1 Samwel 3:1-21
-
Gaad kaal Samwel fi bee wahn prafit (1-21)
3 Meenwail, di lee bwai Samwel mi-di serv Jehoava lang wid Eelai, bot eena dehndeh dayz ih neva kaman fi mek enibadi geh wahn mesij fahn Jehoava; ahn nobadi neva yoostu geh vizhan needa.
2 Now Eelai mi-di goh blain, an ih kudn si notn. Wan day ih mi-di lidong eena ih bed,
3 ahn Gaad lamp neva owt yet, ahn Samwel mi-di lidong eena Jehoava templ* wehpaat Gaad Aak* mi deh.
4 Den Jehoava kaal Samwel ahn Samwel seh: “Si mi ya.”
5 Soh ih ron gaahn da Eelai ahn tel ahn: “Yoo mi-di kaal mi? Si mi ya.” Bot Eelai tel ahn: “Ai neva kaal yu. Goh bak goh sleep.” Soh ih gaahn bak gaahn sleep.
6 Ahn Jehoava kaal ahn agen: “Samwel!” Den Samwel get op ahn gaahn da Eelai ahn tel ahn: “Yoo mi-di kaal mi? Si mi ya.” Bot Eelai tel ahn: “Ai neva kaal yu, mi son. Goh bak goh sleep.”
7 (Now Samwel neva noa Jehoava gud yet, an ih neva yet geh wahn mesij fahn Jehoava needa.)
8 Ahn Jehoava kaal ahn agen, fi di terd taim: “Samwel!” Den Samwel get op ahn gaahn da Eelai ahn tel ahn: “Yoo mi-di kaal mi? Si mi ya.”
Da til den Eelai kanshos dat da mi Jehoava di kaal di lee bwai.
9 Soh Eelai tel Samwel: “Goh bak goh lidong, an if ih kaal yu agen, tel ahn, ‘Jehoava, Ai da yu servant. Pleez taak tu mi, kaaz Ah di lisn.’” Ahn den Samwel gaahn bak gaahn lidong.
10 Den Jehoava kohn stan op deh, an ih kaal owt tu Samwel jos laik bifoa: “Samwel, Samwel!” Den Samwel seh: “Ai da yu servant. Pleez taak tu mi, kaaz Ah di lisn.”
11 Soh den Jehoava tel Samwel: “Ai wahn du sohnting da Izrel weh wahn shak evribadi weh hyaa bowt it ahn weh wahn mek dehn ayz ring anaal.
12 Pahn da day Ah wahn mek shoar dat Ah du egzakli weh Ah mi seh Ah wahn du tu Eelai an ih famili, fahn di staat tu di finish.
13 Yu fi tel ahn dat Ah wahn bring wahn jojment pan ih famili weh wahn laas fareva, kaaz hihn noa dat ih son dehn mi-di insolt op Gaad, an ih nat eevn skoal dehn far it.
14 Dats wai Ah mi swayr tu Eelai famili dat no sakrifais er aafrin ku pay fi di sin dehn weh Eelai famili komit.”
15 Samwel mi stay di lidong deh til maanin kohn; den ih gaahn oapm di doa tu Jehoava tabernakl.* Now Samwel mi frayd fi tel Eelai bowt di vizhan.
16 Bot Eelai mi kaal fi Samwel: “Samwel, mi son!” Soh Samwel ansa: “Si mi ya.”
17 Hihn aks ahn: “Wat da-mi di mesij weh ih gi yu? Pleez noh haid it fahn mi. Mek Gaad ponish yu er wers if yu haid eniting weh hihn tel yu fahn mi.”
18 Soh Samwel tel ahn evriting, an ih neva haid notn fan ahn. Den Eelai seh: “Da Jehoava. Mek hihn du weh hihn tink bes.”
19 Az Samwel geh oalda Jehoava mi deh wid ahn, an Ih mek shoar evriting weh Hihn mi seh kohn chroo.
20 An aala di Izrelait dehn fahn Dan tu Beeyer-sheeba mi geh fi noa dat Jehoava mi chooz Samwel fi bee fi hihn prafit.
21 Ahn Jehoava kantinyu fi apyaa da Shailo, kaaz Jehoava mi giv ih mesij tu Samwel da Shailo, ahn dat da how Samwel mi geh fi noa da hoo Jehoava.
Futnoat
^ Dis di rifaa tu di tabernakl. Si di Glasari, “Tabernakl.”
^ Si di Glasari, “Aak a di kovenant.”
^ Lit., “hows.”
