1 Samwel 24:1-22
24 Az soon az Saal kohn bak fahn chays di Filisteen dehn, sohnbadi tel ahn: “Dayvid deh eena di wildanes* rong En-gedai.”
2 Soh Saal tek 3,000 a di bes soalja fahn owta aala Izrel ahn gaahn luk fi Dayvid an ih soalja dehn monks di rak ahn klif wehpaat di mongtin goat dehn liv.
3 Ahn Saal reech wahn spat wehpaat sohn sheep pen weh mek owta stoan mi deh saida di road, ahn wahn kayv mi dehdeh. Now Saal gaan eena di kayv kaaz ih mi need fi yooz baachroom, ahn Dayvid an ih soalja dehn mi-di sidong way da bak a di kayv.
4 Ahn Dayvid soalja dehn tel ahn, “Dis da di day weh Jehoava di tel yu: ‘Si, Ah di han yu enimi oava tu yu ahn yu ku du ahn wateva yu tink rait.’” Soh Dayvid get op ahn kot aaf di ej a Saal sleevles koat widowt mek no naiz.
5 Bot aftawodz Dayvid kanshans* staat kandem ahn bikaaz ih mi kot aaf di ej a Saal sleevles koat.
6 Ih tel ih soalja dehn: “Ah shuda neva du sohnting laik dis tu mi laad, kaaz hihn da di wan weh Jehoava anoint.* If Ai luk pahn dis di way Jehoava luk pan it, Ah wuda neva lif mi han fi hert ahn, kaaz hihn da di wan weh Jehoava pik.”
7 Hihn seh dat fi stap ih soalja dehn, an ih neva mek dehn atak Saal, ahn Saal kom owta di kayv ahn gaahn pan ih way.
8 Den Dayvid get op ahn gaan owtsaida di kayv ahn hala fi Saal: “Mi laad di king!” Wen Saal luk bak, Dayvid bow dong loa wid ih fays tu di grong.
9 Ahn Dayvid tel Saal: “Wai yu lisn tu peepl weh seh Ah di chrai hert yu?
10 Tudeh yu ku si wid yu oan aiy how Jehoava han yu oava tu mi eena di kayv. Bot wen sohnbadi tel mi fi kil yu, Ah tek piti pahn yu an Ah seh, ‘Ah noh wahn lif mi han fi atak mi laad, kaaz hihn da di wan weh Jehoava anoint.’
11 Ahn yu si, mi laad? Luk pahn di ej a yu sleevles koat eena mi han. Wen Ah kot aaf di ej a yu sleevles koat Ah neva kil yu. Soh now yu ku si an andastan dat Ah noh ga no intenshan fi hert yu er fi ton gens yu, an Ah neva sin gens yu. Ah neva du yu notn, bot stilyet yoo di hont mi dong fi kil mi.*
12 Mek Jehoava joj bitween mee ahn yoo, ahn mek Jehoava ponish yu fi weh yu du mi, bot Ai noh wahn du yu notn.
13 Da jos laik weh di oal praverb seh, ‘Wikid peepl du wikid tingz,’ bot Ai noh wahn du yu notn.
14 Ahn da hoo di king a Izrel di chays afta? Wahn ded daag? Wahn lee flee?
15 Mek Jehoava bee di joj, ahn hihn wahn joj bitween mee ahn yoo, hihn wahn luk intu di mata ahn hihn wahn difen mi. Hihn wahn joj mi ahn sayv mi fahn yoo.”
16 Az soon az Dayvid finish seh weh ih ga fi seh, Saal aks ahn: “Dayvid, mi son, da yoo dat?” Ahn Saal staat tu baal haad.
17 An ih tel Dayvid: “Yoo moa raichos dan mee, kaaz yoo chreet mi gud an aal Ai du da chreet yu bad.
18 Ahn tudeh yu shoa mi dat yu chreet mi gud, kaaz Jehoava han mi oava tu yu, bot yu neva kil mi.
19 Kaaz if wahn man kech ih enimi, ih noh wahn mek ih get weh widowt du ahn notn. Jehoava wahn gi yu wahn gud riwaad bikaaz a weh yu du fi mi tudeh.
20 Ahn now lisn tu mi. Ah wel ahn noa dat yu wahn bee king ahn dat yu wahn mek di kingdom a Izrel laas lang.
21 Now swayr tu mi eena di naym a Jehoava dat yu noh wahn kil owt mi disendant dehn ahn dat yu noh wahn waip owt mi naym fahn mi pa famili.”
22 Soh Dayvid swayr tu Saal, ahn den Saal gaahn hoam, bot Dayvid an ih soalja dehn gaan op da di sayf plays wehpaat dehn mi-di haid.
Futnoat
^ Si di Glasari, “Wildanes.”
^ Er “haat.”
^ Si di Glasari, “Anoint.”
^ Er “mi soal.” Si di Glasari, “Soal.”
