1 Samwel 27:1-12
-
Di Filisteen dehn gi Ziklag tu Dayvid (1-12)
27 Bot Dayvid tel ihself: “Wan day Saal wahn kil mi. Di bes ting fi mek Ah du da fi ron weh ahn goh liv eena di Filisteen dehn teritori soh dat Saal wahn stap saach fi mi aal chroo Izrel teritori, an Ah wahn ku get weh fan ahn.”
2 Soh Dayvid ahn di 600 man weh mi deh wid ahn gaahn da Gat wehpaat King Aykish mi deh. An Aykish da-mi Mayok son.
3 Dayvid ahn di man dehn, lang wid eech wan a dehn famili, mi stay da Gat wid Aykish. Dayvid too waif mi deh lang wid ahn. Wan a dehn da-mi Ahinowam fahn Jezriyel ahn di neks wan da-mi Abigayl fahn Karmel. Shee yoostu bee Naybal waif, bot hihn mi ded.
4 Wen Saal fain owt dat Dayvid ron weh ahn gaahn da Gat, ih stap saach far ahn.
5 Den Dayvid tel Aykish: “If ih aarait wid yu, pleez gi mi wahn plays fi liv owtsaida di siti. Yu noh need mee, yu servant, fi liv eena di raiyal siti wid yu.”
6 Soh Aykish giv ahn Ziklag pahn da day, ahn dat da wai di king dehn fahn Jooda oan Ziklag op tu tudeh.
7 Soh Dayvid mi liv eena di Filisteen dehn teritori owtsaida di siti fi wahn yaa ahn foa monts.
8 Dayvid an ih soalja dehn wuda goh atak di Gesherait, Gerzait, an Amalekait dehn, kaaz dehn mi-di liv da Teelam an aal di way op tu Shur ahn dong tu Eejip.
9 Enitaim Dayvid wuda atak di peepl eena dehndeh lan, hihn wuda kil evri man ahn wuman, an ih wuda tek dehn kloaz, flak, kyatl, dongki, ahn kyamil. Afta dat ih wuda goh bak da Aykish.
10 Den Aykish wuda aks ahn: “Wehpaat unu gaahn fait tudeh?” Ahn Dayvid wuda seh: “Wi gaahn fait sowt a Jooda teritori” er “Wi gaahn fait sowt a wehpaat Jeraamiyel disendant dehn liv” er “Wi gaahn fait sowt a wehpaat di Kenait dehn liv.”
11 Dayvid kil evri man ahn wuman soh dat dehn kyaahn goh da Gat, kaaz hihn seh tu ihself: “Dehn wahn tel pahn wi ahn seh, ‘Dis da weh Dayvid du.’” (Ahn dat da weh Dayvid du di hoal taim hihn mi-di liv owtsaida di siti eena di Filisteen dehn teritori.)
12 Soh Aykish mi bileev Dayvid ahn seh tu ihself: ‘Hihn wahn aalwayz bee mai servant, bikaaz fi shoar di peepl da Izrel hayt ahn.’
