chroa ih spyaa aata ahn fi kil ahn, an Janatan riyalaiz dat ih pa don mek op ih main fi kil Dayvid.
34 Ahn rait away Janatan get op fahn di taybl kaaz ih mi beks bad, an ih neva eet no food pahn di day a di ful moon, kaaz ih mi feel bad fi Dayvid ahn bikaaz ih oan pa mi shaym ahn.
35 Di neks maanin, Janatan gaahn da di spat owtsaida di siti weh hihn ahn Dayvid mi plan fi meet op, ahn wahn yong servant mi deh wid ahn.
36 An ih tel ih servant: “Pleez ron goh fain di aro dehn weh Ah shoot.” Soh di servant gaan, ahn Janatan shoot di aro paas ahn.
37 Wen di servant gaahn da di spat weh ih shoot di aro, Janatan hala: “Di aro gaahn paas deh.”
38 Den Janatan hala tu di servant: “Hori goh! Noh ways taim!” Ahn Janatan servant pik op di aro ahn gaahn bak da ih maasta.
39 Ahn di servant neva andastan weh mi-di goh aan, onli Janatan ahn Dayvid mi noa.
40 Den Janatan han ih wepan dehn tu ih servant ahn tel ahn: “Kehr dehnya bak da di siti.”
41 Wen di servant gaan, Dayvid get op fahn weh ih mi-di haid. Den ih bow dong wid ih fays tu di grong chree taim, ahn dehn kis wan anada ahn dehn krai fi wan anada, bot Dayvid krai di moas.
42 Janatan tel Dayvid: “Goh, ahn noh wori, kaaz too a wi swayr eena Jehoava naym ahn seh, ‘Jehoava wahn bee witnis bitween mee ahn yoo ahn bitween mai disendant dehn ahn fi yoo disendant dehn fareva.’”
Den Dayvid get op ahn gaan, ahn Janatan gaahn bak da di siti.
Futnoat
^ Er “laayal lov.” Si di Glasari, “Laayal lov.”
^ Si di Glasari, “Kovenant.”
^ Er “di laayal lov.”
^ Er “laayal lov.”
^ Er “ih oan soal.” Si di Glasari, “Soal.”
